مادری زباناں دے دیہاڑ اُتے وکھ وکھ شہراں اندر احتجاج،ریلیاں تے جلسے،پنجابی زبان نوں حق دِتے جاون دی منگ۔۔۔۔٭رویل خبر٭

مادری زباناں دے دیہاڑ اُتے وکھ وکھ شہراں اندر احتجاج،ریلیاں تے جلسے،پنجابی زبان نوں حق دِتے جاون دی منگ۔۔۔۔٭رویل خبر٭

لاہور (نمایندا رویل) اِکی فروری نوں پوری دُنیا وچ ماں بولی دیہاڑ منایا جاندا اے۔پنجاب اندر ماں بولی نوں اوہدے سارے حقاں دی منگ واسطے ریلیاں کڈھیاں گئیاں لاہور شہر وچ چئرنگ کراس اُتے سبھ توں وڈا جلسا ہویا جہدے وچ پنجابی سیوکاں،لکھاریاں توں وکھ عام لوکائی نے وی وڈی تعداد وچ رلت کیتی ایس جلسے وچ پنجابی دے حقاں واسطے ڈھیر گلبات کیتی گئی تے اوہناں نے سرکار کولوں منگ کیتی کہ پنجابی زبان نوں مُڈھلی تعلیم توں بی اے تیکر لازمی کیتا جاوے۔چئرنگ کراس توں وکھ پریس کلب دے ساہمنے وی پنجابیاں نے اپنی منگ سرکار ساہویں رکھی تے ایہ ریلی وی چئرنگ کراس پنجاب اسمبلی تیکر آئی تے سارے پنجابیاں نے رل مِل کے اپنے حقاں لئی اواز چُکی۔لاہور شہر توں وکھ راولپنڈی،اسلام آباد،فیصل آباد،ساہیوال،سرگودھا،چنیوٹ تے کئی ہور شہراں وچ وی ماں بولی دے حقاں واسطے اواز بلند ہوئی تے لوکائی دی وڈی تعداد نے ایس وچ رلت کیتی کہ اوہناں دے بنیادی حق ماں بولی وچ تعلیم دتی جاوے تاں جو ایتھے تعلیم عام ہووے تے صوفیا کرام دی حیاتی نوں ساڈے نصاب دا حصا بنایا جاوے۔کئی ورھیاں وانگ ایس وار وی لوکائی دی وڈی تعداد نے اپنے حقاں لئی اکٹھے ہو کے اپنیاں منگاں سرکار ساہمنے رکھیاں نیں دیس دے باقی تِناں صوبیاں وانگ پنجاب اندر وی ماں بولی راہیں تعلیم دینا ہر پنجابی دا فطری،قانونی تے آئینی حق اے ایس لئی چھیتی توں چھیتی ای ایس اُتے عملدرآمد وی کروانا چاہیدا اے۔ اپنی زبان دے حقاں واسطے اواز چُکن والے جیون دے ہر کھیتر نال سنبندھت سن جو ایس گل دا وی وڈا ثبوت اے کہ ہر پنجابی اپنی زبان نوں بولنا پڑھنا لکھنا تے سُننا چاہندا اے تے اوہ پنجاب نوں گونگا نہیں رکھنا چاہندا۔