سارے انتقال منسوخ ہو گئے نیں‘ ایہ پنجاب سرکار تے شریف خاندان دا معاملا نہیں،سرکاری زمین کسے دے ناں ٹرانسفر نہیں ہو سکدی:شہزاد اکبر ……٭رویل خبر٭

لاہور (نمایندا رویل) وزیراعظم دے مشیر برائے احتساب تے داخلا شہزاد اکبر نے کہیا اے کہ سرکاری زمین کسے وی صورت کسے بندے دے ناں ٹرانسفر نہیں ہو سکدی‘ پنجاب سرکار تے شریف خاندان دا کوئی معاملا نہیں‘ شریف خاندان نُوں وحیدہ بیگم دے وارثاں نے ڈیفکٹڈ ٹائٹل ویچیا‘ 1966-67 وچ موضع مانک (موجودا جاتی امراء) وچ پنجاب سرکار دی زمین 839 کنال سی پر سرکاری زمین واگزار دی مہم دے دوران پُن چھان نال پتا لگا کہ ہُن سرکار دے کول 1 مرلا وی نہیں اے‘ ایہ زمین جعلی حکم تے حوالے نال کجھ شخصیات دے ناں اُتے کر دِتی گئی‘ جاتی امراء دے سارے انتقال منسوخ کر دِتے گئے نیں‘ جویں چور گلی وچ نیلی بتی والی گڈی ویکھ کے سمجھدا اے کہ پولیس اوہنوں پھڑن آ گئی اے ایسے طرحاں شریف خاندان نے وی کسے ہور مقصد لئی کنٹینرز کھلارن نُوں سمجھیا کہ اوہناں دے خلاف اپریشن دی تیاری کیتی جا رہی اے‘ گھر ڈِگان لئی کنٹینرز نہیں سگوں بلڈوزر تے ٹریکٹرز آندے نیں۔ 90 شاہراہ قائداعظم اُتے پریس کانفرنس کردیاں ہویاں شہزاد اکبر نے کہیا کہ جمعرات تے جمعے دی رات نُوں مسلم لیگ ن دے سوشل میڈیا ونگ نے ایہ سنسنی کھلاری کہ پنجاب سرکار شریف خاندان دی رہایشگاہ اُتے کوئی کارروائی کرن جا رہی اے جو سرا سر بے بنیاد گے غلط سی۔ پنجاب سرکار سرکاری زمین واگزار کراون لئی پورے صوبے وچ مہم چلا رہی اے ایہدے لئی ایپ وی بنائی گئی اے جہدے اُتے لوک نشاندہی کردے نیں جد کہ وزیراعظم دے پورٹل اُتے ایہنوں شامل کیتا گیا اے کہ کوئی وی بندا جے اوہدی ذاتی جائیداد یاں سرکاری زمیناں اُتے قبضا اے تے اوہ ایہدی نشاندہی کر سکدے نیں۔ پنجاب وچ 30 سال توں اِک نظام قایم سی تے جدوں سِکّا ختم ہویا سی اودوں کھُلنا سی۔ لاہور دے ریونیو ڈیپارٹمنٹ دی جدوں پڑتال ہوئی تے 1966-67 دے ریکارڈوچ ایہ ظاہر ہویا اے کہ موضع مانک جہنوں ہُن شاہی خاندان نے اپنے انڈیا والے گھر جاتی امراء نال تفویض کر دِتا اے اوتھے پنجاب سرکار دی 839 کنال زمین سی پر اج اوتھے سرکار دا 1 مرلا وی نہیں اے‘ ایہدا کھوج لایا گیا تے بہت ساری زمین ہے اوتھے تے غیر تحصیلدار دے طور اُتے اندراج سی ایہناں وِچوں کجھ لوکاں دے ناں 1992`1989 تے 1994 وچ ٹرانسفر ہوئی۔ ایہدے وِچوں اِک ناں وحیدہ بیگم‘ اِک محمد علی تے اِک صاحب ہور سن۔ ایس ٹرانسفر دے اُتے انتقال وچ جہڑی تحریر نظر آندی اے اوہدے وچ بحکم ڈپٹی سیکرٹری بورڈ آف ریونیو تے اِک آرڈر حوالا نمبر دے طور اُتے موجود اے حالاں جے سرکاری زمین کسے دے ناں ٹرانسفر نہیں ہو سکدی۔ جدوں ایس حوالے توں پُن چھان کیتی گئی تے اصل وچ نہ کسے ولوں ایہ چٹھی گھلی گئی تے نہ ای متعلقا تحصیل وچ کوئی چٹھی دا ریکارڈ موجود اے‘ ہور تصدیق دے بعد پتا لگا کہ بورڈ آف ریونیو وچ نہ چٹھی تے نہ ایہدا کوئی حوالا نمبر ریکارڈ وچ موجود اے۔ جہدے بعد بورڈ آف ریونیو نے ضلعی انتظامیا نُوں لکھیا کہ ایہدے ریکارڈ نُوں درست کیتا جاوے تے صوبائی حکومت دی زمین اے‘ ایہنوں بحال کر دِتا جاوے تے ایہدے مطابق پراسس مکمل کیتا گیا۔ ہُن ایہ نظام کمپیوٹرائزڈ ہو گیا اے۔ جہڑے غلط انتقال درج سن اوہ انتقال واپس لے لئے گئے نیں تے پنجاب سرکار دے ناں کر دِتے گئے نیں۔ اوہناں نے کہیا کہ سبھ توں پہلے سرکاری زمین نُوں محفوظ کیتا گیا اے تے ہُن ایہدے بعد اوس ویلے دے جہڑے تحصیلدار‘ پٹواری تے گردوار سن تے موقع دے اُتے جہڑے قابضین ہون گے اوہناں توں پُچھیا جاوے گا۔ جتھوں تک شریف خاندان دے گھر اُتے قبضا کرن دی گل کیتی جا رہی اے تے سنسنی کھلاری گئی کہ کنٹینرز آ گئے نیں‘ جہڑا بندا چور ہوندا اے اوہ گلی وچ نیلی بتی والی گڈی وی لنگھے تے سمجھدا اے مینوں گرفتار کرن آئی اے‘ مذہبی جماعت خلاف اپریشن چل رہیا اے تے ایہدے ٹریفک پلان دی وجھا توں کنٹینرز لائے گئے۔ جے جاتی امراء وچ کوئی کارروائی ہونی ہوندی تے اوتھے پولیس موجود ہوندی‘ لاہور دی پولیس تے موجودا صورتحال وچ امن و امان دے قیام وچ مصروف اے۔ صرف سستی شہرت حاصل کرن لئی ایہ سوشا چھڈیا گیا کہ پنجاب سرکار جاتی امراء اُتے اپریشن کرن جارہی اے۔ اوہناں نے کہیا کہ ہُن سارے انتقال منسوخ ہو گئے نیں‘ ایہ پنجاب سرکار تے شریف خاندان دا معاملا نہیں سگوں شریف خاندان نے جہناں توں زمین خریدی اے اوہناں دے نال معاملا اے‘ پنجاب سرکار دا جہڑا حق سی اوہدا ندراج کر لیا گیا اے‘ ہُن جہڑی وی قانونی کارروائی ہووے گی اوس پراسس نُوں فالو کیتا جاوے گا۔