جتھے ساڈی حکومت نہیں وی اے اوہ صوبا وی ساڈا اے:عمران خان دا کامیاب جوان پروگرام نال خطاب……٭رویل خبر٭

سکھر (نمایندا رویل) وزیراعظم عمران خان نے سندھ دے 14 ضلعیاں لئی 446 ارب رُپئے دے ترقیاتی پیکج دا اعلان کر دِتا اے‘ کہندے نیں سندھ دی لوکائی نال وعدا اے کہ جدوں تک ایہناں دے حالات بہتر نہیں ہون گے اوہ ایس پاسے توجا دیندے رہن گے‘ اوہناں دا کہنا سی کہ بڑی دیر بعد اندرون سندھ آیا آں پر اپنے نال خشخبری لیایا آں‘ ایہ صوبا ای نہیں پورا ملک میرا اے تے جتھے ساڈی حکومت نہیں وی اے اوہ صوبا وی ساڈا اے‘ ہُن پوری ایمانداری تے امانتداری نال پسماندا علاقیاں نُوں اُتے لیان لئی مدد کراں گے۔ ایہناں خیالاں دا اظہار اوہانں نے سکھر وچ کامیاب جوان پروگرام نال خطاب کردیاں ہویاں کیتا۔ وزیراعظم عمران خان نے کہیا کہ اندرون سندھ لئی 446 ارب دا پیکج وفاق اپنا بجٹ کٹ کے دے رہیا اے کیوں جے اندرون سندھ دے لوک بہت پچھے رہ گئے نیں تے ایہ پاکستان دا سبھ توں غریب علاقا اے‘ ساڈے لئی ضروری اے کہ اسیں ایتھوں دے نوجواناں نُوں اپنے پَیراں اُتے کھڑا کریے‘ ایہدے لئی اوہ کاروبار کرن‘ اپنا سیٹ اپ بنان‘ ساشی حکومت ہر ممکن کوشش کرے گی کہ ایہناں نُوں سود دے بغیر قرضے دِتے جان۔ اوہناں دا کہنا سی کہ سندھ نُوں احساس ایمرجنسی کیش پروگرام دا 33 فیصد فنڈ دِتا اے‘ پہلے اسیں احساس کفالت پروگرام وچ سوچیا سی کہ 70 لکھ خانداناں نُوں دواں گے پر ہُن اسیں ایہدے وچ 1 کروڑ 20 لکھ خانداناں نُوں لیا رہے آں۔ وزیراعظم نے ایس موقع اُتے سندھ دے جزایر دا ذکر کردیاں ہویاں کہیا کہ ایہ منصوبا سندھ دا سی تے ایہدا فایدا سندھ دے لوکاں نُوں ہونا سی اسیں تے پہلے ای سندھ سرکار نُوں کَہ دِتا سی کہ ایہدے توں ہون والا نفع وی تُسیں رکھ لوو جہدے اُتے سندھ سرکار نے این او سی وی دے دِتی سی تے اسیں جزیرے اُتے شہر بنان دی تیاری وی کر لئی سی پر فیر پتا نہیں کیہ ہویا کہ سندھ سرکار نے این او سی واپس لے لئی حالاں جے اسیں تے صرف ایہ چاہندے ساں کہ ایتھے سرمایا کاری آئے تے ایس منصوبے اُتے 40 ارب ڈالر باہروں آنے سن جہدے نال ساڈے فارن ایکسچینج ریزرو وچ وادھا ہونا سی جہدے نال ساڈا پیسا ہور بُہتا مضبوط ہوندا حالاں جے پچھلے دن پٹرول تے ڈیزل دی قیمت وچ جہڑی کمی آئی اے اوہ وی ساڈا رُپیا مضبوط ہون دی وجھا توں آئی اے‘ میں ہُن وی سندھ سرکار نُوں کہندا آں کہ ایہ سندھ دا منصوبا اے سندھ دے لوکاں دا منصوبا اے اوہ ایہدے اُتے نظرثانی کرے‘ ہُن ساڈا سارا زور ہیٹھلے طبقے نُوں اُتے لیان لئی اے‘ اوہناں دا کہنا سی کہ 18 ویں ترمیم دے بعد سارا پیسا صوبیاں دے کول چلا جاندا اے وفاق قرض لے کے چلدا اے۔ وزیراعظم عمران خان نے ہور کہیا کہ ملک دے حالات بہتر کرن دی پوری کوشش کراں گے‘ پنجاب وچ مافیا دے نال مقابلا اے‘ ایس لئی سندھ وچ ویلا نہیں لنگھا سکیا‘ بلوچستان وچ بہت غربت ویکھی‘ حکومت سنبھالی تے ملک نُوں معاشی اوکڑاں دا ساہمنا سی‘ اسیں 35 ہزار ارب رُپئے قرضا واپس کیتا‘ ماضی دی حکومت نے 20 ارب رُپئے دا قرضا واپس کیتا‘ جہڑا قرضا اسیں لاہیا جے اسیں اپنی لوکائی اُتے لاندے تے ملک ڈھائی سالاں وچ کِتے دا کِتے چلا جاندا‘ ملک دے حالات بہتر کرن دی پوری کوشش کراں گا۔ وزیراعظم نے کہیا کہ نوجواناں نُوں تکنیکی تعلیم دے رہے آں‘ پوری کوشش اے نوجواناں نُوں پَیراں اُتے کھڑا کریے‘ کوشش ہوو ے گی نوجواناں نُوں بلا سود قرضے دِتے جان‘ کھیڈاں دے میدان بنان لئی اقدامات کر رہے آں‘ کرونا دے کارن مزدو ر طبقے نُوں اوکڑاں دا ساہمنا کرنا پیا‘ لاک ڈاؤن دے کار ن پاکستان وچ اِک دم نال غربت آ گئی۔