kraamaat@gmail.com
+ +92 333-430-6384


کوار گندل…… اَن گنت فایدیاں والا جادوئی بوٹا ---٭رویل لیکھ٭


ابو نیلوفر February 28, 2021


کوار گندل یاں ایلو ویرا ساڈے ایتھے بہت عام بوٹا اے۔ ایہنوں گھراں وچ خوبصورتی واسطے وی لایا جاندا اے تے دوائی وجوں وی۔ عام کر کے گھر دیاں عورتاں ویڑھے دے اک کونےگملے یاں فیر ہانڈی وچ اک ادھا بوٹا لا دیندیاں نیں جو اپنی تھاں پیا رہندا اے۔ ایہنوں پانی دی وی کوئی اینی لوڑ نہیں ہوندی تے سخت جانن ہون پاروں موسمی سختیاں وی جھل لیندا اے۔ بوٹا پکیرا ہون اُتے ایہدے وچوں گندل نکلدی اے جہدے نال جوگیے رنگ دے پھل لگدے نیں۔

کوار گندل نوں صحت تے فایدیاں تے ڈاکٹری ورتوں لئی لمے چراں توں ورتیا جا رہیا اے۔ بعض واری ایہنوں جادوئی بوٹے دے ناں نال سدیا جاندا اے۔ ایہ نکے تنے والا بوٹا اے جہدے پتے وڈےکھڑے کھڑے تے گودا بھرے ہوندے نیں ایہ 500 پانی جوڑ(succulent) پھُل دار بوٹیاں وچوں اک اے۔ جڑاں وچوں بہت سارے بچے نکلدے رہندے نیں جہناں نوں پٹ کے وکھرا لا دیو تاں نواں بوٹا بن جاندا اے۔

کوار گندل دے پتے آکڑے ہوئے تے اندروں گودے دار ہوندے نیں۔ ایہ گودا یاں ملائی ای ایہدا اصل تت ہوندا اے جہدے ان گنت فایدے دسے جاندے نیں۔ شمالی افریقی دیساں وچ ایہ آپ اُگنا ہوندا اے۔ کوار گندل دے فایدیاں بارے جہڑے دعوے کیتے جاندے نیںاوہناں وچوں کجھ ساینس دی کھوج پاروں جھٹھیائے جا چکے نیں۔ ایہدے باوجود رہندے فایدیاں دی تھوڑ نہیں۔ایتھے اسیں ایہدے کجھ اجہے فایدیاں دی گل کراں گے جہڑے کھوج نے ثابت کر دتے ہوئے نیں۔

٭ دند تے سُجے ہوئے مسوڑھے:

ساینس مطابق دنداں لئی کوار گندل دا گودا کسے چنگے ٹوٹھ پیسٹ نالوں ودھ کے فایدے مند اے۔ ایہ دنداں وچ کھوڑ بنن توں وی بچاء کردا اے۔ تجربے پاروں کوار گندل دے گودے دے مقابلے اُتے دو مختلف ٹوتھ پیسٹ ورتائے گئے تے ثابت ہویا کہ کوار گندل دا گودا اوہناں دوہاں نالوں ودھ کے فایدے مند سی۔ ایہنے کھوڑ بنن توں روکن توں وکھ دنداں دے بکٹیریا وی مارے۔ ایہ وی پتا لگیا کہ گودامونہ دی تیزابیت پاروں پیدا ہون والے مسئلیاں نوں وی گھٹاندا اے۔

٭ قبض تے معدے دے روگ:

قبض نوں روگاں دی ماں آکھیا جاندا اے۔ جرمنی دی جڑی بوٹیاں دی اتھارٹی نے قبض دے علاج لئی ایہدے گودے دی سو توں دو سو ملی گرام خوراک دی سفارش کیتی اے۔ مستقل قبض ہووے تاں ایہدا گودا پانی وچ رلا کے یاں اُنج ای سادا دس دناں تیکر ورتیا جاوے۔

٭ ذیابیطس پاروں پیراں دے زخم

ذیابیطس دے روگیاں نوں پیراں دا بہت خیال رکھنا پیندا اے۔ پیراں وچ معمولی جہیا انفیکشن وی ودھ کے پیر کٹن تیکر اپڑا دیندا ا۔ بھارت وچ ہون والی اک ریسرچ پاروں پتا لگیا اے کہ کوار گندل دا گودا زخماں نوں ٹھیک کرن وچ وی مدد دیندا اے تے حیران کرن دی حد تیکر فایدے مند اے۔

٭ ساڑ دے زخماں توں بچاء

اگ نال سڑن توں ہون والے زخماں توں بچاء لئی وی ایلوویرا دا گودا فایدے مند اے۔ سڑن والی تھاں اتے ایہدا گودا مل دیو تاں بہترین ملھم ثابت ہوندا اے۔ گرم پانی یاں چاہ ڈلھن نال زخم بنن تاں وی ایہدی ورتوں کروچھالے یاں آبلے نہیں بنن گے تے بعد وچ کھل اُتے نشان وی نہیں رہوے گا۔

٭ جسم دے حفاظتی نظام وِچ وادھا

جسم دے مدافعتی تے حفاظتی نظام لئی وی کوار گندل بہترین اے۔ بدہضمی وچ مدد دیندا اےہر قسم دی کھلڑی لئی لابھ دائیک اے۔ کھلڑی دی تازگی لئی تاں ایہنوں صدیاں توں ورگیا جا رہیا اے۔ ایہدی مالش کیتی جاندی اے تے ایہدا گودا جسم وچ جذب ہو جاندا اے تیل وانگوں چپچپا نہیں کردا۔ ایہ بہترین کنڈیشنر وی اے۔ اک ریسرچ توں ثابت ہویا اے کہ ایہدا گودا تے اوہدے اُتلی پتراں دی کھلاکو جہے اینٹی آکسیڈنٹ نیں۔ کوریا وچ ہون والی اک کھوج توں ایہ وی پتا لگیا کہ ایہ الٹراوائلٹ تابکاری توں وی بچاندا اے۔

٭ ڈپریشنیادداشت تے حافظا

چوہیاں اُتے کیتی گئی اک تحقیق توں پتا لگیا کہ ایلوویرا ڈپریشن نوں وی گھٹاون وی مددگار ثابت ہو سکدا اے۔ جد کہ ایہدے نال حافظا وی تیز ہوندا اے۔ چھیتی ای ایہ تجربے انساناں اُتے وی کیتے جاون گے۔

٭ ورتن ڈھنگ

ایلوویرا نوں کئی انداز نال ورتیا جا سکدا اے۔ جسم دے باہر ایہنوں مالشملھم لئی وی ورتیا جا سکدا اے۔ اندرون واسطے خوراکی ڈھنگ نال وی۔ سوجی نال رلا کے ایہدا حلوا تیار کر کے کھادا جاوے تاں جوڑاں دے درد تے ہور جسمانی درداں لئی مفید اے۔ شکنجوی وچ ننبو تے مٹھے دے نال نال ایہدا اک انچ گودا فی گلا س پا دیو تاں شربت دے فایدے ودھ جاندے نیں۔ ایہنوں اُنج وی کھادا جا سکدا اے۔ قیمے دے نال سالن پکا کے وی کھادا جاندا اے۔ ایہدا سالن سوادی ہوندا اے۔

٭٭٭٭٭