kraamaat@gmail.com
+ +92 333-430-6384


راضی ناواں ……٭رویل کہانی٭


Talwinder singhتلوندر سنگھ February 03, 2021


لاہوریاں دی پتی والے جنج گھر ساہمنے تارا گڑھیے سرداراں دے ٹریکٹر آکے رُکیا۔ پنج ست جوان، اینے کُو ادھکھڑ تے کُجھ بزرگ ٹرالی چوں چھالاں مار کے اُترے۔ گبھروواں نے مُچھاں دڑھیاں تے ہتھ پھیرے، پینٹاں سنواریاں تے اِک ٹاکی نال وارو واری بُوٹ جھاڑے۔ سیانیاں تے بزرگاں نے وی چادرے جھاڑے تے صافیاں نال چہریں تے داڑھیاں نُوں صاف کیتا۔ ایہناں ساریاں دے چہرے تنّے ہوئے تے کھیل سن۔ دو تِنّاں کول ریفلاں تے کُجھ کول چھَوّیاں گنڈاسے سن۔ ریفلاں والے سارے ای گھبرو سن تے تھوڑا پرے ہوکے ریفلاں دے بولٹ اگے پچھے کر کے ویکھن لگ پئے سن۔ سیانیاں تے بزرگاں نے اپنا گھیرا بنا کے کیتی جان والی گلبات نوں واچنا شروع کر دِتا سی۔ جنج گھر دے ویڑھے وچ دھریکاں تے نِمّاں دی چھاں ہیٹھاں پندرھاں وِیہ مُنڈے بیٹھے ہوئے سن۔ کُجھ بندے پہلاں ای ایہناں اُتے بیٹھے ہوئے سن تے نویں پراہنیاں دی آمد تے اُٹھ پئے سن تے ایدھر اودھر ہو گئے سن۔

جلدی ای اُٹھن والے سجن دُبارا اپنے کُجھ ہور ساتھیا ں نال آؤندے دِسے۔ ایہناں آون والیاں وچ پِنڈ دا سرپنچ، پنج نمبردار، کُجھ ہور معتبر بندے شامل سن۔ اوہناں آندیاں ای گج کے فتح بائی جِس دے جواب وچ تارا گڑھیئے سردارں کُجھ رواجی ہو کے اوہناں نوں مخاطب ہوئے۔ سنہری کڑھائی والا چِٹّا کُڑتا پجاما تے طِلے والی رُعب دار جُتی پائی سرپنچ سبھ توں اگے سی۔ اوہنے بڑے ادب تے سلیقے نال ہتھ جوڑ کے آون والے پراہنیا ں نوں بِینتی کیتی ”سردار صاحب آؤ تشریف رکھو۔“

بس رکھ ای رہے آں، تُسیں بلاؤ اپنے سرداراں نُوں“ آون والے پراہنیاں چوں کسے نے کہیا۔

”اوہ وی آ رہے نیں ……“ لو آ ای گئے۔ سرپنچ نے دھیان گیٹ ول کردیاں کہیا۔

”آگئے تاں ٹھیک اے، اسیں وی آئے ہی بیٹھے آں۔“ وچوں فیر کسے نے کہیا۔ اوہنوں نال والے نے ”دِھیرج رکھن“ دا اَکھاں نال اشارا وی کیتا۔

نویں آون والے رسمی فتح بُلا کے اگانہ جا کے اِک پاسے منجے تے بہ گیاں۔ تارا گڑھیے سرداراں چوں اک سیانی عمر دے بزرگ نے گھبروواں نوں بڑے ضبط وچ رہن دی تاکید کردیاں چل کے بیٹھن دا اشارا کیتا۔ ساریاں نے منجیاں تے تشریف رکھ لئی۔

خاص رونق بجھ گئی۔ پنجتالی بندیاں دا اکٹھ جُڑ گیا سی۔ ایہناں توں علاوا کُجھ پِچھے کھلو گئے سن۔ ایہناں ساریاں دے چہریاں تے اڈو اڈ طرحاں دے پربھاوّ سن۔ ایہ جو تارا گڑھیے سردار سن ایہناں دے چہریاں تے اوہ صاف جھلک رہیا سی۔ کُجھ کرن مرن دی دڑتا وی صاف سی۔ ایس پِنڈ دے سرداراں دے چہرے وی صاف تنے ہوئے سن۔ اوہناں دے نال دِیاں عورتاں وی بڑی وِسپھوٹک حالت وچ سن۔ کہن والیاں دی ایس گل وچ بڑا وزن سی کہ جے کوئی ایسی ویسی گل ہو گئی، جے مَناں پِچھے اُسل وٹے لیندا اوہ ساہمنے آگیا تے صورت حال سانبھنی مُشکل ہو جاؤ۔

