الیکشن کمیشن  مستعفی ہو جائے: شفقت محمود‘ شبلی فراز تے فواد چودھری دی سانجھی پریس کانفرنس……٭رویل خبر٭

اسلام آباد (نمایندا رویل) حکومت نے الیکشن کمیشن آف پاکستان توں مستعفی ہون دا مطالبا کر دِتا۔ وفاقی وزیراں شفقت محمود‘ شبلی فراز تے فواد چودھری نے سانجھی پریس کانفرنس کیتی۔ شفقت محمود نے کہیا کہ شہباز گل اُتے حملے تے تشدد دی ڈاڈھی مذمت کردے آں‘ سیاست وچ تشدد دھمکی ن لیگ دی پرانی روایت اے‘ مسلم لیگ ن دی صدارت اُتے نواز شریف نے ایسے طرحاں قبضا کیتا‘ ایہناں لوکاں نے سپریم کورٹ اُتے حملا کیتا سی‘ ڈی چوک اُتے ایہناں نے جان بُجھ کے تماشا لایا‘ ن لیگ نُوں سوچنا چاہید ااے کہ اوہ سیاست نُوں کہڑے پاسے لے کے جا رہے نیں‘ ایہناں حرکتاں نال ن لیگ والیاں دی مایوسی نظر آ ندی اے۔ شفقت محمود نے کہیا کہ سینیٹ الیکشن جدوں دے ہور رہے نیں ہر وار ویچ وٹک دیاں گلاں ہوندیاں نیں‘ وزیراعظم عمران خان نے پہلے دن توں اوپن بیلٹنگ دا مطالبا تے کوشش کیتی اے‘ نواز شریف نے اپنی حکومت وچ اوپن بیلٹ لیان دی گل کیتی تے سیاسی اختلافات دے باوجود اسیں حمایت کیتی‘ عمران خان چاہندے نیں سیاست توں پیسے دا کردار ختم کر کے شفافیت لیاندی جاوے۔ شفقت محمود دا کہنا سی کہ اسیں پارلیمنٹ وچ بل تے آئینی ترمیم لیائے‘ سپریم کورٹ تک گئے‘ سپریم کورٹ نے کہیا آئینی ترمیم ضروری پر الیکشن کمیشن نُوں اپنی ذمے داری ادا کرنی چاہیدی اے‘ ساڈا اِک وفد سپریم کورٹ دے فیصلے دی روسنی وچ الیکشن کمیشن گیا‘ اسیں الیکشن کمیشن توں استدعا کیتی کہ بیلٹ پیپر ایہو جہیا بنان جہڑا لوڑ پین اُتے چیلنج کیتا جا سکے‘ ویڈیو وچ ساریاں نے ویکھیا کہ کویں ووٹ خریدن دی کوشش کیتی گئی۔ شفقت محمود نے کہیا کہ اج صورتحال ایہ اے ہر سیاسی جماعت سینیٹ الیکشن توں مطمئن نہیں‘ ایہ ساریاں شیواں عمران خان دے موقف دی تائید کردیاں نیں‘ ایہ ناکامی الیکشن کمیشن آف پاکستان دی اے‘ الیکشن کمیشن اپنی ذمے داری ادا کرن وچ مکمل ناکام ہو چُکیا اے‘ ایہدے اُتے کسے نُوں اعتماد نہیں رہیا‘ سانوں بطور حکمران جماعت الیکشن کمیشن اُتے کوئی اعتماد نہیں‘ الیکشن کمیشن نُوں بحیثیت مجموعی طور اُتے اپنیاں ذمے دارایں توں دستبردار تے مستعفی ہو جانا چاہیدا اے‘ نواں الیکشن کمیشن بنایا جاوے جہدے اُتے ساریاں نُوں اعتماد ہووے‘ اسیں سارے رَل کے ایس گل نوں یقینی بنائیے کہ اگلے الیکشن شفاف ہون جہدے اُتے کوئی اواز نہ چُکے۔ شفقت محمود نے ہور کہیا کہ عمران خان کرکٹ و چ وی نیوٹرل امپائر لے کے آئے‘ الیکشن کمیشن نُوں نیوٹرل ہونا چاہیدا اے‘ پر موجودا الیکشن کمیشن نیوٹرل نہیں‘ فی الحال الیکشن کمیشن دے خلاف سپریم جوڈیشل کونسل وچ ریفرنس دایر کرن دا ارادا نہیں۔