کجھ گھنٹیاں لئی سوشل میڈیا بند کرن اُتے معذرت، دہشتگردی کھلارن دی اجازت نہیں دِتی جاوے گی: وفاقی وزیر داخلا شیخ رشید احمد ……٭رویل خبر٭

اسلام آباد (نیوز ڈیسک) وفاقی وزیر داخلا شیخ رشید احمد نے کہیا اے کہ کجھ گھنٹیاں لئی سوشل میڈیا بند کرن اُتے معذرت چاہندا آں‘ کہ کسے صورت وی ملک وچ دہشتگردی کھلارن دی اجازت نہیں دِتی جاوے گی۔ اپنے اِک ویڈیو پیغام وچ شیخ رشید احمد نے کہیا اے کہ ایہناں دی کال ایہو جہی سی کہ شاید جمعے دی نما ز دے بعد نکلن گے۔ پورے ملک وچ جمعتہ المبارک پرسکون لنگھیا اے۔ ملک وچ کدھرے وی کوئی باہر نہیں نِکلیا۔ اوہناں نے کہیا کہ میں پولیس تے رینجرز نُوں مبارکباد پیش کردا آں‘ پنجاب دی مقامی انتظامیا تے کراچی دی انتظامیا نُوں مبارکباد دیندا آں۔ سوشل میڈیا دے سہارے ملک وچ دہشتگردی تے انتشار کھلارن والیاں نُوں شکست ہوئی اے۔ کوشش کراں گے کہ اگے توں انج نہیں ہووے گا تے سوشل میڈیا دی وی لوکائی نُوں تکلیف نہ ہووے تے پاکستان اگے ودھے۔ ملک وچ انتشار کھلارن والیاں‘ ایمبولینساں روکن والیاں‘ آکسیجن دے ٹرک روکن والیاں‘ عام لوکاں دے آوا جائی دے وسیلیاں وچ خلل پان والیاں نُوں شکست دا ساہمنا کرنا پیا اے۔ اوہناں نے واضح طور اُتے کہیا کہ ایہناں نُوں کالعدم متھ دِتا اے۔ ایہناں دے پاسپورٹ بلاک تے بینک اکاؤنٹس بند کراں گے‘ ایہناں دے شناختی کارڈ ریکارڈ اُتے لیاواں گے۔ وفاقی وزیر داخلا شیخ رشید نے کہیا کہ کسے صورت وی ملک وچ دہشتگردی کھلارن دی اجازت نہیں دِتی جاوے گی۔واضح رہوے کہ پچھلے دن پورے ملک وچ سوشل میڈیا پلیٹ فارمز نُوں دن 11 وجے توں تیجے پہر 3 وجے تک بند کر دِتا گیا سی جہدے تحت ٹویٹر‘ فیس بک‘ یوٹیوب‘ ٹیلی گرام تے واٹس ایپ نُوں بند رکھیا گیا سی۔ ایس سلسلے وچ وزارت داخلا نے نوٹیفکیشن وی جاری کیتا سی جہدے وچ دَسیا گیا سی کہ پی ٹی آئی نے وزارت داخلا دی ہدایت اُتے سروس نُوں بند کیتا سی۔ ایس توں وکھ وزیر داخلا نے کمبائینڈ ملٹری ہسپتال تے ڈسٹرکٹ ہیڈ کوارٹرز ہسپتال روالپنڈی وچ کالعدم تحریک لبیک پاکستان دے کارکناں دے تشدد نال زخمی ہون والے پولیس اہلکاراں تے رینجرز دے جواناں دی عیادت کیتی۔ وفاقی وزیر داخلا نے ایس موقع اُتے کہیا کہ کسے جتھے نُوں ریاست نُوں یرغمال بنان دی ااجازت نہیں دِتی جا سکدی۔ وزیر داخلا شیخ رشید احمد نے رینجرز دے جواناں تے پولیس اہلکاراں نُوں شاباش دِتی تے پیشا وارانا امور اُتے زبردست خراج تحسین پیش کیتا۔ اوہناں نے کہیا کہ قانون نافذ کرن والے اداریاں نے امن و امان دے حوالے توں بہت زبردست کم کیتا۔ امن و امان بحال رکھن اُتے پولیس تے رینجرز دے افسراں تے جواناں نے بہت ہمت تے بہادری وکھائی‘ کالعدم تنظیم دے کارکناں دیاں تشددانا کارروائیاں دا تحمل نال مقابلا کیتا۔