َاَج ہر پاسے بیروزگاری اے‘ حکومت معاشی فیصلے آرڈیننس راہیں کرنا چاہندی اے:چیئرمین پیپلز پارٹی ……٭رویل خبر

کراچی (اُچیچا نمایندا) چیئرمین پیپلز پارٹی بلاول بھٹو زرداری دا کہنا اے کہ حکومت معاشی فیصلے آرڈیننس راہیں کرنا چاہندی اے‘ آرڈیننس نال پاکستان دا اپنا ای سٹیٹ بینک آئی ایم ایف دے کہن اُتے چلے گا‘ سٹیٹ بینک دے حوالے توں صدارتی آرڈیننس چیلنج کراں گے۔ جیکب آباد وچ پریس کانفرنس کردیاں ہویاں چیئرمین پیپلز پارٹی بلاول دا کہنا سی کہ 2018 دے الیکشن وچ پورے ملک وچ دھاندلی ہوئی‘ اوس ویلے کوشش کیتی گئی کہ عوامی نمایندیاں دی بجائے من پسند نمایندے منتخب ہون‘ 2018 وچ جہڑی دھاندلی شروع ہوئی سی اوہ اج تک جاری اے‘ لوکائی دے نمایندیاں نُوں روکیا جا رہیا اے‘ ساڈے جیالیاں نُوں دباء وچ لیان دی کوشش کیتی جا رہی اے‘ الیکشن کمیشن توں مطالبا اے کہ ڈسکہ وانگوں پور ے ملک وچ شفافیت لیائے‘ جتھے جتھے دھاندلی ہوئی اوتھے الیکشن کمیشن نُوں ازاد خُد مختار کردار ادا کرنا چاہیدا اے۔ بلاول نے کہیا کہ اپوزیشن دے خلاف نیب نُوں استعمال کیتا جا رہیا اے‘ باقی جماعتاں نیب دے حوالے توں پالیسی تبدیل کر دیندیاں نیں‘ ایہناں جماعتاں اُتے کیسز نہ ہون تے کجھ نہیں کہندیاں‘ پر اسیں کہندے آں نیب کالا قانون اے‘ آصف زرداری کہندے نیں کہ نیب تے معیشت نال نال نہیں چل سکدے۔ چیئرمین پیپلز پارٹی دا کہنا سی کہ مہنگائی دی سونامی ودھدی جا رہی اے‘ حکومت بجلی‘ گیس تے پٹرول دیاں قیمتاں وچ وادھا کر رہی اے تے اپنے ای ادارے آئی ایم ایف دے حوالے کر رہی اے‘ کرونا ویکسین دے حوالے توں پاکستان خطے دے سارے ملکاں توں پِچھے اے‘ ملک دے معاشی بحران دی وجھا عمران خان دی حکومت اے‘ 3 سال وچ 2 وزیرخزانا تبدیل ہوئے پر پالیسی اِک ای اے‘ حکومت دی پالیسی امیراں نُوں ریلیف تے غریباں نُوں تکلیف پہنچانا اے۔ بلاول نے کہیا کہ پی ٹی آئی ایم ایف ڈیل دی وجھا توں اج تواریخی بیروزگاری اے‘ حکومت معاشی فیصلے آرڈیننس راہیں کرنا چاہندی اے‘ آرڈیننس نال پاکستان دا اپنا ای سٹیٹ بینک آئی ایم ایف دے کہن اُتے چلے گا‘ سٹیٹ بینک دے حوالے توں صدارتی آرڈیننس نُوں چیلنج کراں گے‘ امید اے سانوں عدالتاں توں انصاف ملے گا۔ پیپلز پارٹی دے چیئرمین نے ہور کہیا کہ مینوں دَسیا گیا اے کہ پیپلز پارٹی تے (ن) لیگ دا ماضی ایہو جہیا اے کہ ساتھ چلنا مشکل اے‘ پر ایہناں سارے خیالاں دے باجوود میں 3 سال پوری کوشش کیتی ساریاں جماعتاں نُوں نال لے کے چلاں‘ ہُن وی ایہو عزم اے کہ ساریاں جماعتاں رَل کے چلن تے سارے معاملات مل کے حل کریے‘ اپوزیشن دی لڑائی دا حکومت نُوں کسے صورت فایدا نہ ہووے‘ اسیں پی ڈی ایم دے پلیٹ فارم توں حکومت نُوں ٹف ٹایم دینا چاہندے آں‘ اپوزیشن نُوں تقسیم کرن دی کوئی کوشش کامیاب نہیں ہووے گی‘ ایس حکومت تے عمران خان نُوں جانا پوے گا‘ پیپلز پارٹی دی سی ای سی دے اجلاس وچ سارے معاملات غور ہیٹھ آن گے۔