ایس پنڈ دے سردار ایہ مُنڈے والے، اپنے علاقے دے اثر رسوخ والے بندے سن۔ زمین جائیداد، ٹریکٹر، ٹیوب ویل، چُباریاں تے نوکراں چاکراں دے مالک سن۔ چنگے سردے پُجدے سن۔ سمجھیا جاندا سی کہ پِنڈ دی پنچایت ایہناں دی اپنی اے۔ بارڈر ایریئے دے وسنیک ہون کارن، پُلس کچہریاں تے تھانیاں دے ناواں، تھاواں تے کسباں توں چنگی طرحاں واقف سن۔ اوہ تاں ایس انداز وچ سن کہ ایہو جہیاں تاں اساں کھادیاں پیتیاں نیں۔

ایہ تارا گڑھیے، کُڑی والے سردار، جو ٹرالی بھر کے بندیاں دی لیائے سن ایس پربھاوّ وچ سن کہ اساں ہتھیں چُوڑیاں تاں نہیں پائیاں۔ ایہ سمجھدے ہون گے اپنے آپ نوں تاں لکھ وار سمجھن۔ کس نوں بھُلیا سی کہ ایہ چور اُچکے تے بلیکیے سن۔ لڑائی لڑی جائے گی، دلیل دی وی تے ڈانگ سوٹے دی وی، پاڑی دے پیسے تارا گڑھیے سردارں اں تازے سن۔ اک ادھا بندا ہیٹھ اُپر ہون دی صورت وچ حالات سانبھن دی اہلیت رکھدے نیں۔

نِپٹارا کران آئے معتبر بندیاں توں علاوا ایہ جو ہور سجن مِتر کھلوتے ہن ایہناں چوں بُہتے تماش بین ہن۔ ایہناں نے سبھ حالت نوں ہر حالت وچ ماننا سی۔ اوہناں دے نمبر لانے سن۔ کِسے دِھر دے پکھ وِرودھ وِچ اوہ بلکل نہیں سن۔ ایسے لئی اوہ ایس تھاں کھلوتے سن جِتھوں بِنا اُلجھن منیا وی جا سکدا سی۔

ایہ دوویں دِھراں دے بندے ایہناں دیاں سوچاں، چہریاں تے ہتھاں وچ پھڑیاں چِیزاں توں لگدا سی کہ اوہ لڑن مرن تے اُتارو ہن، صرف لڑن مرن لئی اِکتّر نہیں سن ہوئے۔ ایہ ساڈے بڑے سلجھے تے ہنڈے ورتے بندے سن۔ دلیل تے گلبات نال مسئلا حل کرنا جاندے سن۔ ہوچھے تے ہلڑ باز بلکل نہیں سن۔ ایہ ہتھیار قتلام لئی نہیں، اپنی سُرکھیا لئی سن۔ تھوڑے رُعب دار پربھاوّ جماؤن لئی نال لے آئے سن۔ اُنج جتن دوہاں دِھراں دا بھرپور سی کہ گل نِبڑ جائے، نِت د ا کلیش ختم ہو جائے۔ روز روز دی کِچ کِچ مُکے۔ مسئلا نبیڑن لئی اِکا دُکا جتن ہوئے وی سن پر اج ورگا فیصلا کُن اکھاڑا نہیں سی لگا۔

آپو وِچیں گلبات تیز ہون لگی سی۔ ہولی ہولی ایہ گلبات کاواں رولی وچ وٹن لگ پئی سی۔ کِتے کِتے تلخ کلامی تُر پئی سی۔ ایہو ویلا سی، سمجھدار سیانے سرپنچ دے نِتّر پین دا۔ سو اوہنے بڑے سہج ڈھنگ نال ٹھاٹھی کھولی تے اوسے انداز وچ اوہدی پُونی بنا کے پگ دے وچ ای تُن لئی۔ اوہدی جسمانی حرکت توں سنکیت ملیا سی کہ کارروائی شروع ہون والی اے۔ اوس توں پچھوں پنجاں نمبرداراں دی ہِلجُل کر کے ایس مُڈھ سواگت کیتا۔

سرپنچ کُرسی دیاں کمزور باہیاں تے زور دیندا اُٹھیا تے ہتھ جوڑ کے سموہ سنگت نوں واہگرو جی دا خالصا، واہگرو جی کی فتح“ نال مخاطب ہویا۔ رلے ملے پر تیکرم وچوں فتح دا جواب آیا۔ اک چھن لئی آپسی گلبات رُکی تے اوسے چھِن مُڑ شروع ہو گئی۔

