چار حرفی اکھراں دا دن، محبت+ پریم= ویلنٹائن ڈے۔۔۔۔٭رویل لیکھ٭

فروری دا مہینا شروع ہندیاں سار اای پاکستان وچ اک تھرتھل جہی پے جاندی اے۔ ایہ تھرتھل کجھ تے اوہناں ولوں ہوندی اے جہڑے ویلنٹائن ڈے دے دیہاڑ نوں بڑی رِیجھ نول منائوندنا چاہندے ہَن اتے بہُتی اوہناں ولوں ہوندی اے جہڑے ویلنٹائن ڈے نوں مندا اتے بھیڑے کماں دا دن جان کے حیاء ڈے ، بھین ڈے، چُنی ڈے ورگے دن منائون دے حامی نیں۔

جمعے دی رات آؤن والے زلزے پاروں ، اجہی سوچ رکھن والے بہت سارے لوکاں دا خیال اے کہ ایہ رَبّ ولوں اک سگنل دِتا گیااے کہ جے تسیں بسنت میلا یاں ویلنٹائن ڈے مناون دی کوشش کیتی تاں میں ایسے طرحاں اپنے عذاب نال پاکستانی لوکاں نوں تباہ کردیاں گا۔ اتے اجے ویلا اے کہ تسیں ایہ دن منائون توں باز آ جائو۔

میں کدی کدی بڑا حیران ہندا ہاں کہ رَبّ اودوں اپنا عذاب کیوں نہیں گھلدا جدوں اسیں کھان پین والیاں شیواں دی تھاں اوسے رَبّ دی خلقت نوں زہر کھوائی جانے آں۔ رَبّ اودوں اپنا عذاب کیوں نہیں گھلدا جدوں اسیں رات دے ویلے پھل فروٹ تے رنگ برنگیاں لایٹاں لا کے پیلے نوں لال کر کے ویچدے ہاں۔ رَبّ اودوں اپنا عذاب کیوں نہیں گھلداجدوں اسیں ماڑیاں، مہاتڑاں، نتانیاں دا حق ماردے ہاں۔ اتے رَبّ اودوں وی اپنا عذاب کیوں نہیں گھلداجدوں نِکے نِکے بالاں اتے بالڑیاں نال زیادتی کر کے اوہناں نوں جانوں مار دِتا جاندا اے۔ جدوں سڑک تے کِسے دھی نوں اوہدے بالاں ساہمنے ننگیاں کر کے زیادتی کیتی جاندی اے، جدوں بالاں ساہمنے اوہناں دے ماں پیو نوں گولیاں ماریاں جاندیاں نے۔ جدوں نِکے نِکے مُنڈیاں دیاں پورن ویڈیو بنا کے "بزنس"کر کے اپنے بالاں لئی روٹی کمائی جاندی اے۔ ربّ اپنا عذاب اودوں ای کیوں گھلدا اے جدوں اسیں پیار محبت اتے میل ملاپ دا اُپرالا کردے ہاں؟

اِک مِتّر ناساں چاڑھ کے کہن لگا "ویلنٹائن ڈے بہت بھیڑا دن اے" میں ہس کے کہیا "بِیبا توں ایہ چنگا کر کے منا لے، تسیں بھیڑا کر کے کیوں مناؤندے او۔ چنگا کر کے منائو اتے چنگے بن جاؤ" پر اسیں تے ایڈے منافق آں کہ بھیڑے نوں بھیڑا تے آکھ سکنے آں پر بھیڑے نوں چنگا نہیں کر سکدے۔ گل تاں فیر ای بندی اے کہ جد اسیں بُرے نوں چنگا کر کے وکھائیے اتے دُنیا نوں دس دئیے کہ تسیں ویلنٹائن ڈے غلط طریقے نال مناؤندے او۔ پر اسیں اس چنگے طریقے نال مناؤندے ہاں۔

