ذوالفقار علی بھٹو ۔۔۔۔۔٭رویل لیکھ٭

4اپریل 1979 پاکستان پیپلز پارٹی دے کارکنان تے پاکستان دی سیاست دا کالا دیہاڑ آکھیا جاسکدا اے

ایس دیہاڑ نوں ذوالفقار علی بھٹو نوں سُولی تے چڑھایا گیا سی۔

پاکستانی سیاست یاں پاکستانی سیاست داناں توں تے ورودھ کیتا جاسکدا اے مگر شاید ای کوئی فرد اجہیا ہووے گا جہڑا اے گل نہ مندا ہوے کہ ذوالفقار علی بھٹو نہ صرف سگوں پوری دُنیا دے وڈے

آ گوواں وچوں اک سن۔

سر شاہنواز بھٹو توں لے کے ہن تیکر پاکستان دی سیاست وچ بھٹو خاندان دا کردار بڑا اُچیچا رہیا اے ۔بھٹو خاندان نے جمہوریت واسطے بے شمار قربانیاں دِتیاں نیں تے ایس گل توں کوئی وی مکر نہیں سکدادنیا دے کسے ملک نوں وی دیکھ لو ؤ،جمہوریت یاں سیاست اوس ویلے ای پروان چڑھدی اے جس ویلے اس ملک دے ادارے اپنی اپنی حدود دے اندر رہ کے کم کرن ۔

کسے وی ملک نوں چلان واسطے عدلیہ، مقننہ ، انتظامیہ دی لوڑ ہوندی اے۔تِنوں ادارے اپنا اپنا کم کردے نیں پر بدقسمتی نال شروع توں ای پاکستان وچ تِنوں ادارے اک دوجے دے کم وچ مداخلت کردے نیں۔

ایہناں اداریاں دے سربراہ ملک دے سبھ توں زیادہ پڑھے لکھے لوگ ہوندے نیں مگر جدوں ایہی لوگ اپنا کم ایسے طرحاں نہیں کرن گے تے عام لوکاں کولوں فیر کیہ اُمید کیتی جاسکدی اے۔

اللہ تعالیٰ پاکستان دا حامی وناصر ہوے واپس زیڈ اے بھٹو تے آندے آں ۔ویسے تے سیاسیات دی ڈگری وی لئی اے پر ایتھے تواریخ دا نِکا جہیاپڑھیار ہون دے ناتے صرف تواریخ دے حوالے نال ذوالفقار علی بھٹو تے گل بات کراں گا۔

پاکستان دے پچھلے وزیر اعظم جناب ذوالفقار علی بھٹو5جنوری 1928نوں لاڑکانہ وچ پیدا ہوئے۔اوہناں دے پیو دا ناں سر شاہنواز بھٹو سی ۔او سندھ دے مشہور وڈیرے سن ۔ بھٹو خاندان دے کول تقریباً ڈھائی لکھ ایکڑ اراضی ہوندی سی۔ذوالفقار علی بھٹو دی والدہ ہندو توں مسلمان ہویاں سن اوہناں دا ناں خورشید بیگم سی۔

سر شاہنواز بھٹو1921 وچ بمبئی لیجسلیٹو کونسل دے رکن بنے۔1934 وچ اوہ ممبئی حکومت دے دیوان مقرر ہوئے۔ سر شاہنواز بھٹو میں سندھ یونائیٹڈ دے ناں نال سیاسی پارٹی وی بنائی۔

ذوالفقار علی بھٹو بشپس ہائی سکول کراچی توں ابتدائی تعلیم حاصل کیتی فیر کیتھڈرل ہائی سکول بمبئی توں دسمبر1946 نوں سینئرکیمبرج دا امتحان پاس کیتا ۔ 1950 وچ اوہناں سیاسیات وچ بی اے آنرز وی کیتا۔ایس توں مگرو ں کرائسٹ چرچ کالج آکسفورڈ یونیورسٹی وچ داخلالیا تے اوتھوں ایم اے آنرز دی ڈگری حاصل کیتی۔اوہ بڑے چنگے مقرر تے سٹوڈنٹ سیاست وچ بھا گ لیندے سن۔

1953 وچ پاکستان واپس آن مگروں کجھ چر وکالت تے پروفیسر وی رے مگر جلد ہی سبھ چیزاں توں فارغ ہو کے عملی سیاست وچ بھا گ لینا شروع کر دیتا۔

1958 دے مارشل لاء مگروں ایوب خان دی حکومت وچ سکندر مرزا دے اکھن مگروں ایوب خان دی وزارت وچ شامل ہوگئے۔ایوب خان دی حکومت وچ مختلف عہدیاں تے کم کردے رے۔

1963نوں آپ نوں ہلال پاکستان ایوارڈ نال نوازیا گیا۔

1965 دی جنگ مگروں معاہداتاشقند تے اختلاف دی وجا نال ایوب خان دی حکومت توں دُوری اختیار کیتی تے وزارت خارجا توں استعفادے دتا۔

بھٹو اودوں تک لوکاں دے دلاں تے پوری طرحاں چھاچکے سن۔

یکم دسمبر 1967 نوں اوہناں اپنی جماعت پیپلز پارٹی دی بنیاد رکھی۔

ذوالفقار علی بھٹو پہلے سویلین سن جیناں نیں چیف مارشل لا ایڈمنسٹریٹر دے طور تے اقتدار سنبھالیا

بھٹو صاحب4 جولائی 1977تک اقتدار وچ رہے۔

بھٹو صاحب دا مشہور نعرا،روٹی ، کپڑا تے مکان سی ۔جہڑا اَج وی اوناای مشہور اے تے اج وی پاکستان پیپلز پارٹی دے منشور دا حصا اے ۔

روٹی کپڑا تے مکان ہر شخص دا بنیادی حق اے مگر بدقسمتی نال اج لوکاں نوں وی لبھدا نہیں۔

ہر آون والی حکومت پچھلی حکومت تے الزامات دی بھرمار کر دیندی اے۔ہر حکومت کوئی نا کوئی چنگے کم وی لازمی کردی اے ۔ جتھے پاکستان پیپلز پارٹی تے ملک نوں دوحصیاں وچ تقسیم کرن دا الزام لگدا اے اوتھے پاکستان دا آئین بنان تے اسلامی جمہوریہ پاکستان بنان تے تعریف وی کیتی جاندی اے ۔

اگر بھٹو صاحب دی شحصیت دے لکھنا شروع کرا تے شاید الفاظ گٹ پے جان۔بھٹو صاحب نال محبت کرن والے جیالے آج وی ملدے نیں تے اک نعرا اج وی اوہناں ای مشہور اے کہ کل وی بھٹو زنداسی تے اج وی بھٹو زندا اے۔

٭٭٭٭٭