سٹیل مل ملازمین دے پروموشن بارے کیس دی سنوائی،وزیر منصوبا بندی‘ وزیر نجکاری‘ وزیر صنعت و پیداوار‘ سیکرٹری منصوبا بندی تے سیکرٹری نجکاری نُوں فوری  سدّ لیا گیا:سپریم کورٹ ……٭رویل خبر٭

اسلام آباد (نیوز ڈیسک) سپریم کورٹ وچ سٹیل مل ملازمین دے پروموشن بارے کیس دی سنوائی‘ عدالت عظمیٰ نے وزیر نجکاری تے وزیر منصوبا بندی نُوں نوٹس جاری کردیاں ہویاں اگلی سنوائی اُتے سَد لیا‘ سنوائی 9 فروری تک ملتوی کر دِتی گئی۔ سنوائی دوران عدالت عظمیٰ ولوں وزیر منصوبا بندی‘ وزیر نجکاری‘ وزیر صنعت و پیداوار‘ سیکرٹری منصوبا بندی تے سیکرٹری نجکاری نُوں فوری سدیا گیا‘ پر وفاقی وزراء شہر توں باہر ہون دی وجھا توں عدالت دے ساہمنے پیش نہ ہو سکے۔ جمعرات نُوں چیف جسٹس گلزار احمد دی اگوائی وچ 2 رکنی بینچ نے کیس اُتے سنوائی کیتی۔ سنوائی دوران چیف جسٹس گلزار احمد نے ریمارکس دِتے کہ انتظامیا دی ملی بھگت دے بغیر کوئی غلط کم نہیں ہو سکدا‘ کیہ حکومت نے سٹیل مل انتظامیا دے خلاف کارروائی کیتی؟ مل بندی پئی اے تے انتظامیا کیوں رکھی ہوئی اے؟ بند سٹیل مل نُوں کسے ایم ڈی یاں چیف ایگزیکٹو دی لوڑ نہیں‘ سٹیل مل انتظامیا تے افسران قومی خزانے اُتے بھار نیں‘ ملازماں توں پہلے سارے افسراں نُوں سٹیل مل توں کڈھو۔ سنوائی دوران پاکستان سٹیل مل دے وکیل نے مؤقف اپنایا کہ ساری انتظامیا تبدیل کیتی جا چکی اے‘ 1800 توں ودھ افسران سن 439 رہ گئے‘ سٹیل مل دا روزانا دا خرچ 2 کروڑ سی جہڑا ہُن 1 کروڑ رہ گیا اے‘ 49 فیصد ملازمین کڈھ چکے آں ہوراں لئی عدالتی اجازت چاہیدی اے۔ جہدے اُتے چیف جسٹس نے ریمارکس دِتے کہ انتظامیا تبدیل کرن نال کیہ مل فعال ہو جاوے گی؟ پاکستان دے علاوا پوری دنیا دیاں سٹیل مِلاں منافع وچ نیں‘ سٹیل مل وچ ہُن وی لوڑ توں بُہتا عملا موجود رہوے گا‘ مل ای بند پئی اے تے 439 افسران کر کیہ رہے نیں؟ اجازت براہ راست سپریم کورٹ دیوے گی پر پہلے افسر کڈھو‘ اج توں کسے ملازم نُوں ادائیگی نہیں ہووے گی‘ جدوں مل نفع ای نہیں دیندی تے ادائیگیاں کس گل دیاں‘ ملازماں نُوں بیٹھن دی تنخاہ تے نہیں ملے گی‘ سٹیل مل وچ کئی لوکاں نے بھرتی توں ریٹایرمنٹ تک اِک دن وی کم نہیں کیتا‘ مل دا 212 ارب دا قرضا کون ادا کرے گا‘ مینجمنٹ تے ورکرز نُوں ادارے دا احساس ای نہیں‘ مفت دی دُکان توں جہدا جی چاہندا اے لے جاندا اے‘ سٹیل مل نُوں کسے وی ورکر یاں افسر نے اپنا خون نہیں دِتا‘ورکر اپنے پیسے لین لئی ٹریک اُتے لمے پے جاندے نیں‘ سٹیل مل دے باقی 3700 ملازماں نُوں اج فارغ کرن دا حکم دواں گے‘ سٹیل مل دے 437 وِچوں 390 افسراں نُوں وی اج فارغ کراں گے‘ ساریاں نُوں فارغ کر کے اج سٹیل مل نُوں تالا مارن دا حکم دواں گے‘ عملی طور اُتے سٹیل مل دا کوئی وجود نہیں‘ ملک دے ہر ادارے دا حال سٹیل مل ورگا اے‘ ریلوے‘ پی آئی اے‘ سنے ہر ادارے وچ حالات ایہو جہے ای نیں‘ سارے افسران اپنی ذاتی سروس کر رہے نیں ملک دی کسے نُوں فکر نہیں‘ بند اداریاں دے ملازماں نُوں تنخاہواں دے کے ای ملک دیوالیا ہویا‘ 9 فروری نُوں وفاقی وزیراء نُوں سن کے فیصلا کراں گے۔ سنوائی دوران جسٹس اعجاز الحسن نے ریمارکس دِتے کہ مل بند اے پر ملازمین ترقیاں منگ رہے نیں‘ سٹیل مل وچ نوٹاں دی مشین نہیں لگی ہوئی‘ سٹیل مل کدی ساڈی معیشت دی ریڑھ دی ہڈی ہوندی سی۔ ایس موقع اُتے چیف جسٹس نے ریمارکس دِتے کہ سیکرٹریز دے کم نہ کرن دی وجھا توں ای ملک دا ستیا ناس ہویا‘ سیکرٹریز نُوں ڈر اے کدھرے نیب اوہناں نُوں نہ پھڑ لوے‘ پہلے وی تے سیکرٹریز کم کردے سن ہُن پتا نہیں کیہ ہو گیا۔ چیف جسٹس نے بیورو کریسی اُتے شدید برہمی دا اظہار کردیاں ہویاں ریمارکس دِتے کہ ملک وچ کوئی وفاقی سیکرٹری کم نہیں کر رہیا‘ سارے سیکرٹریز صرف لیٹر بازی ای کر رہے نیں جو کلرکاں دا کم اے‘ سمجھ نہیں آندا حکومت نے سیکرٹریز نُوں رکھیا ای کیوں ہویا اے‘ عدالت نے ہور سنوائی 9 فروری تک ملتوی کر دِتی۔