جنید اکرم وی گیا ‘ پنجابی سیواا دا اِک ہور بوہا بند ۔۔۔۔۔٭رویل کالم٭

جنید اکرم دی عمر اجے جان دی نہیں سی۔ خیر جان دی عمر تاں کوئی وی ہو سکدی اے پر زندگی دے عام ویہار وچ ساڈے اوسط عمر دے لوک ستر توں اسی سال دے وچکار جیوندے نیں۔ جنید اجے سٹھ دا وی نہیں سی ہویا۔ اوہدی پیدایش دا سال شاید 1963 اے۔

اک پولیس افیسر دے گھر جنم لین والے جنید اکرم نوں پیو نالوں ودھ کے نانے نال پیار سی۔ جانن والے دسدے نیں کہ جنید اکرم دے والدحاجی اکرم‘ ولی اللہ دیاں خصوصیات دے مالک سن۔ پولیس افسر سن‘ تفتیش کرن لئی وی کدھرے جاندے تاں اپنی روٹی سالن نال لے کے جاندے تاں جے کسے طرحاں وی تفتیش دے عمل وچ کوئی رشوت دا پرچھاواں نہ پے جاوے۔

پر جنید اکرم نوں اپنے پیو نالوں ودھ کے نانے نال پیار سی۔ فقیر محمد فقیر‘ پنجابی زبان دا اک بہت وڈا ناں اے جہناں نے کسے کیڑی وانگ پنجابی سیوا کیتی۔ کیڑی ساری عمر کم کردی تے اناج جوڑدی رہندی اے۔ فقیر محمدفقیر ہوراں وی پنجابی دے مسودے جوڑے‘ چھپوائے تے ایس کم وچ دن رات اک کیتی رکھیا۔ اوہناں نے ای پاکستان وچ پنجابی زبان دا پہلا مہیناوار کڈھیا سی جو دس سال تیکر جاری رہیا۔

جنید نے ہوش سنبھالیا تاں نانا جی وانگوں شاعری نوں اظہار وسیلا بنایا۔ تعلیم دین دا پیغمبری پیشا اپنایا۔ ایم اے اردو کیتا تے ٹیکنیکل تعلیم دے پڑھیاراں نوں اردو پڑھان لگ پیا پر پیار اوہدا پنجابی نال سی۔ نانا دی وراثت نوں اوہ کویں چھڈ سکدا سی۔ بعدوں اوہنے نانا جی دا رسالا ”پنجابی“ای نویں سریوں کڈھن دا جتن کیتا۔ پہلاں ایہنوں تماہی رسالے وجوں کڈھیا‘ فیرمہیناوار بناون دا آہر کیتا۔ نانا جی دے ناں نال ادارا بنایا تے کتاباں چھاپن دا کم وی شروع کیتا۔ پنجاب سرکار دے سیکرٹری انفارمیشن تے کلچر سہیل ہوری اوہدے متر سن۔ ایس مترتا دے پنجابی دیاں ہور کئی تنظیماں نوں وی فایدے ہوئے۔ جنید ہر اک دے نال ٹر پیندا سی‘ نہ صرف ٹر یندا‘ سگوں سفارش وی کردا۔

جنیدنے اپنے نانا جی نوں ڈاکٹر اکھوان لئی بہت جدوجہد کیتی۔اوہدیاں ہمتاں تے محنتاں صدقے پنجاب یونیورسٹی جہے ادارے نے فقیر محمد فقیر ہوراں دیاں سیواواں دا اعتراف کردے ہویاں اوہناں نوں ڈاکٹریٹ دی آدری ڈگری نال نوازیا۔

اولاد ولوں قدرت نے اوہدے اُتے مہربانی نہیں کیتی پر جنید نے ایہنوں دل دا روگ کدی نہیں بنایا۔ ایہ تے نہیں آکھیا جا سکدا کہ اوہدے من اندر کدی ایس محرومی بارے دُکھ نہ جاگیا ہووے پر ظاہری طور کدی شکایت کردا نظر نہیں آیا۔ اولاد دی کمی بھانجے بھتیجے پوری کردے سن۔ اوہنے اپنے من نوں پنجابی وچ لا لیا ہویا سی۔ پنجابی شاعری کرن دے نال نال تنقیدی تے تحقیقی کم وی کردا رہیا۔ اِکا دُکا کہانیاں وی لکھیاں جو ”سویر انٹرنیشنل“ واسطے گھلیاں۔ جے سنجیدا ہو کے کہانی لکھدا تاں پنجابی کہانی دا اک اہم ناں بندا۔ پر اوہدی نکی جہی جندڑی نوں وڈے سارے کئی روگ لگے ہوئے سن۔

کالج وچ پڑھان دے نال نال وحدت روڈ اُتے سجناں دی سیری نال اوہنے اپنا کالج وی بنایا۔ ایس کم وچ اوہدا بھرا سہیل احمد وی اوہدے نال سی۔ سہیل احمد‘ پنجابی ڈرامے تے ٹیلی وژن شو وچ سنجیدگی‘ وقار تے شرافت دی علامت اے۔ ایہ چیز ایہناں سارے بھراواں نوں والدین ولوں وراثت وچ ملی۔ ایہناں دے تیجے بھرا اورنگ زیب ہوری وی پڑھان دا پیغمبری کم کردے نیں۔

زندگی اپنے دھڑے اُتے نسدی جا رہی سی کہ بیٹھے بٹھائے اک دن پتا لگیا کہ جنید اکرم دے گردے فیل ہو گئے نیں۔چنگا بھلا جوان جہان مُنڈا ایس نامراد روگ دا شکار ہو کے ادھا رہ گیا۔ گردے فیل ہون دا روگ شاہی روگ اے جہڑا عمر دے نال ہنڈدا اے۔ ایہ روگ بہت سارے حوصلے‘ صبر تے پیسے دی منگ کردا اے۔ جنید نے بہت بہادری نال ایس روگ دا مقابلا کیتا۔ ہفتے وچ تن واری ڈائیلیسز کروانا کوئی ہاسا مذاق نہیں۔ پورے جُسے دے خون نوں چھاننی وچوں گزارنا‘ تے اوہ وی ہر دُوجے دن۔ جنید ایہ عذاب زندگی دے آخری چودھاں پندرھاں ورھے بھوگدا رہیا۔ ایس دوران کدی کسے ملن والے نے اوہدے موہوں شکایت نہیں سُنی۔ اوہ صبر شکر نال زندگی گزارن دا عادی سی۔

فیر پتا لگیا‘ جنید ہسپتال داخل اے۔ اوہدی حالت دن بدن ماڑی ہوندی جا رہی اے۔ ایہ ماڑی ہوندی جا رہی حالت منگلوار والے دیہاڑاوہدی موت تیکر جا اپڑی۔

بہار دا موسم سوگوار اے۔اک پاسے کرونا نے ساری دنیا وچ بے رونقی لائی ہوئی اے۔ اتوں جنید اکرم زندگی توں موت دے سفر اُتے جا کے دنیا نوں ہور بے رونق کر گیا اے۔

٭٭٭٭٭