شوگر مافیا لوکاں نُوں مہنگی کھنڈ ویچ کے منافع کما رہے نیں،نوشہرا وچ جلوزئی ہاؤسنگ سکیم دا نینہ پتھر رکھن دی افتتاحی تقریب نال وزیر اعظم دا خطاب ……٭رویل خبر٭

نوشہرا (نمایندا رویل) وزیراعظم عمران خان نے کہیا اے کہ قانون دی گرفت توں بچن لئی پی ڈی ایم ورگے ایک بنائے جاندے نیں تے طاقتور قانون دے تابع نہیں آنا چاہندا۔ بنانا ری پبلک وچ طاقتور ڈاکوواں لئی وکھرا تے غریب لئی وکھرا قانون ہوندا اے‘ شوگر مافیا لوکاں نُوں مہنگی کھنڈ ویچ کے منافع کما رہے نیں تے ٹیکس نہیں دیندے۔ نوشہرا وچ جلوزئی ہاؤسنگ سکیم دا نینہ پتھر رکھن دی افتتاحی تقریب نال خطاب کردیاں ہویاں وزیراعظم نے کہیا کہ وزیر اعلا خیبر پختونخوا محمود خان نُوں منصوبے دی مبارکباد دیندا آں۔ ایس منصوبے نال گھٹ آمدنی والے بندیاں نُوں اپنا گھر میسر آئے گا جہڑا معاشرا اپنے غریب طبقے دا خیال نہیں رکھدا اوہ ملک ترقی نہیں کر سکدا‘ معاشرے دی پچھان کمزور طبقے نال ہوندی اے۔ کسے معاشری دی ایہ پچھان نہیں ہوندی کہ اوتھے امیر لوکاں دا رہن سہن کیہ اے‘ معاشرے دی پچھان کمزور طبقے نال ہوندی اے۔ پہلے بنک قرض دین اُتے راضی نہیں سن‘ ایہناں نُوں راضی کیتا تے ہُن اوہ سوکھیاں شرطاں اُتے قرضے دے رہے نیں تے اسیں پورے ملک وچ ہاؤسنگ منصوبے شروع کیتے نیں‘ خیبر پختونکوا دے ہور ضلعیاں وچ وی ایہو جہے منصوبے شروع کراں گے۔ وزیراعظم نے کہیا کہ ساڈی حکومت سستے گھراں دی سکیم نُوں پایا تکمیل تک پہنچایا اے۔ پاکستان وچ لوکاں نُوں قانون دی اُچیرتا دی سمجھ نہیں آ رہی‘ قانون دی اُچیرتا دا مطلب اے طاقتور نُوں قانوند ے مطابق لیانا اے۔ ایتھے طاقتور قانون ہیٹھ نہیں آنا چاہندے تے پی ڈی ایم ورگے الائنس بنائے جاندے نیں تے جے اسیں شوگر مافیا دے خلاف کجھ ایکشن لئیے تے اوہ وی کہندے نیں اسیں خاص لوک آں‘ ہر تھاں مافیا ز بیٹھے نیں‘ قوم وسائل نال غریب نہیں ہوندی سگوں قانون دی اُچریتا نہ ہون دی وجھا توں ہوندی اے۔ایس توں وکھ پشاور وچ خیبر ٹیچنگ ہسپتال دے نویں بلاک دی افتتاحی تقریب نال خطاب دوران وزیراعظم عمران خان نے کہیا کہ ہسپتال وچ دخل ہویا تے نظر آ گیا روٹین نال نہیں جنون نال کم کیتا گیا اے۔ ہسپتال دی عمارت وچ ڈاکٹر تے سٹاف ای جان پاندے نیں۔ اوہناں نے ایس امر اُتے افسوس دا اظہار کیتا کہ قرض دی ادائیگی دی وجھا توں بہت گھٹ پیسا صحت تے تعلیم نُوں ملدا اے جد کہ ایہ قرضے پچھلیاں حکومتاں نے لئے سن۔ وزیراعظم نے کہیا کہ نظام وچ جزا تے سزا دا تصور نہ ہووے تے نظام برباد ہو جاندا اے‘ ہیلتھ کارڈ راہیں لوکاں نُوں جتھے چنگیاں طبی سہولتاں ملن گیاں اوہ اوتھے جان گے تے ایہدے نتیجے وچ جتھے طبی سہولتاں بہتر نہیں اوہدے خلاف انکوایری ہووے گی۔ عمران خان نے صوبا سندھ دا حوالا دے کے کہیا کہ ساڈے کول 3 صوبے نیں جتھے ہیلتھ کارڈ دے رہے آں‘ سندھ ساڈے کول نہیں۔ اوہناں نے کہیا کہ تھرپارکر وچ وفاقی حکومت نے ہیلتھ کارڈ دِتے نیں پر سندھ دے ہور ضلعیاں دی لوکائی دا دباء ودھے گا تے متعلقا وزراء فعال ہون گے۔