ساڈے کول وسائل نہیں نیں کہ مکمل لاک ڈاؤن کر سکیے،سارے بینکاں نُوں ہدایت کردا آں کہ قرضے واسطے لوکاں لئی آسانیاں پیدا کرن: وزیراعظم عمران خان ……٭رویل خبر٭

اسلام آباد (نیوز ڈیسک) وزیراعظم عمران خان نے کہیا اے کہ ملک وچ مکمل لاک ڈاؤن نہیں کر سکدے پر احتیاط تے کر سکدے آں‘ کرونا جویں کھلر رہیا اے ہسپتال بھر جان گے‘ کرونا دی پہلی لہر وچ دنیا نے ساڈے اقدامات دی تعریف کیتی‘ دنیا وچ کرونا ویکسین دی تھوڑ اے ایس لئی کرونا اُتے کنٹرول لئی احتیاطی تدبیراں ضروری نیں تے ایس او پیز دا خیال رکھیا جاوے۔ ایتوار والے دن قوم نال مختصر خطاب دے دوران وزیراعظم دا کہنا سی کہ کرونا دیاں پہلیاں دو لہراں دے دوران احتیاط ورتی تے مینوں بیماری نہیں لگی۔ تیجی لہر تے سینیٹ الیکشن دے دوران احتیاط نہیں کیتی تے کرونا دا شکار ہو گیا۔ تیجی لہر پہلیاں دو لہراں توں بُہتی شدت والی اے۔ سبھ توں پہلے تُسیں ماسک پاؤ‘ جہدے نال بیماری ہون دے چانس گھٹ ہو جاندے نیں۔ ساڈے کول وسائل نہیں نیں کہ لاک ڈاؤن کر سکیے تے فیر لوکاں نُوں گھراں وچ کھانا دِتا جا سکے۔ پر گھٹ توں گھٹ ایس او پیز اُتے عمل کیتا جا سکدا اے۔ ساڈ ے ہسپتال بھرے ہوئے نیں۔ لاہور سنے ہور شہراں وچ تیزی نال کیسز ودھ رہے نیں۔ عمران خان دا کہنا سی کہ جویں پہلی وار اسیں کرونا اُتے قابو پایا‘ ہُن وی اوسے طرحاں دی احتیاط دی ضرورت اے۔ جہڑے ریٹ اُتے کرونا ودھ رہیا اے جے احتیاط نہ کیتی گئی تے ہسپتال بھر جان گے۔ ویاہواں‘ ریسٹورنٹ تے رَش والیاں تھاواں اُتے نہ جاؤ۔ اسیں بزنس یاں فیکٹریاں بند نہیں کر سکدے۔ اللہ نے میرے اُتے تے میری گھروالی اُتے کرم کیتا۔ ایہ بیماری جے سینے وچ چلی جاوے تے بہت خطرناک بن جاندی اے۔ ایس توں پہلاں وزیراعظم نے نواں پاکستان ہاؤسنگ ٹیلی تھون وچ گل کردیاں ہویاں کہیا کہ پاکستان وچ قرضا لین وچ لوکاں نُوں اوکڑاں وی ہوندیاں نیں ایس لئی سارے بینکاں نُوں ہدایت کردا آں کہ لوکاں لئی آسانیاں پیدا کرن۔ نواں پاکستان ہاؤسنگ ٹیلی تھون وچ گلبات کردیاں ہویاں وزیراعظم عمران خان دا کہنا سی کہ احساس اے کہ لوکاں نُوں کافی اوکڑاں دا ساہمنا اے‘ پہلے عام لوکاں لئی ایہو جہیا کوئی منصوبا شروع نہیں کیتا گیا‘ پہلی وار گھٹ آمدن والیاں لئی ایہو جہی سکیم لیاندی گئی‘ تے گھر بنان دا موقع دِتا جا رہیا اے۔ کرائے اُتے رہن والے کرایا قسطاں دی شکل وچ دے کے گھر دے مالک بن سکن گے۔ جہناں دے کول گھر خریدن لئی پیسے نہیں سوکھیاں شرطاں اُتے قرض لے سکن گے۔ وزیراعظم نے کہیا کہ ہور ملکاں وچ ہمیشا لوک بینکاں توں قرض لے کے گھر خریددے نیں‘ پاکستان وچ بینکاں توں قرض لے کے گھر خریدن دا رواج نہیں اے تے مینوں احساس اے کہ پاکستان وچ قرض لین وچ لوکاں نُوں اوکڑاں پیدا ہوندیاں نیں۔ سارے بینکاں نُوں ہدایت کردا آں کہ لوکاں لئی آسانیاں پیدا کرن۔ عمران خان دا کہنا سی کہ ساڈا ملک قرضیاں وچ ڈُبیا ہویا اے تے ایہناں قرضیاں دی واپسی لئی دولت پیدا کرن دی ضرورت اے۔ لوکاں نُوں اپنے گھر بنانے شر وع کرد ِتے تے تعمیراتی سرگرمیاں نال ملک وچ روزگار دے موقع پیدا ہون گے۔ کنسٹرکشن سنے پورے ملک وچ انقلاب آئے گا۔ کنسٹرکشن انڈسٹری دے نال 30 صنعتاں جُڑیاں ہوئیاں نیں۔ ملک دی معیشت اُتے جاوے گی۔ پیسیاں وچ وادھا ہوو ے گا‘ ملکی دولت وچ وادھا ہویا تے قرضے واپس کراں گے۔ ملک دے مستقبل لئی ایہ سبھ توں اہم پروجیکٹ اے۔