کلاسیکی یونانی زبان وچ محبت ، پریم لئی پنج مڈھلے اکھر ورتے جاندے نے۔ 1۔ STORGE ’’سٹورگے‘‘ ایہ اکھر ماں باپ، بھین بھراواں ، اتے دوجے نیڑلے انگ ساکاں نال کرن والی محبت اتے پریم لئی ورتیا جاندا اے۔ 2 ۔ PHILIA ’’فِلیا‘‘ ایہ اکھر چنگا لگن اتے دوستی دے جذبے لئی ورتیا جاندا اے۔ جویں کہ مینوں ’’رویل ‘‘ بہت چنگا لگدا اے اتے اس دے سارے سٹاف نال میری دوستی اے۔ کوئی پھُل، کوئی کتاب ، کوئی تھاں وی چنگی لگ سکدی ہے جہدے نال دوستی ہو جاوے۔ 3 ۔ PHILAUTIA ’’فلائوٹیا‘‘ ایہ اکھر اپنے آپ نال کیتی جان والی محبت Self-loveلئی ورتیا جاندا اے۔ جہدا مطلب ایہ ہندا اے کہ بس میں ای چنگا ہاں، اپنیاں ای تعریفاں اتے اپنے بارے ہی واہ واہ۔ 4 ۔ EROS ’’ایروس‘‘ سارا رولا ہی اس کھر دا اے کیوں جے ایہ اوہ اکھر اے جہڑا عورت اتے مرد دے صرف جسمانی تعلق لئی کیتی جان والی محبت نوں بیان کرن لئی ورتیا جاندا اے۔صرف اس اکھر نوں ہی اج کل اسیں ویلنٹائن ڈے سمجھدے ہاں۔ ایہ اکھر ہوس والی محبت نوں بیان کردا اے۔ 5 ۔ AGAPE ’’اگاپے‘‘ سب توں اُچی اتے سب توں اعلیٰ قسم دی محبت نوں بیان کرن لئی ایہ اکھر ورتیا جاندا اے۔ یونانی زبان دے لکھاری اس اکھر نوں صرف خدا دی محبت لئی استعمال کردے نے۔ کیوں جے اس محبت وچ بغیر کسے صِلے توں، بغیر کسے لالچ توں صرف احساس کردیاں ہوئیاں دوجیاں نال پریم کیتا جاندا اے۔ دوجیاں دیاں لوڑاں تھوڑاں نوں محسوس کرنا، دوجیاں دے دکھ نوں اپنا دکھ جان کے رونا ، اتے کسے نوں مصیبت وچ ویکھ کے ایہ محبت اپنے آپ ہو جاندی اے۔ اتے ساڈا سوہنا رَبّ ساڈے نال ایسے ای طرحاں محبت کردا اے۔

ہُن جے انصاف نال ویکھیا جاوے تے اسیں محبت لئی ورتے جان والے باقی چار اکھر چھڈ کے ویلنٹائن ڈے تے صرف اکو ای اکھر دا ٹھپا لا دِتا اے۔’’اخے گندی اتے ہوس بھری محبت دا دن۔‘‘

بِیبا جی! تہانوں اس محبت تے اعتراض اے ؟ ساہنوں تہاڈے نالوں بہُتا اعتراض اے۔ تسیں ایہنوں مندا سمجھدے او، اسیں تہاڈے نالوں بہُتا مندا سمجھدے ہاں۔ تسیں سمجھدے او کہ اس کر کے ویلنٹائن ڈے نہیں مناؤنا چاہیدا ۔ پر اسیں سمجھدے ہاں کہ صرف ‘‘اِیسے" کر کے ویلنٹائن ڈے منائونا نہیں چاہیدا۔ پر ایہ تاں ہو سکدا اے ناں کہ تسیں کلاسیکی یونانی زبان دے اک اکھر نوں چھڈ کے باقی چار اکھراں تے عمل کر لئو۔ عربی زبان دے اکھر’’ محبت ‘‘اتے سنسکرت زبان دے اکھر ا’’پریم‘‘ دے وی چار چار حرف ہی نیں۔

تسیں ’’سٹورگے‘‘ محبت کر لئو۔ اپنی ماں نال ، اپنے باپ نال ، اپنے بھین بھرواں نال، اپنے ہور انگ ساکاں نال۔تسیں ’’فِلیا‘‘ محبت کر لئو ، کسے شے نال کسے کتاب نال، کسے پھُل نال ، کسے تھاں نال۔ تسیں ’’اگاپے‘‘ محبت کر لئو ، اس روندی وِلکدی دنیا نال، لکھاں بھُکھے مردے لوکاں نال، ہسپتالاں وچ جائو ،پِیڑاں جردے مریضاں نال محبت کرو۔ کُوڑا چُکدے بالاں نال محبت کرو۔ ماڑیاں ،مہاتڑاں، نتانیاں اتے وانجھی لوکائی دے کم آؤ۔

جے ایہ سبھ نہیں کر سکدے تے "فلائوٹیا" اکھر ورت کے صرف اپنے آپ نال ای محبت کر لئو۔ بھَیڑے کماں نوں، بھیڑی سوچ نوں چھڈ کے اپنے آپ نال ای پیار کر لئو۔ پر اسیں تاں ایہ وی انہیں کر سکدے۔

اپنے ماں پیو نوں تحفا دیو اتے اپنی محبت دا اظہار کرو۔اپنے بھین بھرواں انگ ساکاں نال ، جہناں نوں تسیں کدی پچھیا نہیں اج اوہناں نوں وی دسو کہ اسیں تہانوں محبت کردے آں۔ سڑک تے کھلو جائوتے محبتاں ونڈی جائو۔ ہر آؤندے جاندے نوں گلاب دا پھُل اتے چاکلیٹ دے کے اپنی محبت دا اظہار کرو۔دُکھیاں دے ، مصیبتاں ماریاں دے، تے پیڑاں جردیاں دے گل لگ جاؤ اتے ایدھی، مدر ٹریسااتے مادام رُتھ فائو بن جائو۔

پر تسیں تے اکو ای پوچھل پھڑ کے رَبّ کولوں دنیا تباہ کراون ٹُر پئے او۔

محبت زندا باد

٭..... ٭..... ٭