kraamaat@gmail.com
+ +92 333-430-6384


 کرونا وایرس اُتے قابو پان لئی ایس او پیز واسطے سختی کرن دا فیصلا:نیشنل کمانڈ اینڈ اپریشن سینٹر ……٭رویل خبر٭


نمائندا رویل March 29, 2021


اسلام آباد (نیوز ڈیسک) نیشنل کمانڈ اینڈ اپریشن سینٹر (این سی او سی) نے ملک وچ تیزی نال کھلرن والے کرونا وایرس اُتے قابو پان لئی ایس او پیز دے نفاذ لئی ہور سختی کرن دا فیصلا کیتا اے جہدے بعد اج پیر توں صوبیاں نُوں لاک ڈاؤن لئی تازا ہاٹ سپاٹ دے نقشے فراہم کیتے جان گے جد کہ 5 اپریل توں ویاہ دیاں تقریباں اُتے ان ڈور تے آؤٹ ڈور اُتے مکمل پابندی ہووے گی‘ پورے ملک وچ ساریاں قسماں دے ان ڈور تے آؤٹ ڈور اجتماعواں اُتے فورن پابندی لا دِتی گئی اے‘ صوبائی انتظامیا ویلے توں پہلے پابندیاں لان لئی با اختیار ہووے گی۔ تفصیلات دے مطابق وفاقی وزیر اسد عمر دی صدارت ہیٹھ صوبائی چیف سیکرٹریز دے نال این سی او سی دا خصوصی اجلاس ایتوار نُوں ہویا۔ اجلاس وچ چاراں صوبیاں دے چیف سیکرٹریز نے ویڈیو لنک راہیں رلت کیتی‘ اجلاس وچ ایس او پیز اُتے عملدرآمد یقینی بنان دے حوالے توں اہم فیصلے کیتے گئے‘ جہدے مطابق اج 29 مار چ توں این سی او سی ولوں صوبیاں نُوں لاک ڈاؤن لئی تازا ہاٹ سپاٹس دے نقشے فراہم کیتے جان‘ 5 اپریل توں ویاہ دیاں تقریباں اُتے ان ڈور تے آؤٹ ڈور مکمل پابندی لان دا فیصلا کیتا گیا اے‘ صورتحال دے پیش نظر صوبائی انتظامیا ویلے توں پہلے پابندیاں لان لئی با اختیار ہووے گی‘ پور ے ملک وچ ساریاں قسماں دیاں انڈور تے آؤٹ ڈور تقریباں اُتے فورن پابندی لا دِتی گئی‘ اجتماعواں وچ ساریاں قسماں دے سماجی‘ ثقافتی‘ سیاسی‘ سپورٹس تے ہور قسماں وی شامل نیں۔ اجلاس وچ بین الصوبائی ٹرانسپورٹ گھٹ کرن دے حوالے توں وی مختلف آپشنز اُتے غور کیتا گیا‘ ٹرانسپورٹ اُتے پابندی دے حوالے توں حتمی فیصلا صوبیاں توں فضائی تے ریلوے تے سڑک راہیں سفر کرن والے مسافراں دی گنتی بارے ڈیٹا دی بنیاد اُتے کیتا جاوے گا‘ صوبیاں نُوں این سی او سی ولوں ویکسی نیشن دے ٹارگٹس پورے کرن دی ہدایت کیتی گئی‘ ویکسی نیشن لئی درست تے ویلے سر ڈٹیا دی فراہمی یقینی بنائی جاوے۔ اجلاس وچ گلبات کردیاں ہویاں وفاقی وزیر اسد عمر نے کہیا کہ چیف سیکرٹریز نوں ایس او پیز اُتے عملدرآمد یقینی بنان لئی اقدامات دی ہدایتاں کیتیاں گئیاں اے تے سارے شہریاں توں انتظامیا نال تعاون دی درخاست اے‘ انتظامیا ولوں ایس او پیز دا نفاذ ساڈی حفاظت لئی ای کیتا جا رہیا اے۔