”میری سرداراں نوں بِینتی اے کہ چُپ دا دان بخشا جائے۔ سرپنچ نے اپنی بولی وچ ودھیرے مِٹھاس گھول کے کہیا۔

کاہدا چُپ دا دان بخشیے۔ وچوں ای کسے نے تارا گڑھیے سرداراں دی دِھر چوں جس نے اپنے آپ نوں ساریاں توں ودھ بولدا محسوس کیتا سی۔ اپنے اکھڑ رَوں وچ کہیا۔

سردار صاحب دِھیرج رکھو۔ سرپنچ نے اوویں ای صبر ٹھرے نال کہیا۔ اسیں سارے اِک مقصد نال اکٹھے ہوئے آں۔ کارروائی شروع کریئے تے گل مُکائیے۔ تُسیں ساڈے مان جوگ پراہنے او۔“

اوہ بندا چُپ کر گیا، پر وَٹ کھا گیا۔ اوہنے اپنا غُصّا اپنے ول پانی دا گلاس ودھاؤندے چوکیدار تے تھُک دِتا۔ ”پُت میریا سانوں پای دیندے او، تہانوں اسیں پانی پیاواں گے اج۔“

چوکیدار نے نہ کُجھ آکھیا، چُپ چاپ گلاس لے کے کھڑے ہو گیا۔ پر دُوجی دِھر چوں اک بندا جہڑی اوہدی گل دا کوڑ کھا گیا سی، سِروں صافا لا کے جھاڑدا تے مُڑ سِر تے وَلدا نک چڑھا کے بولیا۔ ”مُونہ سنبھال کے گل کرو بھائی صاحب“ ایں کچیاں بھُنیاں نہیں مار دیاں۔ سیانیاں تے شریفاں وانگوں بیٹھو۔ اِک ذمے دار آدمی گل کر رہیا اے، اوہنوں سُنو۔“

”ذمے وار؟“ اوس بندے نے ویانک وچ مُونہ وِگاڑیا۔ پر اوسے وقت اوہدے نال والے بندے نے اوہدے موڈھے نوں ہلون کے شانت کیتا۔ ”چُپ کر کے بہ نِدھانیا، ایویں نہیں کملیاں ماری دیاں۔“

سرپنچ نے ایس گل نوں پوری طرحاں نظرانداز کیتا تے کہیا ”سارے ای آپو اپنے تھائیں وڈے تے سیانے آ۔ بھراواں نے ایہ کرسی جے مینوں بخشی اے تاں میری بِینتی قبول کیتی جاوے۔ میں تہاڈا سبھ دا سیوا دا رہاں مینوں گل شروع کرن دی اجازت دِتی جائے۔“

شروع کرو شروع کرو۔ رلویں مِلویں اواز اکٹھ وچوں اُٹھی تے ساریاں نے دھیان سرپنچ ول مرکوز کر لیا۔

”گل تاں سارے ای جاندے“ سرپنچ نے گل شروع کیتی۔ ”اِک چھوٹی جہی گل پھیل کے وڈّی ہو گئی۔ اِک دُوجے بارے ناسمجھی تے غلط فہمیاں کارن انج ہویا……“

”چھوٹی جہی گل پھیل کے کِداں وڈی ہو گئی، ذرا چانن پاؤ سرپنچ جی۔“ اکٹھ دے وچوں کوئی بولیا جِس بارے پتا نہیں لگا کہ اوہ کہڑی دِھر دا سی؟ اوہ کِسے وی دِھر دا سی۔ اوکہ بولیا ایسے ای لہجے وچ سی کہ سرپنچ نوں اوہدی گل دی سُٹ پانی مشکل جاپی۔ سرپنچ نے اوسنوں گوہ نال ویکھیا، فیر ساریاں تے نظر دوڑائی۔ سبھ گھنبھیر تے چُپ سن۔

سرپنچ نے گل ٹوری ”سارا نگر جاندا اے کہ تارا گڑھیے سردار مِلکھا سیہوں دی بی بی اپنے پِنڈ دے سابقا سرپنچ سردار بلاکا سیہوں دے کاکے مریکے نال ویاہی ہوئی ا۔ ایہ ویاہ تِن سال پہلاں پورے ٹھاٹھ باٹھ نال ہویا سی۔ اپنے علاقے وچ اج وی چرچا ایس دی تے جو لوکا چاری بنی تارا گڑھیے سردارں نے کیتی، سگوں میں تاں کہاں گا، اودوں ودھ کیتا۔ بندے بھلے مانس، شریف تے مونہ متھے لگن وال نیں۔ اپنے وقت دے سرداروی چنگے رسوخ والے آ۔ جِنا کُو اسیں سارے جاننے آں، پروارنں وچ وچاراں دا ٹکراؤ معمولی گلاں توں وی ہو سکدا اے تے سمجھدار بندا ایہنں معمولی گلاں نوں ٹا لوی سکدا اے تے سنبندھ سہج کھ سکدااے۔ تارا گڑھیے سرداراں دی بی بی پڑھی لکھی تاں ہے پر کُجھ ودھیرے مونہ زور تے آپ ہُدری اے۔ گل ایداں ہوئی کہ………………

