پنجاب دے  ہسپتالاں اندر کرونا روگیاں لئی تھاں گھٹ پے رہی اے،لوکائی کرونا نُوں سنجیدا نہیں  لے رہی:گورنر پنجاب چودھری محمد سرور……٭رویل خبر٭

لاہور (نمایندا رویل) گورنر پنجاب چودھری محمد سرور نے کہیا اے کہ ہسپتال وچ کرونا روگیاں لئی تھاں گھٹ پے رہی اے‘ رب دے لئی لوکائی کرونا دی تیجی لہر نُوں سنجیدا لوے جے لوکائی لا پرواہی دا مظاہرا کرے گی تے فیر کرونا وباء نُوں کھلرن توں روکنا کسے دے وَس وچ نہیں رہوے گا۔ لوکائی ایس او پیز اُتے عمل کرے تے ایس مشکل ویلے وچ احتیاط دا دامن ہتھوں نہ چھڈ و ورنا کرونا دے حوالے توں حالات ہور خراب ہو سکدے نیں۔ اوہ گورنر ہاؤس لاہور وچ حامد بٹ تے ڈاکٹر ذوالقرنین بٹ ینگ کنسلٹنٹ ایسوسی ایشن پاکستان دے وفد تے میڈیا نال گلبات کر رہے سن۔ گورنر پنجاب چودھری محمد سرور نے کہیا کہ جدوں لوکائی کرونا نُوں سنجیدا نہیں لوے گی تے یقینی طور اُتے حکومت نُوں کرونا دے کھلار نوں روکن تے لوکائی نُوں ایس مہلک بیماری توں بچان لئی ہور سخت اقدامات کرنے پین گے۔ اوہناں نے کہیا کہ بدقسمتی نال کرونا دے حوالے توں سارے خطریاں د ے باوجود لوکئی کرونا نُوں سنجیدا نہیں لے رہی۔ اوہناں نے کہیا کہ میں لوکائی نُوں کہندا آں کہ خدا دے لئی اپنے تے پاکستان لئی کرونا دی تیجی لہر نُوں بہت زیادا سنجید الوو تے کرونا ایس او پیز اُتے سختی نال عمل کریا کرو ورنا حالات ہور خراب ہون تے پاکستان ایہو جہے حالات دا کسے صورت متحمل نہیں ہو سکدا۔گورنر نے کہای کہ کرونا کیسز وچ وادھے نال ہسپتالاں وچ ہر لنگھدے دن نال دباء وچ وادھا ہو رہیا اے تے ایہناں حالات وچ ساڈے ڈاکٹرز‘ پیرا میڈیکل سٹاف تے ہور طبی عملا کرونا دے علاج لئی جس طرحاں اپنیاں زندگیاں نُوں خطرے وچ پا کے اوہناں دا علاج کر رہے نیں ایہدے اُتے اوہناں نُوں جنا وی خراج تحسین پیش کیتا جاوے اوہ گھٹ اے۔