عمران خان ملک وچ مہنگائی کرن والے مافیا دی سرپرستی کر کے لوکائی نال دشمنی کر رہے نیں: بلاول بھٹو زرداری ……٭رویل خبر٭

کراچی/ اسلام آباد (نیوز ڈیسک) پاکستان پیپلز پارٹی دے چیئرمین بلاول بھٹو زرداری نے رمضان دے مہینے وچ انھی مہنگائی دا ذمے دار عمران خان تے پی ٹی آئی حکومت نُوں متھ دِتا اے‘ میڈیا سیل بلاول ہاؤس توں جاری بیان وچ چیئرمین پی پی پی بلاول بھٹو زرداری نے کہیا کہ رمضان دے اغا ز وچ گھیو‘ آٹا‘ دالاں تے گوشت سنے 16 ضروری شیواں دیاں قیمتاں وچ وادھا پی ٹی آئی حکومت دی نا اہلی اے‘ چیئرمین پی پی پی نے ایس مہنگائی دی وجھا بیان کردیاں ہویاں کہیا کہ عمران خان ملک وچ مہنگائی کرن والے مافیا دی سرپرستی کر کے لوکائی نال دشمنی کر رہے نیں۔ اوہناں نے ایس گل اُتے تشویش دا اظہار کیتا کہ عمران خان دے رمضان وچ ہر شے دی نگرانی دے اعلان دے بعد مہنگائی وچ خوفناک وادھا ہو چُکیا اے۔ بلاول نے موجودا حکومت اُتے کڑی تنقید کردیاں ہویاں کہیا کہ سلیکٹڈ حکومت نے لوکائی نُوں کندھ نال لان وچ کوئی کسر نہیں چھڈی‘ رمضان دے مہینے وچ کھان پین دیاں شویاں دیاں ریکارڈ قیمتاں نے لوکائی دا لَک توڑ دِتا اے‘ چیئرمین بلاول بھٹو زرداری نے عمران خان نُوں مخاطب کردیاں ہویاں واضح طور اُتے کہیا کہ ایہ ملک تے ایہدے مسئلیاں دا حل تہاڈے وَس دی گل نہیں‘ عمران خان نے جہڑے رمضان پیکج دا اعلان کیتا سی‘ اوہ کدھرے نظر نہیں آ رہیا‘ رمضان وچ یوٹیلیٹی سٹوراں نُوں سبسڈی دین نال حکومت دی ذمے داری ختم نہیں ہو گئی کیوں جے اوپن مارکیٹ وچ مہنگائی اسمان نُوں ہتھ لا رہی اے جد کہ انتظامیا ولوں لائے گئے زیادا تر بازاراں وچ اوپن مارکیٹ نالوں بُہتیاں مہنگیاں شیواں وِک رہیاں نیں‘ اج رمضان وچ عام بندے دا اینا بجٹ وی نہیں کہ اوہ اپنے گھروالیاں لئی روزانا سبزیاں تے پھَل تک خرید سکے۔ بلاول نے مہنگائی دی وجھا دَسدیاں ہویاں کہیا کہ عمران خان نے ملک نُوں قرضیاں وچ سُٹ کے مافیا ز دے حوالے کر دِتا اے۔ اوہناں دا ایہ وی کہنا سی کہ وزرائے خزانا دی تبدیلی نال لوکائی دیاں تکلیفاں وچ کوئی کمی نہیں آ سکدی‘ اصل ریلیف لوکائی نُوں اوس ویلے ملے گا جدوں ملک وچ مہنگائی دے ذمے دار نا اہل حکمران گھر جان گے۔ بلاول نے سوال کیتا کہ نا اہل وزیراعظم دنیا دیاں مثالاں دین دی بجائے ایہ دَسن کہ اوہناں دی حکومت نے لوکائی لئی ہُن تک کیہ کیتا؟ اوہناں نے ملکی صورتحال ول اشارا کردیاں ہویاں کہیا کہ ہر مہینے مہنگائی وچ وادھے دی شرح آپ اپنا ریکارڈ توڑ رہی اے تے مہنگائی دے حوالے توں حکومت دے اپنے ای آنکڑے ایہدے کارنامیاں دی قلعی کھول رہے نیں‘ حالیا تھنک ٹینکس دی رپورٹ دَسدی اے کہ معیشت سخت سست روی دا شکار اے‘ دنیا دے اگے کشکول لے کے گھُمن والے وزیراعظم نے لوکائی نُوں کوئی ریلیف نہیں دِتا سگوں صرف رسوائی دِتی‘ عمران خان ضد چھڈن تے لوکائی اُتے رحم کھا کے مستعفی ہون تے گھر جان۔