پاکستان توں ودھ کوئی وی افغانستان وچ امن تے ترقی دا چاہیوان نہیں: وزیر خارجا شاہ محمود قریشی……٭رویل خبر٭

دوشنبے (نمایندا رویل) وزیر خارجا شاہ محمود قریشی نے کہیا اے کہ افغان جھیڑے دا کوئی فوجی حل نہیں اے‘ افغان امن عمل اپنے فیصلا کن مرحلے وچ اے‘ پاکستان توں ودھ کوئی وی افغانستان وچ امن تے ترقی دا چاہیوان نہیں ہو سکدا‘ تشویش اے انفرسٹرکچر دی تباہی تے معاشی موقعے نہ ہون کارن‘ افغان امن عمل دے ثمرات خطریاں دی بھینٹ چڑھ سکدے نیں‘ پاکستان پرامن‘ مستحکم‘ خُد مختار تے خشحال افغانستان دے قیام لئی اپنی مدد جاری رکھے گا۔ تاجکستان دی راجدھانی دوشنبے وچ ہارٹ آف ایشیا‘ استنبول پراسیس وزارتی کانفرنس نال خطاب کردیاں ہویاں وزیر خارجا نے ہور کہیا کہ استنبول پراسیس وزارتی کانفرنس“ دا حصا بننا میرے لئی بے حد خُشی دا کارن اے کرونا عالمی وباء دی وجھا توں سفری تے صحت دیاں شدید اوکڑاں دے باوجود ایس کانفرنس دے انعقاد‘ بہترین انتظامات تے پرتپاک مجمانی تے پروہنکاری اُتے میں تاجکستان دی حکومت تے لوکائی دا شکریا ادا کردا ں۔ عالمی وباء نے سماجی تے معاشی صورتحال نُوں جس درجا معطل کر کے رکھ دِتا اے‘ انج ساڈی حالیا یاداشت وچ پہلے نہیں ہویا۔ ایس عالمی وباء دی وجھا توں جہڑے لوک اپنی زندگی دی بازی ہار گئے‘ اسیں اوہناں لئی دُعا کردے آں تے ایس مہلک وباء نال برسر پیکار روگیاں دی صحت یابی لئی دُعا گو آں۔