”گل جے مونہوں کڈھی اے تے اِک پاسڑ نہ رہے سرپنچ جی۔ چیتے رہے کہ ایتھے پرھے وچ بیٹھے تُسیں ساریاں لئی سانجھے او۔ مونہوں کڈھی گل حرف حرف سِدھ کرنی پئے گی۔“ سردار مِلکھا سیہوں دیاں اکھاں بھخن لگیاں تے اوہ کھلو کے کہ رہیا سی۔ ”خیال رکھناکہ گل تہاڈے تے نہ آوے۔“

ایہ وی چیتے رہے کہ مینوں کسے نے کہیا سی ”کہ سنو اِک ذمے وار بندا بول رہیا اے۔ غلط بیان بازی کرن والے دی اسیں اَئیں تئیں پیھرن والے آں۔“

”تُوں چھڈ نِدھانیا“ اوہدے کول بیٹھے بندے نے فیر اوہنوں کہیا۔

”چھڈ ندھانیا کیہ اوئے“ اوس نے طیش وچ آ کے کہیا۔ گلاں سُنن نہیں آئے ایتھے۔ سونے ورگی دِھی دی کیہ قدر پائی اے اوئے ایہناں؟ ایہ وڈے کھبّی خان، کون نہیں جاندا………………“

اِک ہور دانے جہے بندے نے اوس نوں وِرویا۔ ”نِدھان سیہاں، آپاں ذرا کُو رُکیے۔ ویکھدے آں گل کدھر ٹوردے آ، ایہ؟ ایہناں دی سُن تاں لئیے۔“

”سُن لیئے ایہناں دی،“ اوہ بُلھ اٹیر کے چُپ کر گیا۔

”تُسیں شروع کرو سرپنچ جی، سرپنچ دے کول بیٹھے ممبر نے کہیا۔

سرپنچ نے اپنی سیانپ تے دُوراند یشی دا ثبوت دیندیاں گل شروع کیتی۔ ”بھائی چارا معاف کرے مونہ زور تے آپ ہُدرا، ایہ دو لفظ میں واپس لینا۔ ایہ میری بِینتی اے کہ مینوں اوسے طرحاں گل کرن دی اجازت دِتی جاوے جِس طرحاں میں جاننا۔ رہے سمسیا دے باقی نِکے موٹے ویروے، میں گھرو گھری تاں جا کے ویکھدا نہیں۔ میری جاچے رِڑکے ہوئے نوں ہور رِڑکن دا فایدا وی کوئی نہیں۔ گل ڈُھکویں تے مُختصر ہووے تاں ٹھیک رہے گی۔…………“

بِیبیاں والے پاسے توں سردار بلاکا سیہوں دی سردارنی نے اُٹھ کے سرپنچ دی گل ٹوکی، ”میں کُجھ کہنا چاہنی آں نرنجن سیہاں۔“

سرپنچ نے اوہنوں بیٹھن دا اشارا کردیاں کہیا، معاف کرنا بی بی تہاڈی لوڑ پئے گی تاں تہانوں ضرور پُچھاں گے۔ تُسیں حالے بیٹھو“ تے اوہدے بیٹھن پِچھوں اگانہ گل ٹوردیاں سرپنچ نے کہیا ”سردار دی دِھی پڑھی لکھی ہون کارن کسے کم نوں ہتھ نہیں لاندی۔ ایس گل دا بہت اعتراض نہیں سی کیتا گیا۔ کیوں کہ مہاراج سُکھ رکھے۔ گھر چ کم کار کرن لئی نوکر چاکر بتھیرے نیں۔ روٹی ٹُک سردارنی آپ کر دی رہی اے۔ گُھنڈ کڈھن، سیانیاں دے پَیریں ہتھ لاون تے اکھ نِوا کے گل کرن ورگے رواجاں نوں بی بی نے کدے نہیں سی منّیا۔ سُندے آں اج کل پڑھے لکھے لوک ایہناں گلاں دی پرواہ گھٹ ای کردے آ۔ اوہ ساریاں وڈیاں نِکیاں نوں برابر کہندے۔ ہو سکدا سیانیاں نوں مُورکھ وی سمجھدے ہون۔ خیر ایہ کُجھ دسیا گھٹیا اوس دِن پھُٹ کے باہر آگیا جِس دن فریج وچوں کوئی دال سبزی کڈن ویلے مریک سیہوں دی نِکّی بھین کولوں پتیلا اُلٹ گیا ت یفریج لِبڑ گئی۔ بی بی رانی نے کُڑی دے چپیڑ ماری تے جھڑکیا کہ اگے توں اوہ اوسدی کسے چیز نوں ہتھ نہ لاوے۔ فیر تُوں تُوں میں میں چھِڑی۔ فیر گل ودھی ایوں چھوٹی جہی گل پھیلدی پھیلدی وڈّی ہو گئی۔ بی بی نے شاید اَڈ ہون بارے وی کہیا ہووے پر

