احمد نعیم ارشد دی سجری نظم*نواں زمانہ*ــــــ رویل

آ نوٹاں دی کَھڑ کَھڑ دے وچوں نکلدے میوزک دی لے تے کوئی گیت گائیے

آ سِکیاں دی چَھن چَھن تے نَچیئے تے نَچ نَچ کے دھرتی ہلایئے

آ خاباں دی دنیا چوں باہر نکل کے

کِسے خوبصورت باغیچے چ جا کے

اوہدا مُل لایئے

باغیچے دی تھاویں نویں کوئی بلڈنگ بنایئے

پُھلاں نوں مکائیے

تے پیسے کمائیے

آ شعراں تے غزلاں تے نظماں دی تھاویں

تفرقے دا کوئی سلیبس بنایئے

لڑائیاں لوایئے

آ جنگل چ قدرت دے سارے نظارے

پرندے تے جنے وی جانور نے سارے ای ہتھیں مکایئے

درختاں نوں وَڈھ کے تے بالن بنایئے

آ جنگل دی تھاویں کالونی بنایئے تے پیسے کمایئے

آ رل کے کسے دی زمین اُتے قبضاجمایئے

تے یورپ دے دو چار چکر ای لایئے

کسینو چ جایئے

دولت نوں اوتھے وی دونی کرایئے

تے وطناں نوں آیئے

ٹرسٹاں بنایئے ہسپتال پایئے

مسیتاں چ ٹائلاں تے پتھر لوائیے

غریباں نوں رج رج کے لنگر کھوایئے

کٹھے ای عمرہ تے حج کر کے آیئے

سیاست چ اپنے وی پَیرے ٹکائیے

آ لوکاں دی خدمت چ جیون بِتایئے

آ نوٹاں دی کَھڑ کَھڑ دے وچوں نکلدے

میوزک دی لےتے کوئی گیت گایئے..............

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