بجلی دے بِلاں اُتے عاید نیلم جہلم سرچارج نُوں ختم کر کے نوٹیفکیشن جاری کر دِتا ……٭رویل خبر٭

اسلام آباد (نیوز ڈیسک) وفاقی حکومت نے بجلی دے صارفین نُوں ارباں رُپئے دا ریلیف دین دا حتمی فیصلا کر لیا۔ وفاق نے بجلی دے بلاں اُتے عاید نیلم جہلم سرچارج نُوں ختم کر کے نوٹیفکیشن جاری کر دِتا جد کہ 2 سال توں جمع ہون والے سرچارجز صارفین نُوں وپس کرن دا وی حکم دے دِتا گیا۔ میڈیا رپورٹاں مطابق سرچارج دی مد وچ جمع ہون والے 5 ارب رُپئے توں ودھ دی رقم صارفین نُوں واپس کیتی جاوے گی جد کہ دسمبر 2018 توں لے کے ہُن تک جمع ہون والے سرچارجز دا سپیشل آڈٹ کروان دے وی احکامات جاری کیتے گئے نیں‘ ایس ضمن وچ وزارت پاور ڈویژن نے ساریاں کمپنیاں دے آگوواں نُوں چٹھی گھل دِتی اے۔ دوجے پاسے آئی ایم ایف دے بعد ایشیائی ترقیاتی بینک نے وی پاکستان نے ہور قرضے دی منظوری دے دِتی اے‘ منظور کیتے گئے 30 کروڑ ڈالر دے قرضے نال 300 میگا واٹ پن بجلی بنان دا منصوبا مکمل کیتا جاوے گا‘ ایشیائی ترقیاتی بینک ولوں جاری کیتے گئے اِک اعلامیے دے مطابق پاکستان لئی منظور کیتی گئی رقم نال 300 میگا واٹ پن بجلی بنان دا منصوبا مکمل کیتا جاوے گا‘ ایہ منصوبا بالا کوٹ دے نیڑے دریائے کنہار اُتے اُساریا جاوے گا‘ پن بجلی بنان دا منصوبا کلین توانائی پیدا کرن دا اے‘ ذکر کیتے منصوبے دی تکمیل نال پاکستان وچ توانائی سیکیورٹی وچ وادھا ہووے گا۔