مریک سیہوں نہیں مَنّیا۔ کلیش ہور ودھیا۔ سردارنی نے ورجیا ہوؤ تاں اوہدے نال تلخ کلامی کر گئی تے فیر اِک دن………………

ایس وار جدوں سردار ملکھا سنگھ نے اُٹھ ے سرپنچ دی گل ٹوکی تاں اوہدیاں اکھاں مشالاں انگ دَغدیاں پئیاں سن تے اوہ اُبالے کھا رہیا سی۔ ضبط تے سنجم قایم رکھدیاں اوہنے کہیا ”میں بِینتی کیتی سی کہ گل اِک پاسڑ نہ ہووے، پر ایہہ ہو رہی اے۔ سرپنچ اِک گھر دی بولی بول رہیا اے ایہ نِیاں والے پاسے جاندا رَوّیا اُکا نہیں اے۔ سانوں نہیں منظور ایس پنچایت دا کَکھ وی۔“

ہاں ہاں ٹھیک اے۔ ”تارا گڑھیے سرداراں دی دِھر چوں لگ بھگ سارے ای اکٹھے بولے۔

جدوں میں پہلاں کہیا سی کہ ایہ لوک چُستیاں وکھانوں باز نہیں آؤن گے، ایہناں تے اپنا فیصلا لاگو کرو تاں مینوں کہندے سی، تُوں چُپ رہ ندھانیا۔ ہُن دسو؟ اوس آدمی نے فیر کہیا۔

”بھائی ندھان سنگھ دی گل سولھاں آنے سچّی اے۔ لاتوں کے بھوت باتوں سے نہیں مانتے۔“ ندھان سنگھ دا اِک ہور حمایتی اُٹھ پیا۔

سرپنچ نے اپنے سیانپ دی اگلی کوڈی سُٹی ”میتھوں جے غلط بیانی ہوئی ہووے تے بھائی چارا مینوں معاف کرے۔ اپنے ولوں میں ہُن کُجھ ی نہیں کہاں گا۔ ایہ ٹھیک اے کہ آپاں نپٹارا ای کرنا ا تے سو فیصدی ہاں پکھی کرنا اے۔ دوویں دِھراں نوں اِک دُوجے نال گلے شکوے تاں ہے ای نیں۔ جے بھراواں دی رائے ہووے تاں آپاں ایہناں پاسوں ای اوہ گِلے شکوے سُن لیئے تے اوہناں وچوں سانجھا راہ کڈھ لیئے۔

”ٹھیک اے، ٹھیک اے“لگ بھگ ساریاں ای کہیا۔

”میری بِینتی اے سردار مِلکھا سیہوں جی نوں،ڈُھکویں لفظاں وچ اپنا واجب ہِرکھ وی دسن تے حل لئی سُجھا وی دین۔“ اپنے ٹھنڈے سبھاء مطابق سرپنچ کہہ کے کُرسی تے بہ گیا۔

