پوری دنیا وچ پنجاب دی ثقافت نُوں پسند کیتا جاندا اے، وزیر اعلا آفس وچ اُچیچی تقریب……٭رویل خبر٭

لاہور (نیوز ڈیسک) پنجاب کلچر دیہاڑ دے حوالے توں وزیر اعلا آفس وچ خصوصی تقریب منعقد ہوئی۔ وزیر اعلا پنجاب سردار عثمان بزدار اُچیچے پروہنے سن۔ تقریب وچ رلتی پروہنیاں نُوں پنجاب دی روایتی پگ پوائی گئی۔ وزیر اعلا عثمان بزدار نُوں صوبائی وزیر ثقافت خیال احمد کاسترو نے پنجاب دی روایتی پگ پوائی۔ وزیر اعلا عثمان بزدار نے صوبائی وزیر ثقافت خیال احمد کاسترو تے وزیراعظم دے مشیر بیرسٹر شہزاد اکبر نُوں پنجاب دی پگ پوائی۔ وزیر اعلا عثمان بزدار نے ایس موقع اُتے کہیا کہ پنجاب دی ثقافت تے روایتاں دے رنگ دل آویز نیں تے پوری دنیا وچ پنجاب دی ثقافت نُوں پسند کیتا جاندا اے۔ پنجاب دی ثقافت دیاں جڑاں تواریخ وچ پیوست نیں۔ پوری دنیا وچ پنجابی ہر تھاں اپنی وکھری شناخت رکھدے نیں۔ اوہناں نے کہیا کہ ثقافت تے روایتاں نُوں یاد رکھنا زندا دلی دی علامت اے۔ ثقافتی تہوار ہر علاقے دی پچھان تے انفرادیت نُوں ظاہر کردا اے۔ کرونا دے نویں ایس او پیز دے تحت ثقافتی سرگرمیاں نُوں فروغ دے کے لوکائی نُوں تفنن طبع دے موقع فراہم کر رہے آں۔ پنجاب کثیرالجہتی ثقافتاں دا مرکز ا تے ایہو پنجاب دی انفرادیت اے۔ محبت‘ امن‘ بھائی چارے‘ ایکے تے روا داری پنجاب دی ثقافت دے نمایاں رنگ نیں تے ثقافت نال جُریاں رہن والیاں قوماں ای اگے ودھدیاں نیں۔ وزیر اعلا عثمان بزدار نے کہیا کہ پنجاب کلچر دیہاڑ مناون دا مقصد محبت‘ بھائی چارے تے ایکے نُوں عام کرنا اے۔ پنجاب دی ثقافت وچ محبت‘ پیار‘ خلوص تے بھائی چارے دے خوبصورت رنگاں دی آمیزش شامل اے۔ پنجاب دی مٹی توں پیار‘ محبت‘ پروہنکاری تے اخلاق دی خشبو آندی اے۔ اوہناں نے کہیا کہ پنجاب دی ثقافت نُوں متعارف کروان وچ محکما اطلاعات تے ثقافت دا کردار تحسین جوگ اے۔ تقریب وچ وزیراعظم دے مشیر بیرسٹر شہزاد اکبر‘ صوبائی وزیرثقافت خیال احمد کاسترو‘ ایڈیشنل چیف سیکرٹری ارم بخاری‘ سیکرٹری اطلاعات تے ثقافت راجا جہانگیر انور‘ ڈی جی پی آر ثمن رائے‘ ڈی جی پلاک صغریٰ صدف‘ ایگزیکٹیو ڈائریکٹر الحمرا ہال ڈاکٹر اسلم ڈوگر‘ ڈائریخٹر الحمرا آرٹس کونسل ذوالفقار ذلفی‘ ایگزیکٹو ڈائریکٹر پکار رضوان شریف‘ ڈائریکٹر لاہور میوزیم اعجاز منہاس تے سنبندھت لوکاں نے رلت کیتی۔