نالایق حکمراناں نے لاہور نُوں کوڑے دا ڈھیر بنا دِتا،لوکائی توں مفت علاج کھوہ لیا گیا:حمزہ شہباز……٭رویل خبر٭

لاہور (نیوز ڈیسک) پنجاب اسمبلی وچ قائد حزب اختلاف حمزہ شہباز نے کہیا اے کہ کرپٹ تے نالایق حکمراناں نے لاہور نُوں کوڑے دا ڈھیر بنا دِتا اے‘ نالایق تے کرپٹ عمران خان نیازی نے ملک دی معیشت نوں ناقابل تلافی نقصان پہنچایا اے‘ مہنگائی تے معاشی تباہی نے لوکائی دا زندا رہنا محال کر دِتا اے۔ اپنے بیان وچ اوہناں نے کہیا کہ نواز شریف تے شہباز شریف دے دور وچ لوکائی نُوں مفت دوئیاں تے علاج مل رہیا سی‘ اج کینسر دے روگیاں توں مفت دوائی‘ لوکائی توں مفت علاج کھوہ لیا گیا اے‘ 500 فیصد دوائی دیاں قیمتاں وچ وادھا کر کے روگیاں توں زندا رہن دا حق کھوہ لیا گیا اے‘ ایہ اے ایس حکومت دا احساس؟‘ مڈل کلاس طبقے لئی سفید پوشی دا بھرم قایم کرنا عذاب بن چُکیا اے۔ اوہناں نے کہیا کہ مسلم لیگ (ن) دے دور وچ 52 رُپئے وِکن والی کھنڈ اج 120 رُپئے کلو لوکائی خریدن اُتے مجبور اے‘ ساڈے دور وچ 32 رُپئے وِکن والا آٹا اج 80 رُپئے کلو لوکائی خریدن اُتے مجبور اے‘ ساڈے دور وچ 142 رُپئے وچ وکن والا کھانے دا تیل اج 290 رُپئے وچ لوکائی خریدن اُتے مجبور اے‘ ساڈے دور وچ 84 رُپئے درجن وچ وکن والے آنڈے اج 170 رُپئے وچ لوکائی خریدن اُتے مجبور اے‘ ساڈے دور وچ 11 رُپئے فی یونٹ بجلی اج 24 رُپئے فی یونٹ لوکائی نُوں ویچی جا رہی اے‘ ساڈے دور وچ غریباں نُوں 2.7 رُپئے فی یونٹ بجلی دِتی جا رہی سی پر اج 6.3 رُپئے فی یونٹ غریباں توں وصول کیتا جا رہیا اے‘ ساڈے دور وچ 1036 ارب رُپئے گردشی قرضا سی‘ اج 2700 ارب ہو چکیا اے‘ ساڈے دور وچ غیر ملکی قرضا 70 اب ڈالر سی‘ اج 83 ارب ڈالر اے‘ ساڈے دور وچ غربت دی شرح 3.9 فیصد سی‘ اج 15فیصد اُتے پہنچ چکی اے۔ اوہناں نے کہیا کہ کرپٹ تے نالایق حکمراناں نے لاہور نُوں کوڑے دا ڈھیر بنا دِتا اے۔ نالایق تے کرپٹ عمران خان نیازی نے ملک دی معیشت نُوں ناقابل تلافی نقصان پہنچا دِتا اے۔