سردارمِلکھا سنگھ پنچایت توں مخاطب ہویا ”کافی کُجھ کہہ دِتا گیااے، میں کیہ کہنا اے۔ دِھیاں والے آں سردار بہادر تے دِھیاں والے نِیویں گِنے جاندے۔ کوئی وی پیو بھاویں اوہ کِڈی وی وڈّی ڈھیری دا مالک کیوں نہ ہووے دِھی گھر نہیں بِٹھا سکدا۔ پچھلے ڈیڑھ سال توں میری دِھی گھر بیٹھی اے کہ کُڑی نوں مارن یاں گل گھُٹ دین توں اُرے اُرے اوہدے نال سبھ کُجھ واپریا اے۔ جے دین دِوان دی گل کریئے تاں جگ جاندا اے سردار بہادر نوں اسیں اوہ سارا لٹرم پٹرم دِتے۔ اوہ کُجھ وی جِس دا موہ اساں وی اج یتک نہیں سی ویکھیا۔ فیر دن دیہاڑ اُتے جانا سارا بِتوں باہر بھُگتایا اے اساں۔ ایہ نواب ایسے بھُکھڑ نکلے کہ نِت نویں فرمایشاں پاؤن لگے۔ میری پڑھی لکھی، سوجھوان تے ہزاراں نوں مَتاں دین والی دِھی نوں ایہناں کوئی کسر نہیں چھڈی پاگل کر دین دی۔ مینوں ایہ دسدیاں شرم آؤندی اے کہ کویں ایہناں ایس ڈیڈھ سال دے وقفے وچ بچّا نہ ہوندا الزام میری دِھی سر لایا ایہ جو دوش سرپنچ صاحب نے لایا کہ اوہنے کُڑی دے چپیڑ کڈھ ماری، سراسر غلط ا۔ ایہ گھڑی گھڑائی کہانی اے۔

ایہ گھڑی گھڑائی کہانی اے؟ بلاکا سیہوں دی سردارنی منجے توں اُٹھدی ہوئی بولی ”جہڑے………………“

”معاف کرنا بی بی جی،سردار نوں گل پوری کرن دیو“ سرپنچ نے ٹوکیا۔

کرلین دیو گل، مِلکھا سیہوں نے غیر جذباتی ڈھنگ نال کہیا۔

”دھِیے دِھیے کہندا مونہ سُکدا سی میرا۔ پر دِھی آکھے تُوں ہونی کون ایں؟“ تینوں جاننی آں میں چھتر نال۔ تے دُپٹے نال اَ کھاں پُونجھ کے اوہنے سُڑاکا ماریا۔ ”میریاں دِھیاں دوہتیاں ایہنے نولیاں۔ سوہرے دی داڑھی نوں ہتھ پاؤنوں ای گل رہ گئی۔ نہیں تاں اوہنے وی کیہ کیہ نہیں کہیا سُنیا۔ ایہ نویں والے چالے آء۔“ نرنجن سِیاں، ذرا سوچ کے دس تُوں ”نصاف کراؤن بیٹھا ایں اج۔ جہناں وسنا ہوندا اے اوہناں دے چالے ہور ہوندے آ۔ اسیں وی کدے نوہاں ساں، پرایں کدے مونہ پھٹ تے ڈماک والیاں نہیں ساں …………“

”ٹھیک میں، تُسیں بیٹھو ہُن۔ سردار ہوراں نوں مُکان دیو“ سرپنچ نے کہیا۔

”کہانیاں کاہدیاں پاؤنیاں سرپنچا، تُوں گل مُکا۔ ایہ تاں ایوں ای ودھدیاں جان گِیاں …… دو ٹُک گل اے، کوئی زنانی نہیں چاہندی کہ اوہدا آدمی عیباں؟؟؟ دا ماریا ت گھروچ نہ ہویا ہووے، اوہ اوہدی نہیں چاہندی کہ اوہدے ماپیاں تے اوہدی شان دے خلاف بے وجھا کوئی کُجھ کہے۔ پڑھی لکھی عورت تاں کدے وی نہیں چاہے گی۔ اوہ موئے ٹھُلھے ڈھنگ نال لا کے کیتیاں جان والیاں گلاں دا ورودھ وی کرے گی۔ جے اوہدے آدمی وچ صحیح راہ تے آ جان دی گنجایش ہ تاں اوہ کوشش ضرور کر گی۔ جے ایہ کوشش دا باقی جی بُرا مناؤن تاں اوہ غلط ہون گے۔ میری بِینتی اے سبھ نوں کہ اس گھر دی سمسیا ہنکار تے بھُکھ ای اے۔ میں کُڑی گھر بٹھاکے خُش نہیں آں، ایہ سردار چھوٹیاں گھونیاں گلاں توں پرہیز کرن۔ آپنے پروار دا دماغ ٹھیک کرن۔ دِھیاں بے پتی کراؤن تے واپس بلاؤن لئی نہیں ایہدیاں عزت نالوسن وساؤن لئی دئی دیاں نیں۔……“

”مطلب، تُسیں راضی ناویں لئی تیار ہو“ سرپنچ نے سُکھالا ہو کے کہیا۔

میں ہمیشا مسئلا گلبات نال نجٹھن لئی تیار رہیاں سردار جی، تے اج وی تیار آں۔ پر ہُن شرطاں ساڈیاں ہون گِیاں، اوہناں تے لکھتی اِکار ایہ کرن گے……“

