منظور وزیر آبادی دا حمداں،نعتاں تے منقبتاں دا پراگا"خشبوواں دا پُور" شایع ہو گیا ……٭رویل خبر ٭

منظور وزیر آبادی دا حمداں،نعتاں تے منقبتاں دا پراگا"خشبوواں دا پُور" شایع ہو گیا ……٭رویل خبر ٭

لاہور(نمایندا رویل) پنجابی غزل دے پِڑ وچ اپنی وکھری پچھان رکھن والے شاعر منظور وزیر آبادی ہوراں دے غزلاں دے تِن مجموعے شایع ہو چکے نیں۔ ویلے ہتھ نیاں (1978)،تُوں وی چن اُچھال کوئی (1985) تے دُکھ دا صدقہ جاری(1992)۔ ایس ورھے اوہناں دا لکھیا حمداں،نعتاں تے منقبتاں دا پراگا”خشبوواں دا پُور“ چھپ گیا جوآپ دی وفا ت توں بعدوں آپ دے پُتر جاوید منظور ہوراں دے جتناں نال چھاپے چڑھیا اے۔آپ دی وفات اٹھ ستمبر1998نوں ہوئی سی۔ایس کتاب دا دیباچہ سرورحسین نقشبندی تے ڈاکٹر عصمت اللہ زاہد نے لکھیا اے۔

ڈاکٹر عصمت اللہ زاہداپنے وچار انج سانجھے کردے نیں:

” منظور وزیر آبادی ہوراں دی نعت وچ روایت دے نال جدت دا رنگ وی موجود اے۔حضور ﷺ دے دَر دی حاضری،گنبد خضرا دی زیارت تے نورانی جالیاں ساہمنے کھلو کے سلام پیش کرن دی تمناہر مسلمان دے دل دی سبھ توں وڈی حسرت اے ایسے لئی پنجابی نعتیہ شاعری وچ ایہ مضمون ہمیشہ غالب رہیا اے پر جدید طرز احساس نے ایس اہم مضمون دے نال نال اج دے عہد دے آشوب دا علاج حضور ﷺ دے اسوہ حسنہ تے سیرت اطہر وچوں لبھن دے تصور نوں اج دا اہم موضوع بنادتا اے۔“ص۔12

ایس کتاب نوں مدحت پبلیکشنز،بگ سٹی پلازہ گلبرگ3لاہور نے شایع کیتا، کُل صفحے چھیانوے تے مُل کوئی نہیں لکھیا گیا اے۔