ساڈی حکومت دا مقصد نبی کریمؐ دی سوچ اُتے چلن دی کوشش‘ مدینہ دی ریاست‘ رولز آف لاء‘ قانون دی اُچیرتا‘ فلاحی ریاست دا قیام اے: عمران خان……٭رویل خبر٭

اسلام آباد (نیوز ڈیسک) وزیراعظم عمران خان نے کہیا اے کہ ساڈی حکومت دا مقصد نبی کریمؐ دی سوچ اُتے چلن دی کوشش‘ مدینہ دی ریاست‘ رولز آف لاء‘ قانون دی اُچیرتا‘ فلاحی ریاست دا قیام اے‘ طاقتور نُوں قانون ہیٹھ نہ لیان والی قوم کدی طاقتور نہیں بن سکدی‘ کرپٹ بندا پیسا باہر لے جا کے وی ملک نُوں نقصان پہنچاندا اے‘ غریب جیل جاندا اے‘ اسیں قوم نُوں علم‘ تعلیم تے ترقی ول لے کے جانا اے۔ وفاقی حکومت ہر سال 5.5 ارب رُپئے سکالر شپس اُتے خرچ کرے گی۔ رحمت اللعالمین سکالر شپ پروگرام دی تقریب نال خطاب کردیاں ہویاں وزیراعظم نے کہیا کہ ایہ سکالر شپ سارے پاکستانی پڑھیاراں لئی اے‘ سکالر شپ میرٹ اُتے دِتیاں جان گیاں‘ پاکستان وچ کدی ایس سطح دی سکالر شپ نہیں دِتی گئی‘ 5 ارب رُپئے مالیت توں 70 ہزار سکالرشپ دواں گے‘ پنجاب تے خیبر پختونخوا سالانا 15 ہزار سکالر شپ دین گے۔ عمران خان نے کہیا کہ قانون دی حکمرانی دے بغیر قوماں ترقی نہیں کر سکدیاں‘ کمزور بندا جنی وی چوری کر لوے اوہ لندن وچ فلیٹ نہیں لے سکدا‘ پر طاقتور پیسا باہر لے جاندا اے‘ 1 ہزار ارب ڈالر غریب ملکاں توں باہر جاندا اے‘ وڈے وڈے طاقتور لوک انج کردے نیں ایہناں نُوں قانون دے اندر نہیں لیاواں گے تے ملک ترقی نہیں کرے گا۔