”کاہدا لِکھتی اِکار؟“ سردار بلاکا سیہوں اُٹھیا۔ ”ساتھوں چوری دا مال برآمد ہویا؟ اکھے……“ سرپنچ دا اشارا پا کے او ہ چُپ کر گیا۔

”سردار مِلکھا سنگھ جی، ہور؟“ سرپنچ نے کہیا۔

”ایہناں نوں بولن دیو“ کہہ کے اوہ بہ گیا۔

سرپنچ دا اشارا پا کے بلاکا سیہوں بولیا۔ ”سردارو اسی رب توں ڈرن ولے تے سِدھے سادے بندے آں۔ میرا مریک سیہوں تاں گؤ اے۔ دِھی ایہناں دی نے آؤندیاں ای اوہدے تے کاٹھی پاونی چاہی پرایہدے وچ اوہنے سپھل نہیں ہون دِتا گیا۔ ایہ تا چنگاہویا مُنڈا میرے کہن وچ اے۔ فیر جی جی نال ایہنے بول بلارا کیتا۔ اسیں تاں سچ پُچھ نکو نک آ چکے ساں۔ پتا نہیں کہڑے لکھتی اُکار دی گل کردے آ،ایہ؟ لِکھتی

اکار اج ایہ کرن گے……“

”لوؤ جی، آ تاں اوہی ہوئی، آکھے اُلٹا چور کوتوال کو ڈانٹے“ اوہ بندا جہدا ناں ندھان سیہو سی، بولیا۔

”ایہ تاں پتا لگ جُو سردار کہ چور کون اے تے کوتوال کون؟“ بلاکا سیہوں دا کوئی سمرتھک بولیا۔

لگ جے فیر جے لگنا تاں ”ندھان سیہو ں ؒ توں فیر نہ رہیا گیا۔ اوہنوں نال دے بندے نے چُونڈھی وڈھی تے کہیا ”اک منٹ ذرا۔“

اِک تاں تُوں میری جان کھا ماری اے…… ندھان سیہوں کھِجھ کے نال دے بندے نوں کہیا تے اِک ایہ پتندر گل گل وچ وادھا کر رہے نیں“

سرپنچ نے دخل دِتا،” لمیاں گلاں وچ نہ پیئے۔ بھائی چارے وچ بیٹھیاں ایہ گلاں شوبھا نہیں دیندیاں۔“

”بھٹھ وچ پوے بھائی چارا“ بلاکا سیہوں وٹ کھا گیا۔ ”ساڈا تاں گھر لُوسیا پیا اے۔ اسیں تاں نکو نک آئے پئے آں۔ سچ پُچھو، اسیں تاں ایہ بَیڑ گلوں لاہ کے راضی آں۔“

”اسیں وی تہاڈے ورگے شوہدیاں دے دِھی وسا کے راضی نہیں۔ دِھی دا معاملہ سی سردارا، نہیں تاں اسیں سِرا دے ڈھیر لا دیندے“ مِلکھا سنگھ دے بُلھ کنب اُٹھے۔

ایدھرہتھیں چُوڑیاں پا کے نہیں بیٹھاکوئی۔ بھلیکھے وچ نہ رہو۔ چار بندو تڑیاں لیا کے رعب جھاڑن دی لوڑ نہیں اے۔ گل کرنی اے کوئی، نہیں کرنی تاں ودھ گھٹ ایتھے کُجھ نہیں رہنا۔“ بلاکا سیہوں سِدھا اپنے کُڑم مِلکھا سنگھ نوں مخاطب ہویا۔

”میں کہیا بئی، سُنا ذرا۔“سرپنچ کرسی توں اُٹھدا بولیا۔ کاواں رولی فیر چھڑ پئی سی۔ سردار جی سردار کرن ڈہے آں تے ایہ دھمکیاں دیندے نیں۔ وسا لوؤ ا یداں کُڑی، جاؤ نہیں وساؤندے کرو جو کردے او، وڈے ناڈو خاں دے سالے۔ سرپنچا۔ کہہ دے ایہناں نوں لَوں چک لین ٹِنڈ پھُوہڑی تے راہے پین۔ کمال ہوگئی۔“

”جے جاواں گے تاں خالی ہتھ نہیں جاواں گے جٹا“ تارا گڑھیے سرداراں ولوں اِک گبھرو بولیا۔

”ایہ ساڈی شرافت جے سنگھو، نہیں تاں سندھو ایتھوں راہے پاسکدے آں۔“ مُنڈے والیاں دا اِک حمایتی بولیا۔

