عدالتاں آخری امید بن چُکیاں،نیب ساڈیاں گلاں دی تصدیق کر رہیا اے:مولانا فضل الرحمان……٭رویل خبر٭

پشاور (نمایندا رویل) پی ڈی ایم دے آگو مولانا فضل الرحمان نے کہیا اے کہ سینیٹ الیکشن وچ اداریاں دی مداخلت نظر آ رہی اے‘ نیب ہور اداریاں دے ترجمان بن کے ساڈے مؤقف دی تصدیق کر رہیا اے‘ ہُن عدالتاں آخری امید بن چُکیاں نیں‘ لانگ مارچ اِک دن دا نہیں ہووے گا‘ استعفیاں دے آپشن اُتے غور کرر ہے آں۔ صوبائی سیکرٹریٹ مفتی محمود مرکز پشاور وچ پریس کانفرنس کردیاں ہویاں پی ڈی ایم دے آگو مولانا فضل الرحمان دا کہنا سی کہ مریم نواز نُوں دھمکیاں دِتیاں جا رہیاں نیں تے اوہناں دی ضمانت منسوخ کروان لئی نیب نے ہائیکورٹ نال رجوع کیتا جہدے وچ ناکام رہیا‘ کیہ نیب اداریاں دا ترجمان اے؟ نیب ہور اداریاں دا ترجمان بن کے ساڈے مؤقف دی تصدیق کر رہیا اے‘ ہُن عدالتاں آخری امید بن چُکیاں نیں۔ اوہناں نے کہیا کہ سینیٹ الیکشن وچ اداریاں دی مداخلت نظر آ رہی ا‘ چیئرمین سینیٹ دا الیکشن انجینیئرڈ سی‘ ساڈے جایز ووٹاں نُوں کیوں رَد کیتا گیا؟ تے ووٹ رَد ہون دا ملبا وی عدالتاں اُتے پا دِتا گیا اے‘ ڈپٹی چیئرمین سینیٹ 2 ارب رُپئے دے ڈیفالٹر نیں ایہناں نُوں الیکشن وچ حصا لین دی اجازت کیوں دِتی گئی؟ وفا داریاں کیوں تبدیل ہو رہیاں نیں‘ ایہدے پچھے دباء ہووے گا‘ لالچ یاں دھمکیاں ہون گیاں۔ ڈپٹی چیئرمین دے الیکشن دوران سارے ادار انھے ہو چکے سن۔ آگو پی ڈی ایم نے کہیا کہ ماضی وچ مختلف جماعتاں دے اراکین نے اپنے ووٹ نُوں غلط استعمال کیتا‘ کسے اِک ممبر دے دغے نال پارٹیاں دی پوزیشن تبدیل نہیں ہوندی‘ اپوزیشن جماعتاں متحد نیں‘ کل پی ڈی ایم دا اگوائی اجلاس ہووے گا‘ جہدے وچ لانگ مارچ بارے حتمی حکمت عملی طے ہووے گی‘ پارلیمنٹ توں استعفے نہیں دیندے تے لانگ مارچ دی افادیت نہیں ہووے گی‘ پی ڈی ایم دا لانگ مارچ اِک دن دا نہیں ہووے گا۔