kraamaat@gmail.com
+ +92 333-430-6384


سَت ارب دا رمضان پیکج،313رمضان بازار لائے جاون:عثمان بزدار……٭رویل خبر٭


نمائندا رویل March 16, 2021


لاہور (نمایندا رویل) وزیر اعلا پنجاب سردار عثمان بزدار نے صوبے دی لوکائی نُوں ریلیف دین لئی 7 ارب رُپئے دے رمضان پیکج دا اعلان کر دِتا۔ عثمان بزدار دی صدارت ہیٹھ کابینا کمیٹی دا خصوصی اجلاس ہویا‘ جہدے وچ رمضان پیکج دے حوالے توں اقدامات دا جایزا لیا گیا۔ اِک بیان وچ عثمان بزدار نے کہیا کہ 7 ارب دے رمضان پیکج دے تحت صوبے وچ 313 رمضان بازار لائے جان گے۔ اوہناں نے کہیا کہ آٹے دا 10 کلو دا تھیلا رمضان بازاراں وچ مارکیٹ پرائس توں 120 رُپئے سستا ملے گا۔ وزیر اعلا پنجاب نے اعلان کیتا کہ رمضان بازاراں وچ 10 کلو آٹے دا تھیلا 300 رُپئے وچ دستیاب ہووے گا‘ صرف سستے آٹے دی فراہمی اُتے پنجاب حکومت تقریبن 3 ارب 50 کروڑ رُپئے سبسڈی دیوے گی۔ اوہناں دا کہنا سی کہ رمضان بازارں ا وچ کرونا ایس او پیز اُتے عملدرآمد یقینی بنایا جاوے گا۔ خریداراں دیاں زندگیاں دے تحفظ لئی سماجی فاصلے برقرار رکھنا لازمی ہووے گا۔ عثمان بزدار نے ہور کہیا کہ رمضان بازارں وچ زرعی فیئر پرائس شاپس لائیاں جان گیاں‘ جہناں اُتے پھَل تے سبزیاں 2018 دے ریٹ مطابق صارفین نُوں دستیاب ہون گیاں۔ اوہناں نے ایہ وی کہیا کہ ایہناں رمضان بازاراں وچ دال چنا‘ بیسن‘ کھجور تے ہور لوڑی دیاں شیواں وی 2018 دے بھاء اُتے ملن گیاں‘ ایہناں بازاراں وچ کھنڈ 60 رُپئے کلو وچ دستیاب ہووے گی۔ وزیر اعلا پنجاب نے کہیا کہ گھیو‘ چکن تے آنڈے مارکیٹ توں 10 توں 15 رُپئے گھٹ قیمت اُتے رمضان بازاراں وچ ملن گے۔ اوہناں نے رمضان دے مہینے وچ لوکائی نُوں ودھ توں ودھ ریلیف دین دی ہدایت کیتی تے کہیا کہ لوکائی نُوں مستقل بنیاداں اُتے ریلیف دین لئی سہولت بازاراں دا دایرا کار وسیع کیتا جاوے گا۔ عثمان بزدار نے رمضان بازاراں دے حوالے توں سہولت بازار اتھارٹی ے قیام دی ہدایت کیتی تے کہیا کہ سہولت بازاراں راہیں اپنی لوکائی نُوں مصنوعی مہنگائی توں مستقل نجات دلواواں گا۔ اوہناں نے ہدایت کیتی کہ رمضان بازاراں دے انتظامات وچ خصوصی بچت تے کفایت شعاری کیتی جاوے تے ایہناں بازارں دے انتظامات وچ گھٹ توں گھٹ اخراجات کیتے جان۔ وزیر اعلا پنجاب نے ہور کہیا کہ انتظامی اخراجات توں بچائی گئی رقم نُوں لوکائی نُوں ہور ریلیف دین لئی خرچ کیتا جاوے‘ حکومت دا عزم اے کہ غریب بندے نُوں ہر صورت معاشی ریلیف دواں گے۔ اوہناں دا کہنا سی کہ رمضان بازار دا اغاز 25 شعبان توں کیتا جاوے‘ میں آپ رمضان بازاراں دے دورے کراں گا۔ عثمان بزدار نے کہیا کہ صوبائی وزراء تے سیکرٹریز وی لوکائی نُوں ریلیف فراہم کرن دے مشن وچ رمضان بازاراں دے دورے کرن گے۔