جنوری، فروری وچ مہنگائی گھٹ جائے گی:حفیظ شیخ____رویل

اسلام آباد(نمائندا رویل)وزیراعظم عمران خان دے مشیر برائے خزانا عبدالحفیظ شیخ نے آکھیا اے کہ آؤندے ورھے جنوری، فروری وچ مہنگائی گھٹ ہو جائے گی۔ معاشی ٹیم نال پریس کانفرنس کردے ہوئے عبدالحفیظ شیخ نے آکھیا کہ چالو حکومت میرٹ اُتے آئی اے۔ مشیر خزانا نے ہور آکھیا کہ چالو مالی سال دے پہلے چار مہینیاں وچ براہ راست غیر ملکی سرمایا کاری وچ 238فیصد وادھا ہویا۔ اوہناں نے آکھیا کہ ٹیکس گوشوارے جمع کران والیاں دی گنتی وچ 50فیصد وادھا ہویا۔ عبدالحفیظ شیخ نے ایہ وی آکھیا کہ حکومت چاہندی اے کہ لوکاں نوں نوکریاں ملن تے ملک وچ روزگار پیدا ہوئے۔ اوہناں دا آکھنا سی کہ حکومت نے گھٹ آمدن والے بندیاں نوں تعمیرات لئی سبسڈی دین دا فیصلا کیتا اے۔