ایڈیشنل سیشن جج ولوں کرکٹر بابر اعظم  خلاف مقدما درج کرن دا حکم……٭رویل خبر٭

لاہور (نمایندا رویل) ایڈیشنل سیشن جج نے قومی کرکٹر بابراعظم دے خلاف بلیک میل تے ہراساں کرن دے الزام اُتے ایف آئی اے وچ مقدمے دے اندراج لئی دایر درخاست اُتے مقدما درج کرن دا حکم دے دِتا۔ ایڈیشنل سیشن جج نے سوانی حامیزہ مختار دی درخاست اُتے سنوائی کیتی۔ سنوائی دوران ایف آئی اے سائبر کرائم نے اپنی رپورٹ عدالت وچ جمع کروائی۔ ایف آئی اے دی رپورٹ وچ دَسیا گیا کہ مدعیہ حامیزہ مختار نے ذکر کیتے نمبراں خلاف دھمکان‘ بلیک میل کرن تے نازیبا پیغامات گھلن بارے درخاست دِتی‘ انکوایری دے دوران مدعیا نُوں نوٹس جاری کیتا تے بیان ریکارڈ کیتا گیا‘ فراہم کیتے گئے نمبر مریم احمد‘ محمد بابر تے سلیمی بی بی دے ناں رجسٹرڈ سن‘ رجسٹرڈ نمبر دے مالکان نُوں نوٹسز جاری کر کے سدیا گیا‘ نوٹسز وچ الزام علیہان نُوں بیان ریکارڈ کرن تے موقف دین لئی سدیا گیا‘ الزام الہیان نُوں 3 وار نوٹس جاری کر کے سدیا گیا‘ بابراعظم وی انکوایری وچ شامل نہیں ہوء‘ بابراعظم دی تھاں اوہدا بھرا فیصل اعظم پیش ہویا تے بابراعظم دے پیش ہون لئی مہلت منگی‘ بابراعظم ہُن تک انکوایری وچ شامل نہیں ہوئے تے بیان وی ریکارڈ نہیں کروایا‘ رپورٹ وچ کہیا گیا اے کہ بابراعظم ایس معاملے وچ قصور وار پائے گئے نیں‘ سلیمی بی بی نے 3 نوٹسز وصول کرن دے باوجود اپنا بیان ریکارڈ نہیں کروایا‘ مریم احمد انکوایری وچ شامل ہوئے پر مدعیا نُوں پچھانن توں انکار کر دِتا‘ مریم احمد نے اپنے نمبر توں مدعیا نُوں نازیبا پیغامات گھلن توں انکاری دا بیان دِتا‘ مریم احمد نُوں اوہدا موبائل فرانزک لئی جمع کروان دا کہیا گیا جہڑا اوہناں نے نہیں دِتا۔ ایڈیشنل سیشن جج حامد حسین نے حامیزہ مختار دی درخاست اُتے فیصلا سناندیاں ہویاں ذمے داراں خلاف قانونی کارروائی مکمل کر کے مقدما درج کرن دا حکم دے دِتا۔