کرکٹ میلے تے ساڈے روّیے …..٭رویل کالم٭

کھیڈ دے میدان اباد ہوون تاں ہسپتال ویران ہوجاندے نیں ایہوکارن اے کہ ترقی یافتا ملکاں اندر لوکائی دی صحت چنگی ہوندی تے کوئی وی وڈا عالمی کھیڈاں دا میلا ویکھ لوو تے انج لگے گا کہ کھیڈاں دے مقابلے وی امیر ملک ہی جِت دے نیں کہن نوں تاں ساڈا قومی کھیڈ ہاکی اے پر ایہنوں قوم کھیڈنا پسند نہیں کردی تے شاید ای تہانوں کسے پاسے ہاکی کھیڈن لئی کوئی تھاں ملے سرکارولوں وی کوئی دلچسپی نہیں ایسے لئی ماضی دی ہاکی وچ وڈی طاقت رہن والی ، اج اولمپکس ورگے مقابلے وچ جاون جوگی وی نہیں رہی ایہدا پوسٹ مارٹم کرناویلےدا ضیاع ہووے گا کیوں جے ہُن نویں نسل نوں ایس کھیڈ دا پتا ای نہیں کہ ہاکی وی کوئی کھیڈ ہوندا اے۔

کرکٹ نوں قومی کھیڈ آکھیا جاوے تاں غلط نہیں ہووے گا کیوں جے پاکستان دی ہرگلی ، نُکر وچ کھیڈیا جاوندا اے جے کرکٹ دا مقابلا پاکستان تے ہندوستان وچکار ہوجاوے تاں سارا برصغیر ٹی وی اگے بیٹھا نظرآوے گا ایسے لئی کہیاجاوندا اے کہ کرکٹ ایتھوں دے لوکاں دے لہووچ شامل اے۔

ایس مقبولیت تے پیسے دی بھرمار نیں کھیڈ نوں کھیڈ نہ رہن دتا میرٹ ناں دا نشان نہیں کئی ورھیاں پہلے جہدوں عمران خان ہوری اپوزیشن چے ہوندے سن تاں اک پریس کانفرنس وچ اوہناں دا کہنا سی کہ جتھے پورا ملک ایڈہاک اِزم تے چل رہیا ہووے اوتھے کرکٹ بورڈ اندرمنصوبا بندی یاں دُور اندیشی کویں ہوسکدی اے ؟

تریخ توں زرا سبق حاصل نہیں کیتا اج کرکٹ ٹیم اپنی تواریخ دے بھیڑے دور توں گزر رہی اے ٹیسٹ رینکنگ وچ تھرلے نمبراں تے اک عرصے توں آ رہی اے نیوزی لینڈ دے دورے وچ کھڈاریاں دی صلاحیت نِتھر کے ساہمنے آئی اے جہدوں وی آسٹریلیا، انگلستان، افریکا یاں نیوزی لینڈ دورے دی گل ہوندی اے تاں ساڈے منے پرمنے کھڈاری ان فِٹ ہوجاندے نویں کھڈاریاں تے قسمت دی دیوی مہربان ضرور ہوئی جہنوں شان مسعود ورگے کھڈاری نے ہمیش ورگوں ضایع کیتا ایہ کافی چِر توں ٹیم دا حِصا وی رہ چکے نیں پرمجال اے جے اپنی بلے بازی راہیں اپنی چَون نوں صحیح ثابت کیتا ہووے جہدوں میرٹ دی بجائے پسندناں پسند تے فیصلے کیتے جاون تاں فیررینکنگ وچ بہتری کویں آسکدی اے۔

کوچ لبھن دا معاملا ہووے یاں کپتانی، ہرکھیتر وچ سیاسی پسند نوں ساہمنے رکھیا جاوندااے کجھ لوکی تاں سمجھدے نیں کہ کرکٹ دے فیصلے سینیٹر فیصل تے اوہناں دے حواری کردے نیں پرچی مافیا دے کھڈاری ، حق دار کھڈاریاں دا حق وی ماردے نیں تے فیر ہار توں کویں بچیا جاسکدااے۔

