نیشنل انجینئرز ویلفیئر ایسوسی ایشن ولوں پاکستان سٹیل مل دے آکسیجن پلانٹ دی بحالی لئی سیواواں دی پیشکش ……٭رویل خبر٭

کراچی (اُچیچا نمایندا رویل) نیشنل انجینئرز ویلفیئر ایسوسی ایشن دا کہنا اے کہ سٹیل مل دے اِک پلانٹ توں یومیا 25 ہزار سلنڈر ز بھرے جا سکدے نیں۔ انجینئرز دی رجسٹرڈ تنظیم نیشنل انجینئرز ویلفیئر ایسوسی ایشن نے وزیراعظم نُوں خط گھل دِتا اے‘ جہدے وچ اوہناں نے پاکستان سٹیل دے آکسیجن پلانٹ دی بحالی لئی پیشا وارانا خدمتاں قومی جذبے دے نال فراہم کرن دی پیشکش کیتی اے۔ خط وچ دَسیا گیا اے کہ پاکستان سٹیل وچ 260 ٹن یومیا دے دو پلانٹ نصب نیں‘ یورپی ساختا پلانٹس وِچوں ہر 1 پلانٹ فی گھنٹا 7500 کیوبک میٹر آکسیجن پیدا کر سکدا اے‘ جد کہ اِک پلانٹ توں یومیا 25 ہزار سیلنڈرز بھرے جا سکدے نیں‘ نیشنل انجیئرز اپنے وسیع تجربے نُوں استعمال کردیاں ہویاں آکسیجن پلانٹ دی بحالی لئی اپنیاں خدمتاں فراہم کرن گے۔ واضح رہوے کہ پاکستان سٹیل دا آکسیجن پلانٹ 2015 توں بند اے جہنوں 40 بندیاں اُتے مشتمل عملے دی مدد نال 8 توں 12 دن وچ فعال کیتا جا سکدا اے۔ایہدے فیبریکیٹنگ ڈیپارٹمنٹ وچ آکسیجن دے سلینڈرز وی تیار کیتے جا سکدے نیں۔ پچھلے دن وی پاکستان سٹیل دے ملازماں تے ورکر ز یونین دے آگوواں نے حکومت نُوں پیشکش کیتی سی کہ موجودا حالات وچ پاکستان سٹیل دے آکسیجن پلانٹ نُوں فعال کر کے پورے پاکستان وچ آکسیجن دی طلب پوری کیتی جا سکدی اے تے آکسیجن دی بلیک مارکیٹنگ دا خاتما وی ممکن ہووے گا۔