اُوڑا آیڑا ۔۔۔۔۔۔۔٭رویل فیچر سیوا٭

اُوڑا آیڑا ۔۔۔۔۔۔۔٭رویل لیکھ٭

چڑھدے پنجاب تے لہندے پنجاب وچ نویں پیڑھی وچ پنجابی زبان نوں اپناون دے حالات اِکو جہے ای نیں ایہ حالات اج دے پیدا کیتے نہیں نیں سگوں کئی ورھیاں توں انج ای چلدا آ رہیا اے جس کر کے نویں پیڑھی اپنی زبان نوں اپناون توں ہچکچاندی رہندی اے۔ جدوں میں ،اج توں 20 ورھے پہلاں اک کالج وچ پڑھدی ساں تاں اودوں وی بالاں نوں پنجابی پڑھن دی حوصلا شکنی کیتی جاندی سی ایہ صرف باہرلا سماج ای نہیں سگوں گھر دے اندروں وی اوس نوں کرڑی تنقید دا ساہمنا کرنا پیندا اے۔

ماں بولی دوواں پاسے ای خطرے وچ اے اِک نویں پنجابی فلم وچ ایسے گل نوں موضوع بنایا گیا اے ، ایس نوں" اُوڑا ایڑا" فلم وچ بڑے سوہنے ڈھنگ نال بیانیا گیا اے۔پنجابی زبان دے نال نال پرایویٹ تعلیمی اداریاں نے اپنا کیہ کردار ادا کیتا اے سماج واسیاں وچ اپنی سوچ نوں ودھاون لئی ایس دی وی سمجھ ایہ فلم ویکھ کے آندی اے۔ سرکاری سکولاں وچ پڑھن والا بال اپنے آل دوال تے سماج نوں سمجھ رہیا ہوندا اے کہ اوہدی ماں نوں شوق چڑھ جاندا اے کہ اوس دی اولاد انگریزی سکھے۔زبان سکھاون وچ یاں اوس توں دُور کرن وچ ماں دا کردار بہت ای ودھ ہوندا اے ایدھرلے پاسے وی ماں بولی توں دُور کرن والیاں وچ شہراں تے پِنڈاں دیاں ماواں نے اپنا حصا پایا اے ایس توں وکھ پرایویٹ سکولاں نے اپنی زبان توں دُور کیتا کیوں جے اوہناں دا مقصد اپنے "کاروبار" نوں چلانا ہوندا اے اوہناں نوں نہیں پرواہ کہ مادری زبان کیہ ہوندی اے تے ایس توں وانجھے ہوون کر کے کیہ نقصان ہوندے نیں۔ماواں دے نال نال پیوواں نے وی اپنی زبان نوں ہینا سوچنا شروع کر دتا اے دوواں پاسے ایہ حالات نیں۔۔۔۔۔ ماں ،بال نوں کہندی اے کہ جے اوس نے دُبارا اپنی زبان بولی تاں اوس نوں چپیڑ مارے گی جدوں بال ایہ سُنے گا تاں اوہ ایہ ای سمجھے گا کہ ساڈی زبان سبھ توں گھٹیا اے ایس نوں اگانہ توں نہیں بولنا چاہیدا اے۔

بالاں نوں اوہ کجھ سکھایا جا رہیا اے جس دا کسے طرحاں وی سماج وچ کوئی مثبت کردار نہیں اے جس کر کے اگانہ ودھو سوچ مُکدی جا رہی اے۔انگریزی سکولاں والیاں دا ورتارا پنجابی بولن والیاں نال انداز طنزیا جہیا ہوندا اے ایس طرحاں دے حالات ودھدے جا رہے نیں۔سرکاری سکولاں دے بالاں نوں بدتمیز جہیا وکھایا گیا اے جیوں ایہ فلم کدھرے کدھرے سرکاری سکولاں دے ورودھ وچ اے۔

پرایویٹ سکول وچ پنجابی سِکھ کے آون والے بالاں دی نندیا کیتی جاندی اے ،پنجابی بولن والیاں نوں پنج سو روپے جرمانا اے،پرایویٹ سکولاں دا مافیا جہڑا لنچ وی دسدے نیں کہ کیہ لیانا اے۔"اوہ والی انگریزی " سکھان واسطے ماپے ڈھائی لکھ ورھے وار فیس تار کے اپنے بال نوں دو کلاساں پچھے داخل کروا دِتا جاندا اے،ایتھے وی ماں اپنے بال دے "کجھ بنن"دے سُفنے نوں دو ورھے اگانہ پا کے پرایویٹ سکول والیاں دی ایہ گل مَن لیندی اے۔ اوہ بال پڑھن جاندا اے تے سبھ توں پہلاں سبق ای ایہ دِتا جاندا اے کہ وڈیاں دے پَیراں نوں ہتھ لاون توں ہٹک دیندے نیں کیوں جے اوہناں نے سماج توں اُلٹ ای ٹرنا ہوندا اے۔

دیسی بالاں نوں ماپیاں نال ورتارا وی بدل دتا اے۔

امریکا جا ون واسطے جدوں بالاں نوں "ناسا" گھلیا جاون دا پربندھ ہو رہیا ہوندا اے تاں پیو دی جیب توں وڈی خُشی نکل آندی اے جو پیو اپنے بال نوں مُل نہیں لے کے دے سکدا ۔بال جس دا ناں امن اے اوہ کلا ای پنجابی زبان اختیاری مضمون وجوں لیندا اے جد کہ اوس دے باقی سبھ مِتر فرانسیسی پڑھ رہے ہوندے نیں بعدوں اوہ سارے مِتر اوہدے نال پنجابی پڑھن لگ جاندے نیں تاں کئی بالاں دے ماپے شکایت لے کے سکول دے پرنسپل کول جا اپڑدے نیں کہ پنجابی نہیں پڑھنی ساڈے بالاں نے۔۔۔ایتھے کہانی نویں موڑ لیندی اے تے ایس موقعے اُتے فلم دا مرکزی کردار بال امن تے اوہدے ماپے ماں بولی دے بارے لمی مدلل گلبات کردے نیں ۔امن دی ماں کہندی اے " اسیں انگریزی سکھانا چاہنے آں پر پنجابی بھُلانا نہیں چاہندے"۔۔۔۔۔۔۔۔۔

سارے پڑھیاراں دے بالاں دے ماپے پنجابی زبان سکھاون دا فیصلا کردے نیں ایتھے پرایویٹ سکول والیا ں نوں پنجابی پڑھاون دا فیصلا مننا ای پیندا اے،جے پنجابیاں نے اپنیاں گلاں منوانیاں نیں تاں ایتھوں ای کمائی کرن والیاں نوں ساڈی زبان سانوں موڑنی پینی اے بس شرط ایہ اے کہ پنجابی اکمٹھ ہو کے اپنی زبان لاگو کرن دی منگ کرن۔

فلم ویکھن لئی ایس لنک اُتےhttps://www.youtube.com/watch?v=DFOM31UWy1w&t=2408s