سرپنچ نے اُچی نِگھّر اوازوچ کہیا ”سردارجے گل ایداں ای مُکاونی سی تاں فیر ایہ آرنبھ کھڑا کرن دی کیہ لوڑ سی؟ دو بندے آؤندے تے لگے لگائے دا احساس کر کے معاملا نبیڑدے۔ ایہ تاں فیر کوئی گل نہ ہوئی۔

”ایہ گل ای اے سرپنچا، تُوں چِنتا نہ کر“ اِک ہور مُنڈے والیاں داحمایتی بولیا۔

”چنگا بھراؤ جویں تُسیں چاہو۔ میری ہتھ بنھ کے بِینتی اے جو وی کرنا اے امن چین نال کرو۔ میں ایہ کدے نہیں ساں چاہندا میں چاہندا ساں تُسیں عزتاں والے سردار، ایوں نہ کردے، خیر مہاراج فیر وی چنگا کرے۔“ کُجھ چر اٹک کے سرپنچ نے ساریاں ول نظر ماردیاں کہیا۔ ”ایتھے بیٹھیاں ای نبیڑا ہو جاوے ایس گل دا، تارا گڑھیے سردار لگے لگائے دا جوہر جانا پاؤنا چاہن دس دین۔ دوواں دِھراں دی سہمتی تے

گل نبیڑ دِتی جاو گی۔

مِلکھا سیہوں نے اپنے مُنڈے نوں واج ماری ”وے اوئے پُتر ہرجاندے دی لِسٹ“ مُنڈے دے جیب چوں کاغذا د ا تہ کیتا اِک ٹکڑا دین تے اوہنے سرپنچ نوں دِتّا۔

کاغذ دی تہ کھول کے سرپنچ جِویں چونک ای گیا۔

”اسیں بھُکھے ننگے نہیں آں سرپنچا“ بلاکھا سوں دی رُعب بھری اواز سی۔ بھائی چارا سُن لوے لگے لگائے نالوں ودھ دے دیاں گے، سُناں دے تُوں پڑھ کے“

سرپنچ تاں جویں انّھے کھوہ وِچ ڈِگ گیا سی۔ اوہدی سوچ تے سرل اواز کنبدی تے ڈوکھدی پئی سی۔ اِک وار فیر سوچو، توڑ وچھوڑے وچ نہ پوّو سردارو۔ سیانے بن کے راضی ناواں کرو، مُنڈے کُڑی نوں کول بٹھاؤ تے سمجھاؤ جہدا دوش ہووے اوہنوں پیارنال سمجھاؤ۔ ایہ پھِک چنگی نہیں جے۔“

”تینوں کیہ سپ سُنگھ گیا سرپنچا“ بلاک سُوں حیران وی سی تے غصے وچ وی۔ تُوں بول دے۔ جے حسابوں کتابوں بھَجاں گے تے گل کریں۔“

”نہیں ہو سکدا حساب کتاب“ سرپنچ حالے وی بضد سی۔

ہوئے گا۔ یقینن ہوئے گا۔ بلاکا سیہوں نے پھنکار ماریا۔

کاغذ دا اوہ ٹکڑا بلاکا سیہوں نوں دیندیاں سرپنچ بولیا۔ ”ڈیڈھ سال جِنا چِر کُڑی ایتھے وسی اے، جِنا چِر عزت رولی گئی اے اوہدی، اوہدے عِوضانے وچ کُڑی کھڑاں گے ایہناں دی ڈیڈھ سال واسطے، تے سرپنچ بہ گیا۔

”کیہ کہیا؟“ اک رَلویں ہوربھری اواز اُبھری۔

”اوہ کہیا اے جو ساریاں سُنیا اے“ اِک ہور وَلویں تے ساویں رَوہ نال اَواز اُٹھی۔

تے فیر ا ِک زور دا ہنگاما مچ گیا۔ دوویں دِھراں دے بندے چھوّیاں گنڈاسیاں اُلار کے تیار ہوگئے۔ ریفلاں دے بولٹ پِچھے کر کے فیر اگے کر لئے گئے۔ یُدھ دے آثارصاف واضح ہوگئے۔ منجیاں تے بیٹھے کئی بندے اُٹھ پئے۔

سردار بلاکا سیہوں اُٹھیا۔ اوہدا تنیا تے غصیل چہرا ڈِھلا تے کسے جذبے توں عاری سی۔ کاغذ دا اوہ ٹکڑا پاڑدیاں تے سُٹدیاں اوہنے ہتھ جوڑے ”اسیں کُڑی وساواں گے سردارصاحب شرطاں تارا گڑھیے سردار دے دین۔ میں اَکھاں مِیٹ کے دستخط کر دیاں گا۔“

٭٭٭٭٭