کرونا وایرس: دیس اندر پچھلے 24 گھنٹیاں وچ ہور 4 ہزار 84  نویں کرونا روگی،100واصل……٭رویل خبر٭

اسلام آباد (نیوز ڈیسک) کرونا وایرس نے خطرے دی گھنٹی وجا دِتی‘ جان لیوا وایرس نال اِک دن وچ ہور 100 بندے چلانا کر گئے۔ نیشنل کمانڈ اینڈ اپریشن سینٹر ولوں جاری کردا آنکڑیاں مطابق پچھلے 24 گھنٹیاں دوران 46 ہزار 269 کرونا ٹیسٹ کیتے گئے‘ جہدے بعد مجموعی کووڈ 19 ٹیسٹاں دی گنتی 1 کروڑ 1 لکھ 53 ہزار 36 ہو گئی اے۔ پچھلے 24 گھنٹیاں دوران پورے ملک وچ ہور 4 ہزار 84 مثبت کیسز رپورٹ ہوئے نیں۔ ایس طرحاں پاکستان وچ کرونا دے مصدقا روگیاں دی گنتی 6 لکھ 63 ہزار 200 ہو گئی اے۔ سرکاری آنکڑیاں مطابق ایس ویلے پورے ملک وچ کرونا دے فعال روگیاں دی گنتی 48 ہزار 566 اے جد کہ 3 ہزار توں ودھ روگیاں دی حالت ماڑی اے پچھلے 24 گھنٹیاں دوران پورے ملک وچ کرونا نال ہور 100 بندیاں دے واصل ہون نال ایس وباء پاروں واصل ہون والے بندیاں دی مجموعی گنتی 14 ہزار 356 ہو گئی اے۔ ایس توں پہلاں پچھلے سال 11 جون نُوں تقریبن 9 مہینے پہلے 1 دن وچ 101 مَوتاں ریکارڈ ہوئیاں سن۔ این سی او سی دے مطابق کرونا نال 1 دن وچ 2 ہزار 81 روگی صحت یاب وی ہوئے نیں جہدے بعد صحت یاب ہون والے روگیاں دی گنتی 6 لکھ 278 ہو گئی اے۔کرونا وایرس نال سبھ توں ودھ پنجاب متاثر ہو رہیا اے جتھے پچھلے 24 گھنٹیاں دوران لاہور شہر وچ کرونا وایرس دی نویں لہر نے 33 زندیاں نگل لئیاں نیں جو لاہور شہر دی تواریخ دی اِ دن وچ سبھ توں ودھ گنتی اے۔ ایہ وی دَسیا گیا کہ پچھلے 24 گھنٹیاں دوران کرونا وایرس دے ہور 1 ہزار 402 نویں کیسز وی ساہمنے آ گئے نیں جد کہ شہر دے سرکاری تے نجی ہسپتالاں وچ کرونا دے 606 روگیاں نُوں داخل کروایا گیا جہناں وِچوں 162 روگی ماڑی حالت وچ وینٹی لیٹرز اُتے علاج ہیٹھ نیں۔ طبی ماہرین مطابق ایس ویلے کرونا دی مجودا لہر 10سال تو ں گھٹ عمر دے بچیاں اُتے بُہتی حملا آور اے‘ ماپیاں نُوں اپنے بچیاں نُوں بچان لئی احتیاطی تدبیراں استعمال کرنیاں پین گیاں جد کہ آنکڑیاں مطابق پہلی جنوری 2021 توں اج تک کرونا وایر س دی تیجی لہر نال 1 ہزار بچے متاثر ہو چکے نیں۔ ایس توں وکھ کرونا دی تیجی لہر نال ڈاکٹرز وی شدید متاثر ہونا شروع ہو گئے نیں۔ پچھلے 1 ہفتے وچ سروسز ہسپتال دے 110 ڈاکٹرز ایس وبائی روگ دا شکار ہو چکے نیں۔ اینی وڈی گنتی وچ کرونا وایرس نال متاثر ہون دی وجھا توں سروسز ہسپتال وچ ڈاکٹراں دی شدید تھوڑ پیدا ہو گئی اے جد کہ 10 ڈاکٹراں دی حالت تشویشناک اے۔ ایس صورتحال وچ روگی وی شدید متاثر ہو رہے نیں۔ ایس توں وکھ حکومتی اقدامات دے تحت سرکاری تے نجی دفتراں وچ 50 فیصد ملازماں دی حاضری دے فارمولے اُتے کم جاری اے۔ دوجے پاسے کرونا ویکسین لئی پاکستان سرکار تے 2 چینی نجی کمپنیاں سائنو فارم تے کین سائنو دے و چ معاہدا طے پا گیا اے۔