آئی ایم ایف معیشت تے لوکائی وِچوں رہیا سہیا خون نچوڑ لوے گا:پاکستان اکانومی واچ دے صدر ڈاکٹر مرتضیٰ مغل ……٭رویل خبر٭

اسلام آباد (نمایندا رویل) پاکستان اکانومی واچ دے صدر ڈاکٹر مرتضیٰ مغل نے کہیا اے کہ آئی ایم ایف معیشت تے لوکائی وِچوں رہیا سہیا خون نچوڑ لوے گا۔ کئی اہم شخصیات ملکی مفاد نُوں پچھے سُٹ کے آئی ایم ایف دیاں آلا کار بن چُکیاں نیں۔ اِک سرکاری بینک نُوں حکومت اُتے اُچیرتا کویں دِتی جا سکدی اے۔ آئی ایم ایف پروگرام دی بحالی لئی اگلا بجٹ مکمل طور اُتے اوہناں دیاں خاہشاں مطابق بنان دی شرط قبول کر لئی گئی اے جہدے نال معیشت‘ لوکائی تے کاروبار برُی طرحاں متاثر ہون گے۔ 500 ملین ڈالر دے قرضے بدلے 700 ارب دے نویں ٹیکس لائے جان گے‘ بجلی دی مد وچ لوکائی اُتے 900 ارب دا وادھو بھار پایا جاوے گا تے 36 عدد ٹیکس سہولتاں واپس لئیاں جان گیاں۔ ایہدے علاوا سٹیٹ بینک نُوں ایہو جہی ازادی دِتی جاوے گی جہدا کسے دوجے ملک وچ تصور وی محال اے‘ سٹیٹ بینک آف پاکستان نُوں لوڑ توں ودھ ازادی دین نال حکومت تے بینک اِک پیج اُتے نہیں رہن گے جہدے نال ورودھ جنم لین گے تے معیشت متاثر ہووے گی۔