ساریاں جماعتاں نُوں سانجھے فیصلیاں دا احترام کرنا چاہیدا اے:پی ڈی ایم دے آگو مولانا فضل الرحمان ……٭رویل خبر٭

اسلام آباد (نیوز ڈیسک)پی ڈی ایم دے آگو مولانا فضل الرحمان نے پچھلے وزیراعظم نواز شریف تے آصف علی زرداری نال رابطا کیتا اے تے دوہاں پارٹیاں دے آگوواں تے رہنماواں نُوں اِک دوجے خلاف بیان نہ دین دی اپیل کیتی اے تے کہیا کہ ایہو جہے بیاناں نال پی ڈی ایم دی تحریک نُوں شدید نقصان پہنچے گا‘ دوہاں آگوواں نے مولانا دی تجویز دی حمایت کیتی۔ وسیلیاں نے دَسیا کہ پی ڈی ایم دے آگو نے پہلے پچھلے صدر آصف علی زرداری نال رابطا کتیا تے دوہاں آگوواں نے ملکی سیاسی صورتحال اُتے گلبات کیتی۔ مولانا فضل الرحمان نے کہیا پی ڈی ایم دیاں ساریاں جماعتاں نُوں سانجھے فیصلیاں دا احترام کرنا چاہیدا اے‘ پی ڈی ایم دے فیصلیاں مطابق سینیٹ وچ قائد حزب اختلاف دی سیٹ مسلم لیگ (ن) نُوں دین دی حمایت کیتی گئی سی‘ امید اے پیپلز پارٹی پی ڈی ایم دے سانجھے فیصلیاں دا احترام کرے گی۔ وسیلیاں نے دَسیا کہ مولانا فضل الرحمان نے پچھلے دن لاہور وچ بلاول ولوں بیان دا معاملا وی چُکیا گیا تے کہیا کہ ایہو جہے بیانات نال پی ڈی ایم دی تحریک نُوں ڈاڈھا نقصان پہنچن دا دھڑکُو اے‘ پی ڈی ایم دیاں جماعتاں اِک دوجے خلاف بیان بازی شروع کر دین تے تحریک دا مقصد ختم ہو جاوے گا‘ ایس حوالے توں پارٹی قیاد ت نُوں نوٹس لینا چاہیدا اے تے پارٹی آگوواں نُوں فوری بیان بازی توں روکنا چاہیدا اے۔ وسیلیاں نے دَسیا کہ دوہاں آگوواں نے ملک دی مجموعی سیاسی صورتحال ُتے گلبات کیتی تے اگے دی حکمتع ملی اُتے وچار وٹاندرا کیتا‘ دوہاں آگوواں نے سارے معاملات رَل مل کے حل کرن اُتے اتفاق کیتا اے۔ ایس توں بعد مولانا فضل الرحمان نے مسلم لیگ ن دے قائد نواز شریف نال وی ٹیلی فونک رابطا کیتا۔ مولانا نے آصف زرداری نال ہون والی ٹیلی فونک گلبات اُتے نواز شریف نُوں اعتماد وچ لیا۔ دوہاں آگوواں وچکار اگلے دی حکمتع ملی اُتے تفصیلی وچار وٹاندرا کیتا گیا‘ مولانا فضل الرحمان نے دوہاں آگوواں نُوں ساِک دوجے دے خلاف بیان بازی توں گریز دا مشورا دِتا تے کہیا کہ پی ڈی ایم نُوں متنازع بیاناں نال نقصان پہنچ رہیا اے۔ اوہناں نے کہای کہ اسیں حکومت دے خلاف متحد ہوئے آں اِک دوجے نال لڑن لئی نہیں‘ ایہدے اُتے نواز شریف نے مولانا فضل الرحمان دی تجویز دی حمایت کیتی تے کہیا کہ ساڈی پارٹی ولوں کوئی بیان بازی نہیں کیتی گئی سگوں پارٹی قائدین تے آگوواں نُوں ہدایت جاری کر رکھیاں نیں کہ پیپلز پارٹی ولوں کسے وی سیاسی بیان دا جواب نہ دِتا جاوے‘ نواز شریف دا کہنا سی کہ جدوں وی تحریکاں شروع ہوندیاں نیں تے انج ای اوکڑاں وی پیش آندیاں نیں پر سانوں ایہناں اوکڑاں توں متحد ہو کے نکلنا اے تے مقصداں دے حصول لئی جدوجہد جاری رکھاں گے۔ایس توں وکھ پی ڈی ایم دے آگو مولانا فضل الرحمان نے پورے ملک دے سیاسی کارکناں نُوں تازا ہدایتاں جاری کردیاں ہویاں کہیا اے کہ عید الفطر بعد بھرویں عوامی طاقت نال ناجایز وفاقی سرکار اُتے یلغار کراں گے‘ لوکائی دے جمہوری حقاں لئی سیاستداناں نُوں قربانیاں دینیاں پین گیاں‘ بلاول بھٹو استعفیاں دا ایٹم بم آخری آپشن متھ چکے نیں‘ پیپلز پارٹی قیادت نُوں دلیرانا فیصلا کرنے پین گے‘ اسیں انتظار وچ آں‘ کارکنان اپنیاں تیاریاں جاری رکھن‘ عید الفطر دے بعد انشاء اللہ عوامی طاقت نال تازا دَم ہو کے اسلام آباد ول یلغار کراں گے۔ مولانا فضل الرحمان دا کہنا سی کہ اسیں طے کیتا اے کہ موجودا سیلیکٹڈ نا اہل لوکائی دشمن حکومت توں ملک تے لوکائی نُوں ضرور نجات دوا کے دَم لواں گے‘ ایس مقصد لئی اسیں پی ڈی ایم بنائی سی کہ ایس جایز قابض حکومت دا خاتما کیتا جاوے تے لوکائی دے جمہوری حقاں دا تحفظ کیتا جاوے۔ ایہناں مقصداں لئی سیاستداناں نُوں قربانیاں دینیاں پین گیاں تے وسوسیاں نُوں چھڈ کے پورے اعتماد نال میدان وچ اُترن والے ای کامیابیاں حاصل کردے نیں‘ وطن عزیز دی پوری قوم ایہناں نا اہل ظالم حکمراناں توں بے زار ہو چکی اے تے نجات لئی اپوزیشن ول ویکھ رہی ا‘ پی پی پی دی قیادت نُوں جرات مندانا فیصلا کرنے پین گے‘ اسیں وی ایہناں دا انتظار کر رہے آں‘ جے پی پی نے ساتھ نہ دِتا تے فیر وی جمہوریت تے لوکائی دی جنگ لڑاں گے‘ اسیں ہر تھاں حکمراناں نُوں نک رگڑن اُے مجبور کتیا اے تے ہُن فیصلا کن راؤنڈ وچ وی ایہناں نُوں عوامی طاقت نال شکست فاش دواں گے۔