kraamaat@gmail.com
+ +92 333-430-6384


لاہور دے اَدب وچوں پنجابی بولی تے  ثقافت نوں کڈھ دِتا ، سرکار، اُردو والیاں ہتھوں بلیک میل ہو رہی:پنجابی سنگت پاکستان۔۔۔٭رویل خبر٭


نمائندا رویل February 08, 2021


لاہور(پ۔ر)پنجابی سنگت پاکستان نے’’یونیسکو‘‘ ولوں لاہور شہر نوں پاکستان دا لٹریری شہر قرار دین اُتے ’’یونیسکو‘‘ دی تعریف کیتی ۔ پر ایہدے نال نال ایس گل اُتے دُکھ دا وکھالا کیتا گیا کہ گورنمنٹ پنجاب دے ادارے جہناں وچ اطلاعات و نشریات، ادب و ثقافت،صوبائی سیکرٹری اطلاعات، چیف سیکرٹری پنجاب، صوبائی سیکرٹری کلچر، اکادمی ادبیات، الحمراء آرٹ کونسل، پنجاب آرٹ کونسل، وفاقی حکومت تے ہور ذمے وار ادار ے اُردو والیاں دے ہتھوں بُری طرحاں بلیک میل ہو رہے نیں۔ لاہور پنجاب دی راجدھانی اے تے ایہ پنجاب دا مان اے ،جے لاہور دے ادب وچوں پنجابی بولی تے پنجابی ثقافت نوں کڈھ دِتا جاوے تاں فیر پچھے کُجھ نہیںبچدا۔ سرکار ولوں پچھلے دناں ایس موقعے اُتے جو اشتہار چھاپے گئے اوہناں وچ کسے وی پنجابی ادبی شخصیت جہدا تعلق لاہور نال ہووے، اوہنوں شامل نہیں کیتا گیا۔جدکہ لاہور دے وچ پنجابی دے سولھویں صدی دے عالمی پدھر دے مہان شاعر شاہ حسین موجود نیں تے اوہناں دے ناں دے اُتے ہی لاہور تے پاکستان دا ناں دنیا دے وچ جانیا جاندا اے۔ ایسے طرحاں دی اک ہور شخصیت جہنے لوکائی دی گل کیتی تے دُنیا بھر وچ مشہور ہوئے اوہ اُستاد دامن نیں پر پنجاب سرکار،وفاق تے دوجے اداریاں نوں ایہناں وچوں کوئی وی وکھالی نہیں دِتا۔ پچھلے دناں لاہور وچ اک پریس کانفرنس دے دوران صوبائی وزیر اطلاعات و نشریات فردوس عاشق اعوان ہوراں اک سوال دا جواب دیندے ہوئے ایتھوں تیکر آکھیاکہ ’’ہُن پنجاب نوں چھڈ وی دیو‘‘۔اج دا ایہ اکٹھ اوہنا ںدی ایس گل دی نندیا کردیاں ہویا آکھدا اے کہ تُسیںآپ پنجاب دی جان چھڈ دیو۔ تے ایتھوں کدھرے ہور چلے جائو۔ایہو نہیں جے اپنی پنجابی شناخت بُری لگدی اے تے تُسیں اپنا حسب نصب وی بدل سکدے او۔پنجابی شاعراں تے ادیباں نے پنجابی سنگت پاکستان دے ایس اکٹھ وچ بھرویں رلت کیتی جہدے وچوں کُجھ نامور لکھاریاں دے ناں ایہ نیں۔ اقبال قیصر، یوسف پنجابی، سرفراز صفی، نصیر احمد،نوید انجم، غلام محمد ساقی،عدل منہاس لاہوری، ناصر ادیب ناصر، جی۔اے نجم،مُرلی چوہان،سردارکلیم اللہ، عابد شاہ گیلانی، ڈیوڈ پرسی،عبدالحفیظ،اسلم شوق، ہیتم تنویر اکرم،مقصود خالق، افتخار بیگ مِترا،علی جوشا،افضل عاجز،افضل ساحر،نورالعین سعدیہ،ڈاکٹر شمائلہ اعظم،طاہرہ سراء، چاند شکیل، ماجد مہر، افتخار بیگ، زاہد جرپالوی،صفدر ماہی تے افتخار نواز رلتی نیں۔چیتے رہوے کہ کرکٹ میچ کارن پنجابی سنگت پاکستان دا ہفتہ وار اجلاس پنجاب انسٹی ٹیوٹ آف لینگوئج آرٹ اینڈ کلچر(پلاک)دے بند ہون کارن ’ایس ٹی این ٹی‘ دے دفتر نیو گارڈن ٹائون لاہور ہویا۔