کھیڈ دے میداناں وچ سیاست تے بدعنوانی ڈھکی چھُپی نہیں لمے چِر توں فلیٹ تے اماراتی میداناں چے پریکٹس کردے کھڈاری گھاہ والے میداناں توں گھابردے نیں ایہناں دی بلے بازی تکنیک اجوکے ویلے دی کھیڈتوں بوہت پرے اے، ہندوستانی تے آسٹریلیائی بلے بازاں دی کامیاب تکنیک پِچھے بہترین کوچنگ دا ہتھ اے جہنوں سائنسی بُنیاد تے اُساریا گیا اے کھیڈاں دے بارے جانکاری رکھن والے سمجھدے نیں کہ ہر چنگا کھڈاری ، ضروری نہیں کہ اوہ چنگا کوچ وی ہووے ایہ اک پوری سائنس اے جہنوں سمجھن لئی تگڑے اعصاب، نفسیات تے کھیڈاں تے بھرواں عبور ہونا چاہیدا اے جے اسیں اپنے کرکٹ بورڈ ول جھات پائیے تاں اک گل بلکل صاف اے کہ ساڈے ایتھے پروفیشنلزم دی گھاٹ اے سیاسی تے مذہبی رسوخ بہت زیادا اے تے فیر کویں ہوسکدا اے کہ کھیڈ دے میداناں وچوں کوئی خیر دی خبر آوے۔

کُجھ دن پہلاں پی ایس ایل دا میلا سجیا جتھے اک پاسے نصیبولعل دے پنجابی ، انگریزی گانے تے سوشل میڈیا راہیں پوسٹ مارٹم کیتا گیا تے دوُجے پاسے اندرون سندھ دے اک نوجوان فاسٹ بالر دی سادگی دا مزاق وی اُڈایا گیا ایہناں رویاں توں لگدا اے کہ اسیں زہنی غلامی دی اوس دلدل وچ پھس چُکے آں جتھے نصیبو نوں پنجابی انگریزی دے فیوژن دی اجازت نہیں کیوں جے اوہدا اشرافیا نال سنبندھ نہیں سندھ دے دھانی دے پنڈ تے سادگی اُتے ،،شغل،، لاونا ،،مابنگ اتے بُلی اِنگ،، اے کیہ پی سی بی انتظامیا ولوں کوئی وضاحتی بیان یاں حوصلا افزائی دی خبر نکلی۔

البتا کجھ پروگریسو میڈیا تے بی بی سی ورگے اداریاں نیں اگے ودھ کہ اوہ کم کیتا اے جہڑا سانوں کرنا چاہیدا اے

کسے نوں جھگ کے ، تکلیف دے کے ، مزاق اُڈا کے ، سانوں سکون کویں مِل دا اے ؟ کیہ اسیں سبھ اذیت پسند ہوگئے آں خش رہنا تے دُوجیاں دی خشیاں دا کارن بھُل گئے آں۔

کُجھ دن پہلاں پنجابی دی وڈیسنگر نصیبولعل اک انٹرویودوران جذباتی ہوگئیں تے ڈِگدے اتھروواں نوں پُونجھدیاں دسیا کہ موسیقار تے پروڈیوسر چاہوندے نیں کہ اجہے گانے گاون جہناں نوں سماج وچ ،،ٹیبو،، سمجھیا جاوندا اے پہلی وار کسے (پی سی بی) نے اوہناں کولوں کوئی اینتھم گوایا اے۔

کیہ اسیں سبھ ایس دے ذمے دار نہیں ؟ آؤ، رل مِل اپنی زبان بولیے تے اپنے کھڈاریاں دا حوصلا ودھائیے۔

٭٭٭٭٭