پنج سو اَرب دا ورھے وارکسارا‘ سرکاری کمپنیاں بارے وڈا فیصلا……٭رویل خبر٭

اسلام آباد (نمایندا رویل) حکومت نے 500 ارب رُپئے سالانا کسار ے نال دوچار سرکاری کمپنیاں بارے وڈا فیصلا کر لیا اے‘ وزیراعظم دی ہدایت اُتے ڈھائی سال بعد اخیر فرانزک آڈٹ دی راہ ہموار ہو گئی۔ وسیلیاں دا کہنا اے کہ ارباں رُپئے کسارے نال دوچار سرکاری کمپنیاں دا پچھلے 10 سالاں دا فرانزک آڈٹ ہووے گا۔ وسیلیاں دا کہنا اے کہ پہلے مرحلے وچ پاکستان ریلوے‘ پی آئی اے تے سوئی نادرن دے فرانزک آڈٹ دی منظوری دِتی گئی اے‘ پشاور الیکٹرک سپلائی کمپنی تے ناردرن پاور جنریشن کمپنی دے آڈٹ دی وی منظوری دِتی گئی اے۔ ایہناں کمپنیاں دا فرانزک آڈٹ 30 جون تک مکمل کرن دی ڈیڈ لائن مقرر کر دِتی گئی۔ وسیلیاں دا کہنا اے کہ دوجے مرحلے وچ پاکستان پوسٹ آفس‘ کوئٹہ‘ حیدر آباد‘ لاہور تے سکھر الیکٹرک پاور کمپنی دا فرانزک آڈٹ ہووے گا۔ وسیلیاں د ا کہنا اے کہ وزیراعظم نُوں بریفنگ دِتی گئی اے کہ 85 سرکاری کمپنیاں وِچوں 33 کمپنیاں ارباں رُپئے کسارے دا شکار نیں۔ 33 کمپنیاں وِچوں 3 کمپنیاں 85 فیصد نقصان دیاں ذمے دار نیں۔