رمضان توں پہلاں ای کھنڈ دے بھاء وچ انھا وادھا، شہراں وچ کھنڈ دی قیمت 100 رُپئے فی کلو توں ٹپ گئی……٭رویل خبر٭

اسلام آباد (نیوز ڈیسک) کھنڈ دیاں قیمتاں وچ اِک واری فیر وادھا ساہمنے آیا اے‘ ملک دے10 وڈے شہراں وچ کھنڈ دی قیمت 100 رُپئے فی کلو توں ٹَپ گئی اے‘ کراچی وچ کھنڈ سبھ توں مہنگی ہو گئی اے تے ایہدی قیمت 110 رُپئے فی کلو تک جا اپڑی اے‘ اسلام آباد تے راولپنڈی وچ کھنڈ 105 رُپئے‘ کوئٹہ‘ بہاولپور‘ سیالکوٹ‘ ملتان تے پشاور وچ 100 رُپئے فی کلو ویچی جا رہی اے۔ملک د ے ہور شہراں وچ وی کھنڈ دیاں قیمتاں وچ وادھا ریکارڈ کیتا گیا اے۔ لوکائی کھنڈ یاں قیمتاں وچ انھے وادھے توں سخت پریشان اے۔ رمضان دی آمد اُتے حکومت ولوں کھنڈ تے لوڑی دیاں شیواں دیاں قیمتاں نُوں کنٹرول کرن دی کوشش کیتی جاندی اے پر پی ٹی آئی سرکار کھنڈ دیاں قیمتاں کنٹرول کرن وچ ناکام ہو گئی اے۔