حکومت نُوں مسلسل پریشان رکھنا چاہندے آں،پی ڈی ایم وچ 9 جماعتاں اِک پاسے تے پیپلز پارٹی اِک پاسے اے:مولانا فضل الرحمان۔۔۔۔۔٭رویل خبر٭

پشاور (نیوز ڈیسک) آگو پی ڈی ایم مولانا فضل الرحمان دا کہنا اے کہ پیپلز پارٹی نے استعفیاں نال اتفاق نہیں کیتا اوہ جماعتاں دا احترام کرے۔ پشاور وچ تقریب نال خطاب کردیاں ہویاں پی ڈی ایم دے آگو مولانا فضل الرحمان دا کہنا سی کہ دنیا دے نظام تے انسانیت دی اجتماعی زندگی دا نظام قانون دے بغیر نہیں چلدا‘ ساڈے ایتھے قانون بنان دے ادارے موجود نیں تے قانون دے مطابق فیصلا دین لء عدالتاں موجود نیں‘ ساڈیاں عدالتاں انصاف فراہم کرن دے ایس معیار اُتے پورا اُتردیاں نیں۔ مولانا فضل الرحمان دا کہنا سی کہ ویلا لنگھن دے نال نال اسیں جلسے کیتے تے لوکاں دا جذبا ویکھیا تے لانگ مارچ دا اعلان کیتا‘ 10 وِچوں 9 جماعتاں دی رائے سی کہ لانگ مارچ اُتے استعفے دے کے جاواں گے‘ استعفے دیندے تے ادھا ایوان خالی ہو جاندا‘ پی ڈی ایم وچ 9 جماعتاں اِک پاسے تے پیپلز پارٹی اِک پاسے اے۔ آگو پی ڈی ایم نے کہیا کہ پیپلز پارٹی نے استعفیاں نال اتفاق نہیں کیتا ایس لئی اوہناں نُوں مہلت دِتی گئی اے کہ اوہ اپنا مؤقف سی ای سی دے ساہمنے رکھن‘ پیپلز پارٹی دے موقف دا انتظار اے اوہ 9 جماعتاں دی رائے دا احترام کرے۔ مولانا فضل الرحمان دا ہور کہنا سی کہ پی ڈی ایم متحد اے تے آپس وچ بحث ہوندی رہندی ا‘ کسے نقطے اُتے اختلاف وی ہوندا اے‘ پی ڈی ایم اجلاس دی اندرونی کہانی ظاہر کرنا بددیانتی اے‘ دو سال اسیں آرام نہیں کیتا‘ اسیں حکومت نُوں مسلسل پریشان رکھنا چاہندے آں۔ ساڈے ایجنڈے وچ ایہو جہیا کجھ نہیں لکھیا کہ استعفے ایٹم بم وانگوں آخری آپشن ہووے گا‘ ایہ اِک رائے سی۔مولانا فضل الرحمان نے پیپلز پارٹی نُوں مخاطب کردیاں ہویاں کہیا کہ جے ادھا ایوان خالی ہو گیا تے اوہناں نُوں ستعفے دینے پین گے‘ حکومت مخالف اپوزیشن ایکا پی ڈی ایم متحد اے‘ اختلاف رائے ہوندا رہندا اے‘ سانوں پیپلز پارٹی دے موقف دا انتظار اے‘ خدا کرے ایہناں نُوں سمجھ آ جاوے۔ اسیں پیپلز پارٹی نُوں اپنے نال رکھنا چاہنے آں۔ ایس توں پہلاں پی ڈی ایم دے آگو مولانا فضل الرحمان تے مسلم لیگ ن دے قائد نواز شریف دا ٹیلیفونک رابطا ہویا۔ دوہاں آگوواں نے پچھلے دن ہون والے پی ڈی ایم سربراہی اجلاس وچ آصف زرداری دے رویے اُتے دُکھ دا اظہار تے اگے دی حکمت عملی اُتے غور کیتا تے حکومت نُوں ٹف ٹایم دین اُتے اتفاق کیتا۔