غزل۔۔۔۔۔۔٭رویل شاعری٭

شور نہیں کیتا چپ چپیتا چتھیااے

میں اس کافر دل نوں ربا چتھیااے

ایویں تے نہیں نیلا لہجا ہویا سو

اوہنے اپنی ساہ دا چھالا چتھیااے

سُنجے گھر دی کندھ چوں چیک اک اُگی اے

ہتھاں بوہا انگلاں تالا چتھیا اے

بلھاں اتے جیبھ اے پھیری اکھاں نیں

پتلی دے نال رل کے سفنا چتھیا اے

بھکھ لگی تے پانی پیتا اندر دا

تس لگی تے اپنا جسا چتھیااے

مردا کیوں نہیں؟ لاڈ اچ آ کے کہیا سو

میں وی لاڈ اچ آکے موہرا چتھیااے

پرلے پاسے دریا پیتا حیدرؔ جی

اُرلے پاسے اک میں صحرا چتھیااے