کرونا وایرس دے خطرے،جمعے توں نویاں باندھاں لاواں گے:وفاقی وزیر منصوبا بندی اسد عمر……٭رویل خبر٭

اسلام آباد (نیوز ڈیسک) وفاقی وزیر منصوبا بندی تے این سی او سی دے آگو اسد عمر نے کہیا اے کہ کرونا کیسز دی گنتی وچ تشویشناک وادھا ہو رہیا اے۔ لوکائی سنجیدگی دا مظاہرا نہیں کرے گی تے لاک ڈاؤن اُتے مجبور ہو جاواں گے۔ جمعے توں نویاں باندھاں دا اغاز کراں گے۔ نیشنل کمانڈ اینڈ اپریشن سنٹر دے اجلاس دے بعد میڈیا نال گلبات کردیاں ہویاں اسد عمر دا کہنا سی کہ وڈے شہراں وچ کرونا کیسز دی گنتی وچ تشویشناک وادھا ہویا اے‘ پہلی لہر دے دوران لوکائی دے سنجیدا رویے تے کرونا ایس او پیز اُتے عمل کرن نال کرونا کھلار اُتے قابو پان وچ خاطر خواہ مدد ملی‘ آکسیجن دے اُتے روگیاں دی گنتی 4000 توں ودھ گئی اے۔ آکسیجن سپلائی چین وی 90 فیصد ودھ گئی اے‘ سندھ وچ کرونا دا کھلار ودھ رہیا اے‘ روزانا 600 روگی ہسپتال وچ پہنچ رہے نیں‘ کرونا دی صورتحال انتہائی سنگین اے‘ کراچی وچ کرونا کیسز دی شرح 13 فیصد اُتے آ گئی اے‘ حیدر آباد وچ 14 فیصد رہی۔ اوہناں نے کہیا کہ این سی او سی اجلاس وچ کجھ نویں فیصلے کیتے نیں تے جمعے توں نویاں بندشاں دا اغاز کراں گے‘ کرونا دی وجھا توں وڈے وڈے شہر بند کرنے پین گے‘ لوکائی نُوں ذمے داری دا مظاہرا کر کے احتیاطی تدبیراں اُتے عمل کرنا چاہیدا اے‘ حالے وڈے شہر بند نہیں کر رہے کجھ دن دی گنجایش رہ گئی اے‘ جے لوکائی سنجیدگی دا مظاہرا نہیں کرے گی تے مجبوری دے تحت لاک ڈاؤ ن کرنا پوے گا‘ چالو ہفتے کرونا نال ہلاکتاں دی گنتی سبھ توں بُہتی اے‘ صوبیاں دی مدد لئی وفاق تیار کھلوتا اے‘ کرونا دے مثبت کیسز دی وجھا توں ہسپتالاں اُتے دباء ودھ رہیا اے‘ بھارت وچ کرونا کیسز دی شرح وچ وادھے دے کارن سفری پابندی عاید کر دِتی گئی اے۔ این سی او سی دے مطابق کرونا وباء دے کارن ہور 147 بندے چلانا کر گئے نیں جد کہ 5 ہزار 499 مثبت کیسز رپورٹ ہوئے نیں۔ سرکاری آنکڑیاں مطابق ایس ویلے پورے ملک وچ کرونا دے فعال روگیاں دی گنتی 83 ہزار 162 اے جد کہ 4 ہزار روگیاں دی حالت ماڑی اے۔