سگی بھین نوں قتل کرن والی کُڑی رہا

کراچی (رویل نیوز )کراچی وچ بھین ہتھوں قتل ہون والی نوجوان کُڑی دے کیس دا فیصلا سُنا دتا گیا اے۔تفصیل دے مطابق عدالت نے سگی بھین دے قتل تے ہور ملزماں نوں رہا کرن دا حکم دے دتا اے۔ علوینہ نامی کُڑی نے اپنے منگیتر نال رل کے بھین علینہ نوں قتل کیتا سی۔مقتولا تے ملزما دے والد ندیم نے ملزماں نوں معاف کر دتااے۔ملزم نے اپنے منگیتر نال عدالت ساہمنے بھین نوں قتل کرن دا اعتراف کیتا سی۔ ایس توں پہلاں چالو ورھے 18اپریل نوں ایڈیشنل ڈسٹرکٹ اینڈ سیشن جج شرقی نے اپنی ای بھین نوں قتل کرن والی علوینہ تے ہور دو ملزماں نوں ضمانت اُتے رہائی دین دا حکم دتا سی۔ استغاثا ولوں پکے ثبوت پیش نہ کیتے جان مگروں علوینہ تے ہورشریک ملزم سگے بھرا احسن تے عباس نوں ضمانت اُتے رہا کرن تے اک اک لکھ رُپئے دے مچلکے جمع کروان دا حکم دتا گیا سی۔یاد رہوے کہ علوینہ نے اپنی بھین نوں 5دسمبر 2017نوں قتل کیتا سی، علوینہ ولوں ایہ الزام لایا گیا سی کہ اوہدی بھین اوہنوں اپنے دوست راہیں جنسی زیادتی دا نشانا بنواندی سی۔