kraamaat@gmail.com
+ +92 333-430-6384


کرونا دی تیجی لہر سبھ توں ودھ پنجاب وچ ہلاکتاں،2664نویں کیسز……٭رویل خبر٭


نمائندا رویل March 15, 2021


اسلام آباد (نیوز ڈیسک) ملک وچ کرونا وباء دی تیجی لہر نے شدت اختیار کر لئی اے تے پچھلے 1 دن وچ ایس وباء نال ہور 32 مَوتاں جد کہ 2 ہزار 664 نویں کیسز ساہمنے آئے نیں۔ نیشنل کمانڈ اینڈ اپریشن سینٹر ولوں جاری آنکڑیاں دے مطابق پچھلے 24 گھنٹیاں دے دوران ملک وچ 40 ہزار 564 کرونا ٹیسٹ کیتے گئے‘ ایس طرحاں ملک وچ ہُن تک کیتے گئے کووڈ 19 ٹیسٹاں دی گنتی 94 لکھ 85 ہزار 702 ہو گئی اے۔ وسیلیاں مطابق کرونا وباء نال تصدیق شدا مَوتاں 13 ہزار 508 ہو گئیاں اے۔ پنجاب وچ کرونا وباء سبھ توں ودھ ہلاکت خیز ثابت ہو رہی اے جتھے ایس وباء نال واصل ہون والے بندیاں دی گنتی 5 ہزار 753ہو گئی اے۔ دوجے پاسیکرونا دے ودھدے کیسز دی وجھا توں پارلیمنٹ ہاؤس نُوں 3 دن لئی بند کر دِتا گیا اے۔ 18 مارچ نُوں سینیٹ تے قومی اسمبلی سیکریٹریٹ 50 فیصد حاضری دے نال کھلن گے‘ قومی اسمبلی سیکرٹریٹ دے شعبا انتظامیا ولوں اِک اعلامیا جاری کیتا گیا اے۔ اعلامیے دے مطابق کرونا دا ممکنا کھلار روکن لئی قومی اسمبلی سیکرٹریٹ تے سینیٹ سیکرٹریٹ دے دفاتر 3 دن لئی بند کرن دا فیصلا کیتا گیا اے۔ اعلامیے وچ دَسیا گیا اے کہ قومی اسمبلی دی قائما‘ پبلک اکاؤنٹس تے خصوصی کمیٹیاں دے سارے اجلاس منسوخ کر دِتے گئے نیں جد کہ قومی اسمبلی دے دفتراں نُوں 16 مارچ تک بند رکھیا جاوے گا۔ اعلامیے دے مطابق سی ڈی اے نُوں جراثیم کش دوائیاں نال سارے دفتراں نُوں ڈِس انفیکٹ کرن دی ہدایت کیتی گئی اے تے عملے نُوں وی کرونا وایرس دیاں علامتاں دی صورت وچ فوری ٹیسٹ کروان دیاں ہدایتاں جاری کیتیاں گئیاں نیں۔ 17 مارچ توں متعلقا افسران ضروری سٹاف نُوں آفس بلا سکن گے تے 18 مارچ توں دفتری ویلا 10 توں 4 وجے تک ہون گے جد کہ قومی اسمبلی سیکرٹریٹ وچ داخلے لئی ماسک لازمی متھ دِتا گیا اے۔ انتظامیا اُتے زور دِتا گیا اے کہ کرونا پازیٹو عملا رپورٹاں اسٹیبلشمنٹ برانچ نُوں گھلے‘ قومی اسمبلی سیکرٹریٹ دا عملا دفتر وچ مسک لازمی پائے۔ قومی اسمبلی سیکرٹریٹ دے عملے اُتے ہتھ ملان تے گلے ملن اُتے پابندی عاید کر دِتی گئی۔ ایس حوال توں اعلامیے وچ کہیا گیا اے کہ قومی اسمبلی ملازمین کرونا ایس او پیز اُتے سختی نال عملدرآمد کرن‘ قومی اسمبلی سیکرٹریٹ دی ٹرانسپورٹ سروس تاحکم ثانی بند کر دِتی گئی۔ایس توں وکھ کرونا دے ودھدے کیسز دی وجھا توں راجدھانی دے 3 سب سیکٹرز نُوں اج رات توں سیل کر ن دا فیصلا کیتا گیا اے۔ ڈپٹی کمشنر اسلام آباد حمزہ شفقات دا کہنا اے کہ سیکٹر ایف الیون 1 وچ 51‘ آئی ایٹ 4 وچ 54 جد کہ سیکٹر آئی ٹین ٹو وچ کرونا دے 48 کیسز ساہمنے آئے نیں‘ ایس صورتحال دے پیش نظر تِناں سب سیکٹرز نُوں اج رات توں سیل کیتا جا رہیا اے۔ حمزہ شفقات نے کہیا کہ کرونا وباء دے پیش نظر تجارتی مراکز تے تفریحی پارکاں جمعے‘ ہفتے تے ایتوار نُوں بند رہن گیاں جد کہ دفتراں وچ 50 فیصد توں ودھ عملا بلان دی اجازت نہیں ہووے گی۔