اپوزیشن دا دباء قبول کیتا نہ ای ہُن کراں گا،ودھدی مہنگائی دی فکر اے،فوجاں نُوں جنا مضبوط کراں گے اونا محفوظ ہوواں گے:وزیراعظم عمران خان ……٭رویل خبر٭

اسلام آباد (نیو ز ڈیسک) وزیراعظم عمران خان نے پی ڈی ایم دے لانگ مارچ دے ملتوی ہون اُتے تبصرا کردیاں ہویاں کہیا اے کہ اپوزیشن نُوں اوہدے حال اُتے چھڈ دِتا جاوے‘ اوہ جو مرضی کردے پھِرن سانوں پرواہ نہیں۔ سانوں لوکائی تے ودھدی ہوئی مہنگائی دی فکر اے تے ایس حوالے توں سنبندھت اداریاں تے وزارتاں نُوں اپنی کمکاری بہتر بنانی پوے گی۔ وسیلیاں دے مطابق وزیر اعلا عمران خان دی صدارت ہیٹھ سینئر وزیراں دا اِک اجلاس ہویا جہدے وچ ملک دی موجودا صورتحال دا تفصیلی جایزا لیا گیا۔ اجلاس دوران وزیراعظم نے پی ڈی ایم دے لانگ مارچ ملتوی ہون تے ایہدے قائدین وچکار اختلافات اُتے تبصرا کردیاں ہویاں کہیا کہ ایہ جو مرضی کر دے پھِرن مینوں ایہدی پرواہ نہیں‘ پہلے وی اپوزیشن دا دباء قبول کیتا تے نہ ای ہُن کراں گا‘ سانوں اپنی کمکاری بہتر بنانی پوے گی‘ لانگ مارچ ہو وی جاندا تے حکومت نُوں کوئی فرق نہیں پینا سی‘ میں ایہناں دے ساہمنے گوڈھے مودھے مارن والا نہیں آں‘ وزیراعظم نے کہیا کہ ودھدی ہوئی مہنگائی ساڈے لئی اِک وڈا مسئلا اے‘ ایس حوالے توں متعلقا اداریاں تے وزارتاں نُوں ککاری وکھانی پوے گی تے ہُن ایس معاملے وچ کسے دے نال کوئی رعایت نہیں ہووے گی۔ متعلقا وزراء وی سن لین کہ اوہ لوکائی دی فلاح تے بہبود تے ایہناں دے مسئلیاں دے حل اُتے توجا دین‘ کرونا دے ودھدے کیسز دے باوجود پاکستان دی معیشت وچ بہتری دے آثار نیں پر سانوں رمضان المبارک توں پہلاں لوڑ ی دیاں شیواں دیاں قیمتاں چ جہڑا وادھا ہو رہیا اے اوہدے اُتے نظر رکھنی پوے گی‘ سنبندھت صوبائی حکومتاں وی ایس حوالے توں اپنیاں ذمے داری ادا کرن‘ وسیلیاں دے مطابق وزیراعظم نے پارلیمنٹ نُوں وی مؤثر عوامی قانون سازی لئی اپنا کردار ادا کرن اُتے زور دِتا۔ایس توں وکھ اسلام آباد وچ 2 دنا سیکیورٹی ڈائیلاگ دی افتتاحی تقیرب نال خطاب کردیاں ہویاں وزیراعظم نے کہیا کہ اوہ ملک کدی وی محفوظ نہیں ہو سکدا جتھے کجھ بندے امیر ہن تے غریباں دا سمندر ہووے‘ محفوظ اوہ ملک ہوندے نیں جتھے ساریاں نُوں یقین ہوندا اے کہ ایہ ساڈا ملک‘ ساڈی حکومت اے‘ ایس ملک وچ ساڈا وی مفاد اے‘ جدوں تک لوک اپنے ملک نُوں اپناندے نہیں اوہ محفوظ نہیں ہوندا۔ اوہنا دا کہنا سی کہ قومی سلامتی دا مطلب ایہ اے کہ اِک قوم دا کھڑا ہونا جہدا ایس گل اُتے یقین ہووے کہ ایس ملک نُوں بچان وچ ساڈا مفاد اے‘ ایس لئی ساڈی معیشت تے اشرافیا دا نظام کہ جہدے وچ کجھ ایلیٹس نُوں تحفظ مِلیا اے ایہ سبھ توں وڈا پیرا ڈائم شفٹ اے۔ وزیراعظم عمران خان نے ہور کہیا کہ غذائی تحفظ دے نال نال غربت ساڈے لئی سبھ توں وڈا چیلنج اے۔ خطے وچ امن لئی بھارت نُوں پہلا قدم لینا پوے گا۔ بھارت کشمیریاں نُوں حق خُد ارادیت دیوے‘ ایہ دوہاں ملکاں لئی فایدے مند اے۔ گوانڈھی ملکاں دے نال خشگوار تعلقات خارجا پالیسی دا حصا نیں۔ سیکیورٹی فورساں نے بے مثال قربانیاں نال ملک نُوں محفوظ بنایا۔ اسیں اپنیاں فوجاں نُوں جنا مضبوط کراں گے اونا محفوظ ہوواں گے۔ افغانستان وچ امن دے قیام لئی کوششاں کر رہے آں۔وزیراعظم نے کہیا کہ ساڈے ملک وچ ایس مباحثے دی بہت ضرورت اے کہ اصل وچ قومی سلامتی کیہ اے اسیں ہُن تک قومی سلامتی نُوں صرف اِک پہلو نال ویکھدے رہے آں کہ اسیں اپنیاں فوجاں نُوں جنا مضبوط کراں گے اونا محفوظ ہوواں گے پر اصل وچ قومی سلامتی وچ ایہو جہیاں شیواں مثلن موسمیاتی تبدیلیاں وی شامل نیں جو ایس توں پہلے کسے نے نہیں سوچیا‘ تجزیے موجودا نیں کہ خطریاں دا شکار پاکستان دیاں موسمیاتی تبدیلیاں ساڈیاں نسلاں لئی خوفناک شے اے تے مینوں فخر اے کہ ساڈی حکومت نے ایہدے اُتے اقدامات کیتے پر ایس توں پہلاں ایہنوں قومی سلامتی دے تناظر وچ کدی ویکھیا نہیں گیا‘ اسیں موسمیاتی تبدیلیاں نال نبڑن دی پوری تیاری کرنی اے۔دوجے پاسے وزیراعظم عمران خان نے سینیٹ چوناں وچ عدم شفافیت دے معاملے اُتے سپیکر قومی اسمبلی اسد قیصر نُوں خط لکھ دِتا جہدے وچ اوہناں نے پارلیمانی کمیٹی بنان دی درخاست کیتی اے۔ خط وچ وزیراعظم نے کہیا کہ چاہندے آں اگلیاں عام چوناں توں پہلاں ا نتخابی اصلاحات ہو جان‘ شفافیت نُوں برقرار رکھن لئی ٹیکنالوجی دا استعمال ضروری اے‘ حالیا سینیٹ چوناں وچ اِک واری فیر پیسا چلیا‘ میں ہر سطح اُتے شفاف چوناں لئی انتخابی اصلاحات دی گل کیتی‘ سینیٹ چوناں وچ میری جماعت نے اوپن بیلٹنگ دا مطالبا کیتا‘ اسیں قومی اسمبلی وچ بل لیائے تے سپریم کورٹ وی گئے جہدے اُتے سپریم کورٹ نے چوناں نُوں شفاف بنان دی ہدایت کیتی پر بدقسمتی نال الیکشن کمیشن اپنی ذمے داری ادا کرن وچ ناکام رہیا۔ اوہناں نے ہور کہیا کہ ووٹ دی شفافیت جمہوریت لئی ضروری اے کرپٹ پریکٹسز نُوں روکن لئی اصلاحات ضروری نیں۔