کرونا دے وار:دیس وچ29بندیاں دی جان لے لئی2253نویں کیسز: نیشنل کمانڈ اینڈ کنٹرول سینٹر ولوں آنکڑے جاری……٭رویل خبر٭

اسلام آباد (نمایندا رویل) ملک وچ کرونا دے ہور 2253 کیسز ساہمنے آ گئے جد کہ ایس وباء نے 29 بندیاں دی جان وی لے لئی اے۔ نیشنل کمانڈ اینڈ کنٹرول سینٹر ولوں جاری آنکڑیاں دے مطابق پچھلے 24 گھنٹیاں دے دوران 44 ہزار 61 بندیاں دے کرونا ٹیسٹ کیتے گئے‘ ایس طرحاں ہُن تک کرونا دی تشخیص لئی 95 لکھ 29 ہزار 763 ٹیسٹ کیتے جا چکے نیں۔ پچھلے 24 گھنٹیاں دے دوران پورے ملک وچ کرونا دے ہور 2 ہزار 253 مثبت کیسز ساہمنے آئے نیں۔ ایس طرحاں ملک وچ کرونا دے مجموعی مصدقا کیسز دی گنتی 6 لکھ 7 ہزار 453 ہو گئی اے۔ سندھ 2 لکھ 61 ہزار 411 کیساں نال پہلے تے پنجاب 1 لکھ 86 ہزار 659 کیساں نال دوجے نمبر اُتے اے۔ پچھلے 24 گھنٹیاں دوران ملک وچ کووڈ 19 دے ہور 29 بندے زندگی ہار گئے نیں‘ ایس طرحاں ملک وچ واصل ہون والیاں دی گنتی 13 ہزار 537 ہو گئی اے۔ سرکاری آنکڑیاں مطابق ملک وچ کرونا دے ہور 1 ہزار 307 بندیاں نے ایس وباء نُوں شکست دِتی اے‘ ایس طرحاں مصدقا صحتیاب روگیاں دی گنتی 5 لکھ 71 ہزار 878 ہو گئی اے۔ کرونا دے کارن سبھ توں ودھ مَوتاں پنجاب وچ ہوئیاں نیں جتھے 5 ہزار 769 بندے جان دی بازی ہار چکے نیں۔ملک وچ کرونا دے فعال روگیاں دی گنتی 22 ہزار 38 اے‘ جہناں وِچوں 1 ہزار 823 دی حالت ماڑی اے۔