وزارت داخلا نے تحریک لبیک پاکستان اُتے پابندی دا نوٹیفکیشن جاری کر دِتا……٭رویل خبر٭

اسلام آباد (نیوز ڈیسک) وزارت داخلا نے تحریک لبیک پاکستان (ٹی ایل پی) نُوں کالعدم متھ دِتا۔ وزارت داخلا نے تحریک لبیک پاکستان اُتے پابندی دا نوٹیفکیشن جاری کر دِتا اے۔ انسداد دہشتگردی ایکٹ 1997 دے تحت تحریک لبیک پاکستان نُوں کالعدم متھیا گیا۔ نوٹیفکیشن دے مطابق تحریک لبیک پاکستان مللک وچ دہشتگردی تے دوجے گھناؤنے جرماں وچ ملوث اے۔ وزارت داخلا دے نوٹیفکیشن وچ کہیا گیا اے کہ تحریک لبیک ملک وچ لوکاں نُوں اُکسا کے انتشار پیدا کرن وچ ملوث اے۔ نوٹیفکیشن مطابق ٹی ایل پی قانون نافذ کرن والے اداریاں دے اہلکاراں دیاں مَوتاں تے زخمی کرن وچ ملوث اے۔ وسیلیاں مطابق وفاقی حکومت پابندی دا ڈیکلیریشن سپریم کورٹ وچ پیش کرے گی‘ سپریم کورٹ دے فیصلے اُتے الیکشن کمیشن تحریک لبیک پاکستان نُوں ڈی نوٹیفائی کرے گا۔ وسیلیاں دا کہنا اے کہ وزارت داخلا نے سمری انسداد دہشتگردی ایکٹ دے رول 11 بی دے تحت تیار کیتی‘ انسداد دہشتگردی ایکٹ 1997 دی شق 11 بی وفاقی حکومت نُوں کسے تنظیم نُوں کالعدم متھن دا آختیار دیندی اے۔ ایس توں پہلاں وفاقی کابینا نے وزارت داخلا د ی سمری اُتے تحریک لبیک اُتے پابندی دی منظوری د ِتی سی۔پنجاب سرکار نے تحریک لبیک اُتے پابندی دی سفارش کیتی سی جہدی سمری وزیراعظم نُوں گھلی گئی سی‘ تحریک لبیک اُتے پابندی لئی وفاقی کابینا توں منظوری سرکولیشن سمری راہیں لئی گئی اے۔ وزیراعظم دی صدارت ہیٹھ وفاقی وزراء تے حکومتی آگوواں دا اجلاس ہویا‘ جہدے وچ ملکی موجودا صورتحال دا جایزا لیا گیا‘ وزیر داخلا شیخ رشید نے ملکی امن و امان دی صورتحال توں اگاہ کیتا‘ جد کہ رلتیاں نُوں تحریک لبیک اُتے پابندی دے فیصلے اُتے اعتماد وچ لیا گیا۔وزیراعظم عمران خان دا کہنا سی کہ ہتھیار بند جتھیاں نُوں ملک دا امن خراب کرن دی اجازت نہیں دے سکدے‘مطالبات کرنا ہر کسے دا حق اے پر پرتشدد احتجاج دی اجازت نہیں دِتی جا سکدی‘ تے نہ ای پرتشدد احتجاج کر کے ریاست نُوں دباء وچ لیاندا جا سکدا اے۔ وزیراعظم نے وزیر داخلا شیخ رشید تے وفاقی وزیر مذہبی امور نور الحق قادری نُوں صورتحال اُتے قوم نُوں اعتماد وچ لین دی ہدایت کردیاں ہویاں کہیا کہ لوکائی نُوں ساری صورتہال توں اگاہ کرن لئی پریس کانفرنسز کرن۔ وزیراعظم نے پولیس تے قانون نافذ کرن والے اداریاں دیاں قربانیاں دی تعریف کردیاں ہویاں کہیا کہ پولیس تے سیکیورٹی ادارایں نے جہڑے جذبے نال امن قایم کیتا تحسین جوگ اے۔ ایس توں بعد وفاقی وزیر دخلا شیخ رشید احمد نے وفاقی وزیر مذہبی امور نور الحق قادری نال پریس کانفرنس کردیاں ہویاں کہیا اے کہ تحریک لبیک پاکستان نُوں 2 سال تک سمجھاندا رہیا کہ اوہ ریگولر سسٹم وچ آ جاوے‘ پر اوہ نہیں منے‘ پابندیاں لگ گئیاں‘ کل سپریم کورٹ وچ ریفرنس وی دایر کراں گے‘ سیکیورٹی فورساں نُوں سلام پیش کردے آں‘ تحریک لبیک پاکستان اُتے پابندی لان دی کابینا نے منظوری دے دِتی اے‘ کل سپریم کورٹ وچ ریفرنس وی دایر کیتا جاوے گا‘ ٹی ایل پی والیاں دے اراداے بہت خطرناک سن‘ اوہ اپنے ایجنڈے توں پِچھے ہٹنا نہیں چاہندے سن‘ اسیں امن و امان لئی اقدمات کیتے‘ ایس موقع اُتے 580 پولیس اہلکار زخمی نیں‘ 30 گڈیاں ساڑیاں گئیاں۔ نور الحق قادری نے کہیا کہ 2س ال کوشش کردے رہے آں ٹی ایل پی ریگولر سسٹم وچ آئے‘ اسمبلی وچ قرار داد دے حوالے توں اسیں پچھے نہیں ہٹے ساں‘ حکومت قرار داد دا ایہو جہیا مسودا لیانا چاہندی سی جہدے نال ساڈے اُتے سفارتی سطح اُتے کوئی اثر نہ پئے‘ اِک ڈرافٹ ساڈا سی تے اِک ڈرافٹ ٹی ایل پی دا سی‘ اسیں کہیا سی کہ پارلیمانی کمیٹی نال ٹی ایل پی گل کرے۔ وزیر داخلا نے کہیا کہ ریاستاں دا کم منتاں کرنا نہیں ہوندا‘ اسیں مذاکرات دی بھرویں کوشش کیتی‘ گرفتاری تے سیاسی لیڈراں تے مذہبی آگوواں دی ہوندی رہندی اے‘ ڈیزولیشن لئی کل سمری گھلی جاوے گی‘ 55 اسلامی ممالک نیں‘ سارا بھار اسیں نہیں چُک سکدے ساں‘ یورپی یونین دے سارے لوک چلے جان گے‘ کسے دے نال رعایت نہیں ہووے گی‘ قانون دے مطابق کارروائی کراں گے‘ دوجے پاسے قومی اسمبلی وچ کوئی قرار داد پیش نہیں کیتی جاوے گی۔