kraamaat@gmail.com
+ +92 333-430-6384


  مینوں باہر دے حالات دا علم نہیں‘ میرے توں جیل دے حالات دا پُچھو: مسلم لیگ ن دے صدر شہباز شریف ……٭رویل خبر٭


نمائندا رویل March 31, 2021


لاہور (نیوز ڈیسک) قومی اسمبلی وچ قائد حزب اختلاف تے مسلم لیگ ن دے صدر شہباز شریف نے پنجاب وچ ان ہاؤس تبدیلی اُتے لا علمی دا اظہار کردیاں ہویاں کہیا اے کہ میں اپنے کیسز دا رونا رو رہیا آں مینوں باہر دے حالات دا علم نہیں‘ میرے توں جیل دے حالات دا پُچھو۔ نیب الزاماں اُتے عدالتاں وچ پیش ہو کے دَس رہیا آں کہ کرپشن نہیں کیتی۔ لاہور دی احتساب عدالت وچ صحافتیاں نال غیر رسمی گلبات دوران جدوں شہباز شریف توں پُچھیا گیا کہ پاکستان پیپلز پارٹی ولوں عید بعد پنجاب وچ ان ہاؤس تبدیلی دیاں گلاں ہو رہیا ں نیں تُسیں اتفاق کردے او؟ جہدا جواب دیندیاں ہویاں شہباز شریف نے کہیا کہ میں اپنے کیساں دا رونا رو رہیا آں مینوں کیہ پتا؟ نیب الزاماں اُتے عدالتاں وچ پیش ہوکے دَس رہیا آں کہ کرپشن نہیں کیتی‘ درخات ضمانت وچ سارے الزاماں دا جواب دے دِتا اے۔ خاندان یاں بچیاں نُوں فایدا دینا ہوندا تے قوم دا پیسا نہ بچاندا‘ پُتراں دیاں شوگر ملز نُوں اِک رُپئے دا فاید انہیں دِتا۔ میٹرو بس تے اورنج لائن لائن ٹرین چل رہے نیں کوئی کرپشن نہیں کیتی‘ بی آر ٹی بنی اے‘ ایہدا حال ویکھ لوو‘ کرپشن فیر کتھے ہوئی‘ بی آر ٹی یاں اورنج لائن ٹرین وچ‘ باقی اللہ تعالیٰ بہتر کرے گا میں سرخرو ہوواں گا۔ پی ڈی ایم بارے اِک سوال اُتے شہباز شریف دا کہنا سی کہ پی ڈی ایم بارے میرے توں نہ پُچھو تے بہتر ہووے گا کیوں جے میں جیل وچ آں‘ میرے توں جیل دے حالات دا پُچھو‘ مینوں باہر دے حالات دا علم نہیں۔