انگار وادی…..٭رویل کالم٭

پاکستان تے بھارت وچکار تقسیم ہند دے بعد توں اج تک جہڑا مسئلا توجا طلب رہیا اے تے جہدی وجھا توں دوہاں ملکاں دے وچکار کئی وار جنگ چھڑ چکی اے اوہ مسئلا کشمیر اے پاکستان نے ہمیشا توں ای کشمیری مسلمان بھراواں دے حقاں لئی چھنڈا اُچّا کیتا اے تے ایس اکسُرتا دے وکھالے نُوں 5 فروری دے دن ملکی پدھر اُتے منایا جاندا اے۔ بھاویں 5 فروری نُوں باقاعدا طور اُتے مناون دا مُڈھ قاضی حسین احمد دے مشورے اُتے 1999 وچ ہویا پر اوس ویلے ایہ دن اوہناں دی سیاسی جماعت نے اپنے طور اُتے منایا تے اِک ورھے بعد ویلے دے وزیراعظم نے ایہنوں قومی پدھر اُتے مناون دی اجازت دے دِتی۔

5 فروری نُوں مظلوم کشمیری مسلماناں نال مناون دا مقصد عالمی دنیا نُوں ایہ دسنا اے کہ اج وی کشمیری بھارت دے ظلم تھلے دَبے ہوئے نیں تے اج وی پاکستانی اپنے بھراواں دیاں قربانیاں نُوں نہیں بھُلی۔ ہرورھے ایہ دیہاڑ کشمیر دے لوکاں نُوں حوصلا دیندا اے کہ حقِ خُد ارادایت دی ایس جنگ وچ اوہ کلے نہیں نیں تے پاکستان اِک ایٹمی طاقت دے طور اُتے وی کشمیر دے مسئلے نُوں ہر سطح اُتے اجاگر کردا رہوے گا۔ ایس سال وی کشمیر اکسُرتا دیہاڑ روایتی جوش تے جذ بے نال مناون دا ارادا کیتا گیا اے۔ خاص طور اُتے بھارت دے کشمیر اُتے غیر قانونی قبضے دے بعد ایہدی اہمیت ہور ودھ گئی اے۔ سال 2020 وچ وی وزیراعظم عمران خان نے ایس بھارتی ریاستی دہشتگردی نُوں روکن تے ایہدے خلاف اواز چُکن لئی استقلال دیہاڑ مناون دا فیصلا کیتا جہنوں بھرویں طریقے نال سارے ملک وچ منایا گیا۔ پاکستان دی خارجا پالیسی نے وی ایہدے لئی نمایاں کم کیتا تے اقوام متحدا سنے سارے عالمی اداریاں دی توجا خطے دے ایس اہم ترین مسئلے ول مبذول کروائی۔

پر لوڑ تاں ایس گل دی اے کہ مسلم ملکاں نُوں مضبوط بنائیے تے جہڑے ملک پہلے توں عالمی دنیا وچ اِک اُچیچی تھاں رکھدے نیں اوہ کشمیر لئی اواز چُکن۔ ایس مقصد لئی سارے مسلم ملکاں نُوں اپنے مفادات توں ود ھ کے مسلم اُمت دے لئی کم کرنا پوے گا‘ اَج کشمیر دے لوکاں نُوں صرف پاکستان توں سہارا ملدا اے جد کہ سارے مسلمان دیساں دا پہلا فرض اے کہ اوہ دینی جذبے نال نہ سہی انسانی حقاں دے شیشے وچ اپنے کشمیری بھراواں دی مدد کرن۔ بھارت اُتے زور پان کہ اوہ کشمیر اُتے مظالم بند کرے ورنا اوہدے نال تجارت بند کرن۔

5 فروری صرف کشمیردی انگار وادی نُوں اکلا ویکھن دا ناں نہیں اے سگوں ایہدے لئی عملی طور اُتے اقدامات کرن دا دن اے۔ ایہ دُشمن دے خلاف ڈٹے رہن دا دن اے تے ایس عہد دا دن اے کہ کشمیر دے لوک وی اِک دن ضرور ازاد وطن وچ سُکھ دا ساہ لین گے جو اوہناں دا پیدایشی تے آئینی حق اے‘ جہنوں بھارت اپنے ناجایز ہتھکنڈیاں نال نہیں نَپ سکدا۔