مریم نواز دی فوری ضمانت منسوخی دی نیب درخاست رَد……٭رویل خبر٭

لاہور (نمایندا رویل) چیئرمین نیب دی ضمانت منسوخی دی درخاست اُتے لاہور ہائیکورٹ نے مسلم لیگ (ن) دی نائب صدر مریم نواز نُوں نوٹس جاری کر دِتا۔ پیر والے دن لاہور ہائیکورٹ وچ چیئرمین نیب دی مریم نواز دی ضمانت منسوخی دی درخاست اُتے سنوائی جسٹس سردار سرفراز ڈوگر دی اگوائی وچ 2 رکنی بینچ نے کیتی‘ عدالت نے مریم نواز دی چیئرمین نیب دی فوری ضمانت منسوخی دی درخاست رَد کردیاں ہویاں مریم نواز نُوں نوٹس جای کر دِتا تے اوہناں توں شق وار جواب منگ لیا۔ جسٹس سرفراز ڈوگر نے نیب پراسیکیوٹر سید فیصل رضا بخاری دے دلایل وچ مداخلت کرن اُتے برہمی دا اظہار کردیاں ہویاں کہیا کہ تُہاڈے سینئر پراسیکیوٹر چودھری خلیق الزمان جے عدالت وچ موجود نیں تے اوہی دلایل دین۔ نیب پراسیکیوٹر نے دلایل دا اغاز کردیاں ہویاں عدالت نُوں دَسیا کہ مریم نواز لاہور ہائیکورٹ توں چودھری شوگر ملز کیس وچ ضمانت اُتے رہا نیں تے سیاسی فایدا چُک رہے نیں‘ جہدے اُتے عدالت نے کہیا کہ مریم نوا ز نے کہڑے سیاسی فایدے چُکے نیں؟ ایہدے اُتے نیب پراسیکیوٹر نے کہیا کہ ضمانت اُتے رہا ہون دے بعد مسلسل ریاستی اداریاں اُتے حملے کر رہے نیں‘ اوہ میڈیا تے سوشل میڈیا راہیں وی ریاستی اداریاں خلاف بیان بازی کر رہے نیں تے ریاست مخالف پراپیگنڈا کرن وچ وی مصروف نیں۔ اوہناں نے کہیا کہ مریم نوا ز خلاف چودھری شوگر ملز سنے ہور انکوایریاں اُتے تحقیقات جاری نیں‘ ایہناں نُوں چودھری شوگر ملز وچ دستاویزات طلبی لئی 10 جنوری 2020 نُوں نوٹس گھلے گئے سن‘ پر ایہناں نے نیب دے نوٹسز اُتے کوئی توجا نہیں دِتی تے نہ مطلوبا ریکارڈ فراہم کیتا‘ ایہناں نُوں دستاویزات فراہم نہ کرن اُتے 11 اگست 2020 نُوں نوٹس گھلے گئے سن‘ پر ایہناں نے نیب دے نوٹسز اُتے کوئی توجا نہیں دِتی تے نہ مطلوا ریکارڈ فراہم کیتا‘ ایہناں نُوں دستاویزات فراہم کرن اُتے 11 اگست 2020 نُوں وی ذاتی حیثیت وچ سدیا گیا سی‘ پر ایہناں نے اپنی سیاسی طاقت دا ستعمال کیتا تے نیب آفس اُتے حملا کروا یا‘ ایناں دے کارکناں نے پولیس تے نیب آفس اُتے پتھراؤ کیتا جہدا مقدما وکھرا درج کیتا جا چکیا اے۔ جہدے اُتے عدالت نے ریمارکس دِتے کہ ایہ واقع کئی مہینے پہلاں پیش آیا اوس ویلے ضمانت منسوخی لئی عدالت نال رجوع کیوں نہیں کیتا‘ اینے عرصے بعد کیوں خیال آیا؟ نیب پراسیکیوٹر نے کہیا کہ جنرل ضمنی تے سینیٹ چوناں دی وجھا توں درخاست دایر نہیں کیتی جے انج کردے تے فیر کہیا جاندا دباء پایا جا رہیا اے۔ ایہدے اُتے معزز جج نے ریمارکس دِتے کہ نیب نُوں سیاست نہیں آئین قانون نُوں ساہمنے رکھنا چاہیدا اے۔ عدالت نے مریم نواز دی فوری ضمانت منسوخی دی نیب درخاست رَد کردیاں ہویاں مریم نواز نُوں 7 اپریل لئی نوٹس جاری کر دِتا تے اوہناں توں شق وار جواب منگ لیا اے۔