یونیورسٹیاں‘ کالجاں‘ سکولاں‘ مدرسیاں تے اکیڈمیاں 11اپریل تک بند:نیشنل کمانڈ اینڈ اپریشن سینٹر  ……٭رویل خبر٭

اسلام آباد (نیوز ڈیسک) نیشنل کمانڈ اینڈ اپریشن سینٹر نے کرونا دی تیجی لہر دے پیش نظر بُہتے کیسز والے ضلعیاں وچ 11 اپریل تک تعلیمی ادارے بند کرن دا اعلان ک دِتا اے۔ کرونا ایس او پیز دی خلاف ورزی کرن والے تعلیمی ادایاں نُوں سیل کر دِتا جاوے گا۔ بدھ نُوں اسلام آباد وچ وفاقی وزیر تعلیم شفقت محمود دی اگوائی وچ نیشنل کمانڈ اینڈ اپریشن سینٹر دا اجلاس ہویا جہدے وچ چاراں صوبیاں دے وزرائے تعلیم تے صحت‘ وفاقی سیکرٹری تعلیم فرح حامد خان‘ پارلیمانی سیکرٹری تعلیم وجیہہ قمر تے چیئرمین ایچ ای سی وی رلت کیتی جد کہ صوبائی وزراء تعلیم ویڈیو لنک نال اجلاس وچ رلتی ہوئے۔ اجلاس وچ پورے ملک وچ کرونا دے مثبت کسیاں دی شرح تے خاص طور اُتے تعلیمی اداریاں وچ کرونا کیسز سنے ایس او پیز اُتے عملدرآمد دا جایزا لیا گیا جد کہ اجلاس وچ وزرائے تعلیم تے صحت توں تعلیمی اداریاں بارے اپنیاں اپنیاں تجویزاں وی لئیاں گئیاں جہدے بعد تعلیمی اداریاں نُوں 11 اپریل تک بند کرن دا حتمی فیصلا کیتا گیا۔ اجلاس دے بعد میڈیا نُوں بریفنگ دیندیاں ہویاں وفاقی وزیر تعلیم شفقت محمود نے کہیا کہ پنجاب دے ضلعیاں وچ بیماری دا کھلار تشویشناک اے جد کہ خیبر پختونخوا دے وی کجھ ضلعیاں وچ ایہ مسئلے درپیش نیں‘ اجلاس وچ صوبائی وزرائے تعلیم دے علاوا اعلا ثانونی تعلیم کمیشن تے تعلیمی اداریاں دے آگوواں وی رلت کیتی تے ملک وچ تعلیم تے بیماری دی صورتحال اُتے تفصیلی گلبات کیتی گئی۔ اوہناں نے کہیا کہ ایہو جہے ضلع جتھے کرونا دے کیسز دی شرح بُہتی اے اوتھے تعلیمی ادارے 11 اپریل تک بند رکھن دا فیصلا کیتا گیا اے۔ تعلیمی اداریاں دی بندش دا اطلاق یونیورسٹیاں‘ کالجاں‘ سکولاں‘ مدرسیاں تے اکیڈمیاں اُتے ہووے گا‘ سندھ‘ بلوچستان تے گلگت بلتستان وچ کرونا دی شدت گھٹ اے‘ لاہور سنے پنجاب دے کجھ ضلعیاں وچ کرونا دا کھلار تشویشناک اے‘ خیبر پختونخوا دے کجھ ضلعیاں وچ وی کرونا دا کھلار اے‘ 11 اپریل تک مخصوص ضلعیاں وچ تعلیمی ادارے ہور بند رہن گے۔ کہناں ضلعیاں وچ تعلیمی ادارے بند کرنے نیں ایہ فیصلا صوبائی حکومتاں کرن گیاں۔ وفاقی وزیر نے کہیا کہ لاہور‘ راولپنڈی‘ گوجرانوالا‘ گجرات‘ ملتان‘ فیصل آباد‘ سیالکوٹ‘ سرگودھا تے شیخو پورا وچ تعلیمی ادارے بند رہن گے۔ پنجاب دے ہور ضلعیاں وچ پرانے شیڈول مطابق سکول کھلن گے۔ قانون دی خلاف ورزی کرن والے سکول سیل کر دِتے جان گے۔ شفقت محمود نے کہیا کہ کرونا دے پیش نظر پچھلے ورھے نوویں‘ دسویں‘ گیارھویں تے بارھویں دے امتحانات نہیں ہوئے سن پر ایس وار انج نہیں ہووے گا۔ نوویں توں بارھویں دے امتحانات شیڈول دے مطابق مئی دے آخر وچ ہون گے۔ کیمبرج نظام تعلیم دے امتحانات چھیتی شروع ہو رہے نیں‘ صورتحال دا جایزا لین لئی کیمبرج دے نال میٹنگ کراں گے‘ وفاقی راجدھانی اسلام آباد وچ وی سارے تعلیمی ادارے 11 اپریل تک بند رہن گے۔