عثمان بزدار دی ڈھائی سالا کمکاری شہباز دور توں بہتر اے: وزیراعظم عمران خان……٭رویل خبر٭

ملتان (نمایندا رویل) وزیراعظم عمران خان نے کہیا اے کہ فرانس وچ توہین رسالت اُتے اِک جماعت نے حکومت دی کنپٹی اُتے بندوق رکھ کے کہیا فرانسیسی سفیر نُوں واپس گھلو‘ نبیؐ دی شان وچ گستاخی اُتے ہر مسلمان نُوں تکلیف ہوندی اے‘ ملک وچ 100سال وی توڑ بھن نال یورپو چ توہین رسالت ختم نہیں ہوو ے گی‘ میاں شہباز سریف تے عثمان بزدار دے کماں دا موازنا کیتا جاوے‘ ڈھائی سال پہلے بالی ووڈ دا ایکٹر پانی وچ بوٹ پا کے کھلوتا ہوندا سی تے اوہنے ارباں رُپئے تشہیری مہم اُتے خرچ کیتے۔ ملتان وچ کاشتکاراں لئی کسان کارڈ دے اجرا لئی منعقدا تقریب نال خطاب وچ اوہناں نے کہیا کہ عثمان بزدار دی ڈھائی سالا کمکاری پچھلے ادوار توں چنگی اے افسوس کسے نے عثمان بزدار دی کمکاری دا جایزا نہیں لیا۔ پاکستان وچ چھوٹا جہیا طبقا لوکائی دا خون چوس رہیا سی‘ سیاست وچ آن دا مقصد غریب طبقے دی فلاح لئی کم کرنا سی۔ ماضی دے حکمراناں نے لندن دے مہنگے علاقیاں وڈے محلات بنائے۔ لوکاں نُوں کہندے نیں پیسا لے کے آؤ‘ اپنا پیسا باہر لے گئے۔ عثمان بزدار دے دل وچ غریباں لئی درد اے مینوں ایہو جہیا وزیر اعلا چاہیدا سی جہڑالوکاں دے دُکھ تے درد نُوں سمجھے‘ مینوں اوہ بندا چاہیدا سی جہدا پاکستان لئی جینا مرنا ہووے۔ پنجاب وچ غریباں دی بہتری لئی اقدام چُکے جا رہے نیں۔ وزیراعظم عمران خان نے کہیا کہ اج اسیں اوہ اقدام چُکیا جہڑا ثابت کرے گا کہ اسیں جدید زراعت ول جا رہے آں‘ اج اجرا ہون والا کسان کارڈ پاکستان نُوں تبدیل کر دیوے گا‘ اسیں جدید زراعت ول ودھ رہے آں‘ کسان جنا مضبوط ہوو گا گا معیشت اونی مضبوط ہووے گی۔ ساڈے کسان اج وی موہن جوداڑو والے طریقیاں اُے عمل کر رہے نیں۔کسان کارڈ دے اجرا نال مارڈرن ایگریکلچر ول جا رہے آں‘ خُشی ا ے پنجاب سرکار نے کساناں لئی انقلابی اقدامات کیتے۔ اوہناں نے ہور کہیا کہ کسان کارڈ نال براہ راست 97 فیصد کساناں نُوں فایدا ہووے گا۔ چھوٹے کسان دی مدد کراں گے تے ملک وچ خشحالی آئے گی‘ کسان کارڈ راہیں سستی کھاد تے ہور سہولتاں میسر آن گیاں کیوں جے پاکستان وچ 97 فیصد چھوٹا کاشتکار اے۔ عالمی رپورٹ مطابق خیبر پختونخوا وچ غربت گھٹ ہوئی اے۔ جنوبی پنجا ب پچھے رہ گیا اے۔ جنوبی پنجاب دی ابادی دے مطابق نوکریاں دا کوٹا ملے گا۔ جنوبی پنجاب وکھرا صوبا بنے گا‘ ترمیم ول جاواں گے۔ وزیراعظم نے کہیا کہ اِک طریقا ٹی ایل پی دا اے کہ اسلام آباد اُتے دھاوا بول کے‘ مظاہرے تے توڑ بھن کر کے حکومت اُتے سفیر نُوں کڈھن دا دباء پاؤ‘ پر کیہ ایہد ینال یورپ تے فرانس وچ توہین رسالت رُک جاوے گی‘ میں لکھ کے دیندا آں 100 سال وی انج کردے رہیے‘ ایہدے نال کوئی فرق نہیں پوے گا سگوں ازادی اظہار رائے دے ناں اُتے توہین رسالت دے واقعات ہور ودھن گے۔ عمران خان نے کہیا کہ سانوں وی توہین رسالت اُتے تکلیف ہوندی اے تے ساڈا مقصد اِک ای اے پر ایہنوں ختم کرن لئی میرا تے میری حکومت دا طریقا دوجا اے تے میرا ای طریقا کامیاب ہوو ے گا‘ اسیں دنیا دے سارے مسلمان ملکاں دے آگوواں نُوں اکٹھا کر کے گلبات کر رہے آں‘ حال ای وچ شاہ محمود قریشی نے 4 ملکاں نال گل کیتی اے جہڑے ایہدے اُتے متفق نیں۔ وزیراعظم نے کہیا کہ اسیں عالم اسلام نُوں اکٹھا کراں گے تے رَل کے اِک متفقا لائحے عمل لے کے یورپ نُوں کہواں گے کہ ازادی اظہار دے ناں اُتے سوا ارب مسلماناں نُوں تکلیف نہیں دے سکدے‘ جس طرحاں یہودیاں نُوں تکلیف دین دا سوچ وی نہیں سکدے تے ہولو کاسٹ اُتے کوئی منفی گل نہیں کیتی جا سکدی‘ جہدے اُتے یورپی ملکاں وچ قید دی سزا اے‘ تے کیہ اسیں 50 مسلمان ملک رَل کے یورپ نُوں سمجھا نہیں سکدے کہ ازادی اظہار رائے ضرور استعمال کرو پر نبیؐ دی شان وچ گستاخی نہیں کیتی جا سکدی تے جے تُسیں انج کیتا تے اسیں سارے تہاڈا تجارتی بائیکاٹ کر دواں گے‘ ایس طریقے نال فرق پوے گا تے اسیں کامیاب ہوواں گے۔ عمران خان نے ہور کہیا کہ میری حکومت ایس راہ اُتے لگی ہوئی اے‘ اپنے 5 سال پورے ہون توں پہلے قوم نُوں خشخبری دواں گا کہ ایہناں ملکاں وچ ساڈا پیغام پہنچ چُکیا ہووے گا تے فیر کدی اوتھے توہین رسالت نہیں ہووے گی‘ ایس طریقے نال اسیں کامیاب ہوواں گے۔